មិនដេកយំដូចមុន អាង សុជាតា ឆ្លើយតបនឹងមតិរិះគន់រឿងរូបរាងរបស់នាង

តារាសម្តែង អាង សុជាតា បានឆ្លើយតបទៅនឹងមតិរិះគន់វិញជុំវិញការហាមប្រាមមិនឱ្យនាងញុំាច្រើនដោយចាត់ទុកថាមុខរបស់នាងពេលនេះដូចជាហ៊ីងទៅហើយ។ តារាសម្តែងរូបនេះថានាងពេញចិត្តមុខខ្លួនឯងពេលនេះ និងបានបញ្ជាក់ថានាងមិនស្លូតដេកយំដូចមុននោះទេពីព្រោះអ្នករិះគន់នោះមិនបានចិញ្ចឹមនាងឡើយ។

ប្រិយមិត្តមួយចំនួនបានស្គាល់មកហើយថា អាង សុជាតា ហៅឈូឈូ គឺជាតារាសម្តែងមានទេពកោសល្យម្នាក់និងត្រូវជាកូនស្រីតារាសម្តែងជើងចាស់ សឿនផាន ផាភួង រួមទាំងជាមិត្តភក្តិរបស់ ឡូរីន។ ពីមួយថ្ងៃទៅមួយថ្ងៃសម្រស់របស់ អាង សុជាតា កាន់តែស្រស់ស្អាតឡើងៗមានមុខប៉ោងៗគួរឱ្យស្រលាញ់ជាពិសេសមានសមត្ថភាពរកប្រាក់ដោយខ្លួនឯង។

ទោះបីជាមានសម្រស់ស្រស់ស្អាតបានសម្តែងនៅក្នុងខ្សែភាពយន្តជាច្រើន អាង សុជាតា នៅតែត្រូវគេ Bully ពីរូបសម្រស់របស់នាង។ យ៉ាងណាមិញកាលពីមុនអាចថានាងនៅក្មេងពេលឮសម្តីរិះគន់អាចទៅដេកយំក្នុងបន្ទប់ តែពេលនេះ អាង សុជាតា ចេញមកតបតមិនញញើតឡើយ។ ការរិះគន់បានចាប់ផ្តើមនៅពេល អាង សុជាតា បង្ហោះវីដេអូញុំាអី ហើយត្រូវបានអ្នកលេងបណ្តាញសង្គមម្នាក់បញ្ចេញមតិថា «ខំញុំាទៅមុខឡើងដូចហ៊ីងហើយ»។

ទទួលបានមតិរិះគន់ថាមុខរបស់នាងដូចជា ហ៊ីង តារាសម្តែងវ័យក្មេងរូបនេះបានតបតវិញថានាងពេញចិត្តមុខបែបនេះ ហើយក៏មិនប្រកាន់ខឹងទៅកាន់មនុស្សនិយាយអត់ឆ្លងកាត់ខួរដែរ។

មិនត្រឹមតែតបតនោះទេ អាង សុជាតា បានបង្ហោះរូបភាព Screenshot ការឆ្លើយឆ្លងរបស់នាងនិងអ្នករិះគន់ ដោយបញ្ជាក់ថាកាលពីមុនអ្នកណា comment បែបនេះប៉ះពាល់អារម្មណ៍ដេកយំក្នុងបន្ទប់ តែឥឡូវអ្នកណាមកមិនទំនងនាងដាក់វិញហើយពីព្រោះមិនមែនអ្នករិះគន់ទាំងនោះចិញ្ចឹមនាងទេ។ ការតបតរបស់ អាង សុជាតា ទៅកាន់មតិរិះគន់ទទួលបានការគាំទ្រជាច្រើននិងបានសើចចំអកទៅកាន់អ្នករិះគន់នោះវិញជាមួយមតិយោបល់ជាច្រើន៕