Zhang Linghe បានសារភាពថាមានបញ្ហាសុខភាពដោយសារតែធ្វើការក្នុងកម្រិតខ្ពស់

ថ្មីៗនេះ Zhang Linghe តារាសម្តែងកម្ពស់ ១.៩ម៉ែត្រ បានបង្ហាញនៅក្នុងកម្មវិធី «Our Dormitory» ដោយបាននិយាយថារាងកាយរបស់លោកកំពុងមានបញ្ហាដោយសារតែការងារដ៏មមាញឹក។ តារាសម្តែងរូបនេះបញ្ជាក់ថាដោយសារតែសម្ពាធការងារ និងរបៀបរស់នៅមិនទៀងទាត់ខ្លួនបានជួបប្រទះបញ្ហាជាច្រើនដូចជា បញ្ហាដំណេក ជាតិស្ករក្នុងឈាមទាប អាឡែស៊ីអាហារ និងថែមទាំងមានជំងឺគេងមិនលក់ធ្ងន់ធ្ងរទៀតផង។

Zhang Linghe និយាយថាមានពេលមួយលោកគេងតិចជាង ២០ ម៉ោងក្នុងមួយសប្តាហ៍។ ដើម្បីឱ្យខ្លួនឯងមិនងងុយគេងតារាសម្តែងរូបនេះតែងតែផឹកកាហ្វេខ្លាំងពេលពោះទទេ។ នៅទីបំផុតលោកក៏មានអាការៈចង្វាក់បេះដូងលោតញាប់ ហើយគ្រូពេទ្យរបស់ Zhang Linghe បានណែនាំលោកឱ្យបោះបង់ទម្លាប់នេះចោលភ្លាមៗ។ ក្រៅពីការគេងមិនលក់ Zhang Linghe ក៏បាននិយាយផងដែរថា ដោយសារតែប្រព័ន្ធភាពស៊ាំមិនប្រក្រតី លោកតែងតែមានអាឡែស៊ីជាមួយអាហារជាច្រើនក្នុងរយៈពេលប៉ុន្មានឆ្នាំចុងក្រោយនេះ រួមទាំងស៊ុត និងនំធ្វើពីស៊ុត។ សូម្បីតែការទទួលទានអាហារខុសដោយចៃដន្យក៏អាចបង្កឱ្យមានប្រតិកម្មដូចជាកន្ទួលរមាស់ និងរលាកច្រមុះអាឡែស៊ីផងដែរ។

ដើម្បីឱ្យសមនឹងតួនាទី Zhang Linghe បានស្រកទម្ងន់យ៉ាងខ្លាំង ដោយកម្ពស់ ១.៩ ម៉ែត្រមានទម្ងន់៦៦ គីឡូក្រាម ដែលជាស្ថានភាពសុខភាពមួយដែលបង្កឱ្យមានការព្រួយបារម្ភក្នុងចំណោមមនុស្សជាច្រើន។
ក្រៅពីបញ្ហាសុខភាពរបួសពីអតីតកាលរបស់លោកពីការថតរឿងក៏ធ្ងន់ធ្ងរផងដែរ។ ដើម្បីជៀសវាងការរំខានដល់ការថតលោកបានប្រាប់ថាគ្រាន់តែមាន របួសសរសៃពួរតិចតួចប៉ុណ្ណោះ។ តារាសម្ដែងរូបនេះបានស៊ូទ្រាំនឹងការឈឺចាប់ដោយទទួលការព្យាបាលដោយការចាក់ម្ជុលវិទ្យាសាស្ត្រ និងការព្យាបាលដោយចលនា ហើយថែមទាំងទទួលការចាក់ថ្នាំបំបាត់ការឈឺចាប់ដើម្បីបន្តការថតទៀតផង។

ទាក់ទងនឹងការត្រូវបានមនុស្សជាច្រើនចាត់ទុកថា «មិនប្រុងប្រយ័ត្ន» ពេកតារាសម្តែងវ័យ២៨ឆ្នាំរូបនេះបាននិយាយថា វាគ្រាន់តែជាផ្នែកមួយនៃបុគ្គលិកលក្ខណៈរបស់ខ្លួន។ Zhang Linghe បាននិយាយថា ខ្លួនមិនអាចអង្គុយស្ងៀមបានទេ។ ប្រសិនបើលោកមិនធ្វើការងាយនឹងធ្លាក់ចូលទៅក្នុងស្ថានភាពថប់បារម្ភ ដូច្នេះទោះបីជាលោកនៅក្មេងក៏ដោយ សុខភាពរបស់លោកបានផ្តល់សញ្ញាព្រមានម្តងហើយម្តងទៀត។

បន្ទាប់ពីដំណឹងនេះត្រូវបានប្រកាស អ្នកគាំទ្រជាច្រើនបានផ្តល់ពាក្យលើកទឹកចិត្តដល់ Zhang Linghe។ មនុស្សជាច្រើនបានណែនាំតួឯករូបនេះឱ្យផ្តោតលើសុខភាពរបស់ខ្លួននិងជៀសវាងការសម្រកទម្ងន់ច្រើនពេក ព្រោះវាអាចប៉ះពាល់ដល់ប្រព័ន្ធភាពស៊ាំ។ អ្នកគាំទ្រក៏បានជំរុញឱ្យ Zhang Linghe កុំធ្វើការហួសកម្លាំងផងដែរ ដោយជូនពរឱ្យតារាសម្តែងរូបនេះបន្តមានសុវត្ថិភាព និងមានសុខភាពល្អ៕