អូស្ត្រាលីរឹបអូសថ្នាំញៀ.ននាំចូលពីប្រទេសថៃ រហូតដល់៨២គីឡូក្រាមក្នុងរយៈពេលត្រឹមតែ៦ខែ

៨២ គីឡូក្រាមក្នុងរយៈពេលត្រឹម ៦ខែ! នេះមិនមែនជាតួលេខធម្មតាទេ ប៉ុន្តែវាជាបរិមាណថ្នាំញៀ.នដ៏ច្រើនមហាសាល ដែលត្រូវបានលួ.ចនាំចូលពីប្រទេសថៃ ហើយអាជ្ញាធរអូស្ត្រាលីស្ទាក់ចាប់បានជាបន្តបន្ទាប់ ដោយបើកប្រតិបត្តិការក្តៅគគុក! ការរកឃើញនេះធ្វើឱ្យពិភពលោកភ្ញាក់ផ្អើលយ៉ាងខ្លាំង ចំពោះទំហំនៃការរត់ពន្ធឆ្លងដែនដ៏គួរឱ្យភ័យខ្លាច ដែលកំពុងតែរីករាលដាលយ៉ាងគំហុក។

តាមការចុះផ្សាយរបស់សារព័ត៌មានអូស្ត្រាលីកាលពីថ្ងៃទី១ ខែកក្កដា ដោយផ្អែកតាមប្រភពព័ត៌មានពីសមត្ថកិច្ច, កងកម្លាំងព្រំដែន និងគណៈកម្មការស៊ើបអង្កេតឧក្រិដ្ឋកម្មអូស្ត្រាលី បញ្ជាក់ថារយៈពេលត្រឹមតែ ៦ខែ (ចាប់ពីខែមករា ដល់មិថុនា) ឆ្នាំ២០២៦ អាជ្ញាធរអូស្ត្រាលីបានបង្ក្រាប និងរឹបអូសថ្នាំញៀនខុសច្បាប់មានទម្ងន់សរុបរហូតដល់ ៨២គីឡូក្រាម ដែលមានប្រភពមកពីប្រទេសថៃ ក្នុងប្រតិបត្តិការធំៗចំនួន ៦ ផ្សេងគ្នា។

ថ្នាំញៀនដែលត្រូវបានអាជ្ញាធរអូស្ត្រាលីរឹបអូសក្នុងប្រតិបត្តិការ រួមមាន ហេរ៉ូអ៊ីន, មេតំហ្វេតាមីន និងសារធាតុញៀនប្រភេទផ្សេងទៀត។ តាមច្បាប់ប្រទេសអូស្ត្រាលី បទល្មើសនាំចូលគ្រឿងញៀនដើម្បីជួញដូរបែបនេះ គឺជនល្មើសប្រឈមនឹងទោសជាប់ពន្ធនាគារ ចាប់ពី ២៥ឆ្នាំ រហូតដល់អស់មួយជីវិត។ ថ្នាំញៀនទាំងនោះមានតម្លៃជាង ៤០លានដុល្លារអូស្ត្រាលី ដោយមានមនុស្សយ៉ាងហោចណាស់ ជាង១០នាក់ (រួមទាំងនារីអាកាសចរណ៍ថៃ អាយុ ២៦ឆ្នាំ) ត្រូវបានចាប់ខ្លួននៅអាកាសយានដ្ឋាន។

សមត្ថកិច្ចអូស្ត្រាលីបញ្ជាក់ថា ការបង្ក្រាបបណ្តាញឧក្រិដ្ឋកម្មឆ្លងដែន គឺជាភារកិច្ចដ៏សំខាន់ ដោយមន្ត្រីអនុវត្តច្បាប់របស់អូស្ត្រាលីនឹងធ្វើការសហការជាមួយប្រទេសនានា រួមទាំងប្រទេសថៃ ផងដែរ ដើម្បីស៊ើបអង្កេតពីប្រភពជួញដូរថ្នាំញៀន និងដាក់ទោសទៅតាមច្បាប់ចំពោះអ្នកពាក់ព័ន្ធទាំងអស់។

តួលេខថ្នាំញៀនជាច្រើនគីឡូក្រាមនេះ ដែលត្រូវបានបង្ក្រាបក្នុងពេលត្រឹមពាក់កណ្តាលឆ្នាំ២០២៦ គឺជាសញ្ញាអាសន្នដ៏គួរឱ្យព្រួយបារម្ភនៃការរត់ពន្ធថ្នាំញៀនខុសច្បាប់ពីប្រទេសថៃ ទៅកាន់អូស្ត្រាលី។ នេះបញ្ជាក់យ៉ាងច្បាស់ថា បើទោះបីជាក្រុមរត់ពន្ធព្យាយាមប្រើល្បិចកលយ៉ាងណាក៏ដោយ ក៏មិនអាចគេចផុតពីភ្នែកសមត្ថកិច្ចបានដែរ។

សូមរំឭកថា ប្រទេសអូស្ត្រាលី មានច្បាប់បង្ក្រាបថ្នាំញៀនដ៏តឹងរ៉ឹងបំផួយនៅលើពិភពលោក ប្រសិនបើបុគ្គលណានាំចូល ឬមានថ្នាំញៀនជាប់ខ្លួនក្នុងបរិមាណអាចជួញដូរបាន នឹងត្រូវជាប់ពន្ធនាគាររាប់សិបឆ្នាំ ឬក៏ជាប់ពន្ធនាគារអស់មួយជីវិត (អាស្រ័យលើប្រភេទ និងបរិមាណថ្នាំញៀន)។ រដ្ឋាភិបាលអូស្ត្រាលីបានដាស់តឿនឱ្យពលរដ្ឋខ្លួនឱ្យប្រុងប្រយ័ត្នចំពោះការទទួលវ៉ាលិស ឬរបស់ផ្ញើពីអ្នកដៃដែលមិនដឹងប្រភពច្បាស់លាស់ ដើម្បីកុំឱ្យក្លាយជាក្រុមជួញដូរថ្នាំញៀនឆ្លងដែន ហើយឈានទៅរងការចោទប្រកាន់ទទួលទោសយ៉ាងធ្ងន់ធ្ងរ ៕