ថ្នាំពេទ្យគ្មានច្បាប់អនុញ្ញាតជាង ២ម៉ឺនប្រអប់ ត្រូវបានសមត្ថកិច្ចរកឃើញខណៈកំពុងដឹកតាមរថយន្តបម្រុងយកទៅចែកចាយ

តើសុខភាពប្រជាជនយើងនឹងទៅជាយ៉ាងណា បើសិនជាឱសថដែលគ្មានប្រភពច្បាស់លាស់ទាំងនេះ ត្រូវហូរចូលទៅក្នុងទីផ្សារ? ថ្មីៗនេះ សមត្ថកិច្ចចម្រុះខេត្តកណ្តាល បានបើកប្រតិបត្តិការស្ទាក់ឃាត់រថយន្តមួយគ្រឿង ដោយបានរកឃើញថ្នាំពេទ្យសរុបចំនួន ៤៥ កេសធំ ដែលគ្មានច្បាប់អនុញ្ញាត និងគ្មានការចុះបញ្ជិកាត្រឹមត្រូវ ត្រូវបានជនល្មើសដឹកបម្រុងយកទៅចែកចាយនៅលើទីផ្សារយ៉ាងអាណាធិបតេយ្យ។ ការទប់ស្កាត់បានទាន់ពេលវេលានេះ គឺជាជំហានគន្លឹះមួយក្នុងការការពារសុខុមាលភាពសាធារណៈ ជៀសវាងការចែកចាយឱសថក្លែងក្លាយ ឬអន់គុណភាព ដែលអាចបង្កគ្រោះថ្នាក់ធ្ងន់ធ្ងរដល់អាយុជីវិតអ្នកប្រើប្រាស់។

យោងតាមការឱ្យដឹង របស់ស្នងការដ្ឋាននគរបាលខេត្តកណ្តាល នៅថ្ងៃទី១ ខែកក្កដា ឆ្នាំ២០២៦ បានឲ្យដឹងថា ប្រតិបត្តិការនេះធ្វើឡើងកាលពីវេលាម៉ោង ០០:១៥ នាទី រំលងអធ្រាត្រ ឈានចូលថ្ងៃទី ៣០ ខែមិថុនា ឆ្នាំ ២០២៦ ស្ថិតនៅចន្លោះគីឡូម៉ែត្រលេខ ២៣ ក្នុងស្រុកមុខកំពូល ខេត្តកណ្តាល។ ហេតុការណ៍ចុះស្ទាក់ឃាត់នេះ បានធ្វើឡើងទៅលើរថយន្តមួយគ្រឿងម៉ាក Ssangyong Istana ពណ៌ប្រាក់ ពាក់ស្លាកលេខភ្នំពេញ 2AA-8359។ ក្រោយពេលដឹងសញ្ញា និងមានការសង្ស័យ មន្ត្រីជំនាញបានបង្ខំឱ្យរថយន្តខាងលើឈប់ ដើម្បីធ្វើការត្រួតពិនិត្យយ៉ាងហ្មត់ចត់ ហើយក៏បានស្រឡាំងកាំងនៅពេលបើកទ្វាររថយន្តរកឃើញកេសកាតុងធំៗចំនួន ៤៥ កេស ញាត់ណែនណាន់តាន់តាប់ពេញតួរថយន្ត ដែលខាងក្នុងសុទ្ធសឹងតែជាឱសថព្យាបាលរោគចម្រុះជាច្រើនប្រភេទ។

យោងតាមលទ្ធផលនៃការរាប់ និងផ្ទៀងផ្ទាត់ទិន្នន័យជាក់ស្តែងរបស់មន្ត្រីជំនាញការពារអ្នកប្រើប្រាស់ សហការជាមួយមន្ត្រីសុខាភិបាល បានបង្ហាញថា ថ្នាំពេទ្យដែលរឹបអូសបានមានចំនួន ១២០ ប្រភេទ ត្រូវនឹង ២៣,៤០០ ប្រអប់។ តំណាងសមត្ថកិច្ចបានគូសបញ្ជាក់ថា រាល់ការនាំចូលឱសថដោយលបលួច គ្មានការចុះលេខទិដ្ឋាការ ឬបញ្ជិកាពីក្រសួងសុខាភិបាល គឺជារូបភាពល្មើសច្បាប់ដ៏ធ្ងន់ធ្ងរ ព្រោះឱសថទាំងនោះមិនត្រូវបានឆ្លងកាត់ការពិសោធន៍ត្រឹមត្រូវ ដែលអាចជាឱសថក្លែងក្លាយ អន់គុណភាព ឬហួសកាលបរិច្ឆេទប្រើប្រាស់ បង្កើតជាគ្រោះថ្នាក់ខ្លាំងដល់អ្នកជំងឺ។

បច្ចុប្បន្ន ទាំងវត្ថុតាងរថយន្ត និងថ្នាំពេទ្យខុសច្បាប់សរុបជាង ២ម៉ឺនប្រអប់ ត្រូវបានមន្ត្រីជំនាញប្រមូលរក្សាទុកជាបណ្តោះអាសន្ន ដើម្បីរៀបចំសំណុំរឿងចាត់ការបន្តទៅតាមនីតិវិធីច្បាប់។ ជាមួយគ្នានេះ អាជ្ញាធរក៏បានផ្ញើសារព្រមានទៅកាន់អាជីវករ និងអ្នកនាំចូលទាំងអស់ ត្រូវបញ្ឈប់រាល់ទង្វើលបលួចនាំចូលឱសថខុសច្បាប់តាមគ្រប់រូបភាព និងបានអំពាវនាវដល់ប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នខ្ពស់ មុននឹងទិញឱសថប្រើប្រាស់ ដោយត្រូវពិនិត្យមើលលេខបញ្ជិកា (Reg. No) ឱ្យបានច្បាស់លាស់នៅលើប្រអប់ថ្នាំជានិច្ច។

ផ្អែកតាមហេតុការណ៍ដែលបានកើតឡើងខាងលើនេះ សូមបងប្អូនប្រជាពលរដ្ឋទាំងអស់ មេត្តាជៀសវាងដាច់ខាតការទិញ និងប្រើប្រាស់ឱសថតាមបណ្តាញសង្គម ឬពីប្រភពដែលគ្មានការចុះបញ្ជិកាត្រឹមត្រូវពីក្រសួងសុខាភិបាល។ រាល់ការប្រើប្រាស់ឱសថ ត្រូវតែមានការពិគ្រោះ និងយោងតាមវេជ្ជបញ្ជាពីគ្រូពេទ្យជំនាញដែលមានអាជ្ញាប័ណ្ណត្រឹមត្រូវ ដើម្បីធានាសុវត្ថិភាពអាយុជីវិត៕