វិវាទពាណិជ្ជកម្មគ្រឿងសមុទ្ររវាងថៃ និងម៉ាឡេស៊ី បានឈានដល់ដំណាក់កាលចរចាសម្របសម្រួលហើយ

បន្ទាប់ពីមានភាពតានតឹងដាក់គ្នាជាច្រើនសប្តាហ៍ វិវាទពាណិជ្ជកម្មគ្រឿងសមុទ្រដ៏ក្តៅគគុកផ្ដើមឡើងតាំងពីពាក់កណ្តាលឆ្នាំ២០២៦ នេះ រវាងប្រទេសជិតខាងទាំងពីរ គឺថៃ និងម៉ាឡេស៊ី ពេលនេះ បានឈានដល់ដំណាក់កាលចរចាសម្របសម្រួល និងរកឃើញពន្លឺដោះស្រាយវិញហើយ។

សូមរំឮកថា ជម្លោះនេះបានចាប់ផ្តើមឡើងបន្ទាប់ពីភាគីថៃបានរឹតបន្តឹងការពិនិត្យលើ «ត្រីឆ្ពង់» នាំចូលពីម៉ាឡេស៊ី ដោយសារបារម្ភពីរឿងសារធាតុគីមី។ ដើម្បីឆ្លើយតបវិញ ម៉ាឡេស៊ីក៏បានប្រកាសហាមឃាត់ការនាំចូលបង្គា ៥ប្រភេទពីប្រទេសថៃភ្លាមៗ ដោយយោងលើហេតុផលសុវត្ថិភាពចំណីអាហារដូចគ្នា ដែលធ្វើឱ្យវិស័យចិញ្ចឹមបង្គារបស់ថៃរង្គោះរង្គើ និងខាតបង់ប្រាក់រាប់លានដុល្លារ។

បើទោះជាយ៉ាងណា គិតត្រឹមដើមខែកក្កដា ឆ្នាំ២០២៦ នេះ ស្ថានភាពបានធូរស្រាលវិញហើយ បន្ទាប់ពីលោក សុរិយា ជឿងរុងរឿងគិត រដ្ឋមន្ត្រីក្រសួងកសិកម្មថៃ បានធ្វើដំណើរទៅកាន់ប្រទេសម៉ាឡេស៊ី ដើម្បីជួបពិភាក្សាផ្ទាល់ជាមួយលោក Datuk Seri Mohamad Sabu រដ្ឋមន្ត្រីក្រសួងកសិកម្ម និងសន្តិសុខស្បៀងរបស់ម៉ាឡេស៊ី។ ជាលទ្ធផល ភាគីទាំងពីរបានព្រមព្រៀងគ្នា ពន្លឿនការត្រួតពិនិត្យអនាម័យ និងសារធាតុសំណល់គីមីលើបង្គាថៃ ឱ្យចប់សព្វគ្រប់ក្នុងរយៈពេល ៣០ ថ្ងៃ ដើម្បីបើកផ្លូវឱ្យការនាំចេញ-នាំចូលបង្គា វិលត្រឡប់ទៅរកភាពប្រក្រតីឡើងវិញ។

ក្រៅពីការដោះស្រាយបញ្ហាបង្គា ថៃបានស្នើសុំបើកទីផ្សារនាំចេញផលិតផលធ្វើពីសាច់គោ និងសាច់ជ្រូក ទៅកាន់ប្រទេសម៉ាឡេស៊ី ខណៈម៉ាឡេស៊ីសន្យាថា នឹងជួយពន្លឿនដំណើរការអនុម័តផ្លូវច្បាប់ និងបទប្បញ្ញត្តិនានា ដើម្បីសម្រួលដល់ការនាំចូលផលិតផលធ្វើពីសាច់ទាំងពីរប្រភេទពីប្រទេសថៃឱ្យបានឆាប់រហ័ស។ ការឆ្លើយតបជាវិជ្ជមាននេះ ថៃរំពឹងថា នឹងអាចនាំចេញសាច់ជ្រូកទៅម៉ាឡេស៊ី ស្មើទឹកប្រាក់រហូតដល់ ៤,០០០លានបាត (ឬ ១២៨ លានដុល្លារ) ក្នុងឆ្នាំ២០២៦។

អ្នកវិភាគមើលឃើញថា ជម្លោះបង្គាថៃ និងម៉ាឡេស៊ីនេះ នឹងមិនឈានទៅដល់ការប្តឹងផ្តល់គ្នានៅតុលាការអន្តរជាតិឡើយ ដោយសារយន្តការចរចាទ្វេភាគីកំពុងដំណើរការទៅមុខយ៉ាងរលូន ដែលគេរំពឹងថា នឹងបើកទីផ្សារឡើងវិញក្នុងពេលឆាប់ៗខាងមុខ។ វាជាការបន្ធូរបន្ថយភាពតានតឹងផ្នែកពាណិជ្ជកម្ម និងជួយស្តារសេដ្ឋកិច្ចរបស់កសិករថៃ ជាពិសេស កសិករនៅភាគខាងត្បូង ព្រមទាំងរក្សាស្ថិរភាពការផ្គត់ផ្គង់ស្បៀងអាហារនៅប្រទេសម៉ាឡេស៊ីផងដែរ។

តើប្រិយមិត្តយល់យ៉ាងណាដែរ ចំពោះដំណោះស្រាយការទូតពាណិជ្ជកម្មរវាងប្រទេសទាំងពីរនេះ? សូមបញ្ចេញមតិនៅខាងក្រោម!