ថៃត្រៀមហោះទៅសុំម៉ាឡេស៊ីចរចាដោយផ្ទាល់ ដើម្បីដោះទាល់រឿងបង្គាស្អុ.យរលួ.យគ្មានអ្នកទិញ

ម្ដងជាពីរដង ដែលម៉ាឡេស៊ីចេះតែបដិសេធមិនព្រមបើកការចរចា ធ្វើឲ្យថៃខាតបង់ចំណូលរាប់លានដុល្លារ ឯបង្គារាប់តោនត្រូវកកស្ទះស្អុយរលួយគ្មានអ្នកទិញ បង្ខំចិត្តឱ្យរដ្ឋាភិបាលទីក្រុងបាងកកលែងអង្គុយមើលស្ងៀម ចាត់បញ្ជូនរដ្ឋមន្ត្រីក្រសួងកសិកម្មឲ្យហោះទៅកាន់ទីក្រុងគូឡាឡាំពួរ នៅថ្ងៃពុធខាងមុខនេះតែម្ដង ដើម្បីជួបពិភាក្សាការងារជាមួយភាគីម៉ាឡេស៊ី ក្នុងគោលបំណងដោះស្រាយជម្លោះពាណិជ្ជកម្មនេះឲ្យបានដាច់ស្រេច។

យោងតាមរបាយការណ៍ផ្លូវការដែលចុះផ្សាយដោយសារព័ត៌មានកសិកម្មថៃ Agrinewsthai កាលពីថ្ងៃទី២៩ ខែមិថុនា ឆ្នាំ២០២៦ នេះ លោក ស៊ូរីយ៉ា ជួងរុងរឿងឃីត (Suriya Juangroongruangkit) ឧបនាយករដ្ឋមន្ត្រីថៃ បានប្រកាសជាសាធារណៈថា ខ្លួននឹងហោះហើរទៅកាន់ប្រទេសម៉ាឡេស៊ីជាបន្ទាន់ ដើម្បីចូលជួបពិភាក្សាផ្ទាល់ជាមួយរដ្ឋមន្ត្រីក្រសួងកសិកម្មម៉ាឡេស៊ី។ យោងតាមប្រភពដដែល គោលបំណងចម្បងនៃការហោះទៅចរចាទាំងប្រញាប់ប្រញាល់នេះ គឺដើម្បីជជែកដេញដោលលើចំណុចចម្រូងចម្រាស់ និងស្នើសុំការដកបម្រាម លើការនាំចូលបង្កាថៃវិញឱ្យបានមុនថ្ងៃឱសានវាទចូលមកដល់។ លោក ស៊ូរីយ៉ា បានបង្ហាញជំនឿចិត្តយ៉ាងមុតមាំថា ជំនួបការទូតនេះនឹងអាចដោះស្រាយបញ្ហាបានប្រកបដោយផលប្រយោជន៍ឈ្នះ-ឈ្នះ (Win-Win) ទាំងសងខាង។

យោងតាមរបាយការណ៍បច្ចេកទេសពាណិជ្ជកម្ម មូលហេតុគន្លឹះដែលជម្រុញឱ្យម៉ាឡេស៊ីសម្រេចចិត្តបិទការនាំចូលបង្កាពីថៃ គឺដោយសារតែការរឹតបន្តឹងលើបទដ្ឋានស្តង់ដារអនាម័យ សុវត្ថិភាពចំណីអាហារ និងការត្រួតពិនិត្យជំងឺរាតត្បាតលើវារីវប្បកម្មដែលម៉ាឡេស៊ីរកឃើញថាមិនទាន់ឆ្លើយតបនឹងលក្ខខណ្ឌតម្រូវការថ្មី។ ការប្រកាសបិទទីផ្សារភ្លាមៗបែបនេះ បានធ្វើឱ្យរដ្ឋាភិបាលថៃក្តៅក្រហាយ និងខ្វល់ខ្វាយជាខ្លាំង ព្រោះម៉ាឡេស៊ីគឺជា «ម៉ូយធំ» និងជាទីផ្សារនាំចេញបង្កាដ៏សំខាន់បំផុតមួយរបស់ថៃ។ ប្រសិនបើបម្រាមនេះត្រូវអនុវត្តពិតប្រាកដមែន វានឹងធ្វើឱ្យប៉ះពាល់ដល់ជីវភាពរបស់ប្រជាកសិករចិញ្ចឹមបង្កាថៃរាប់ម៉ឺនគ្រួសារ និងខាតបង់ចំណូលជាតិយ៉ាងសន្ធឹកសន្ធាប់ត្រឹមមួយប៉ព្រិចភ្នែក ទើបតម្រូវឱ្យរដ្ឋាភិបាលថៃត្រូវចេញមុខមកដោះស្រាយទាំងតក់ក្រហល់បែបនេះ។

បេសកកម្មហោះហើរការទូតបន្ទាន់របស់លោក ស៊ូរីយ៉ា ទៅកាន់ប្រទេសម៉ាឡេស៊ីនាពេលនេះ បានឆ្លុះបញ្ចាំងយ៉ាងច្បាស់ពីសម្ពាធសេដ្ឋកិច្ចដ៏ធ្ងន់ធ្ងរដែលកំពុងជិះជាន់លើរដ្ឋាភិបាលថៃ។ នៅក្នុងយុគសម័យពាណិជ្ជកម្មសេរី សូម្បីតែបញ្ហាស្ដង់ដារអនាម័យកសិកម្ម ក៏អាចក្លាយជាអាវុធការទូតដ៏មានឥទ្ធិពលដែលអាចបង្ខំឱ្យមេដឹកនាំប្រទេសជិតខាង ត្រូវបន្ទន់ឥរិយាបថ និងប្រញាប់ប្រញាល់រត់ទៅចរចាសុំសម្រុះសម្រួលដើម្បីរក្សាឆ្នាំងបាយរបស់ប្រជាពលរដ្ឋខ្លួនឯងផងដែរ។ មហាជនកំពុងតែរង់ចាំអ៊ុតមើលយ៉ាងអន្ទះអន្ទែងថា តើលទ្ធផលនៃការចរចាបន្ទាន់នេះ នឹងអាចជួយឱ្យបង្កាថៃរួចផុតពីអន្ទាក់បិទផ្លូវពាណិជ្ជកម្មរបស់ម៉ាឡេស៊ីបានដែរឬយ៉ាងណា៕