ក្រុមហ៊ុនមេរបស់ CeraVe រងការប្ដឹ.ងផ្ដល់ករណីលាក់បាំងសារធាតុគីមីបង្កមហារីកនៅក្នុងផលិតផល

ផ្អើលពិភពលោក! ក្រុមហ៊ុនគ្រឿងសម្អាងខ្នាតយក្សរបស់បារាំង L’Oréal ដែលជាក្រុមហ៊ុនមេរបស់ប្រកាសនីយបត្រ CeraVe កំពុងតែប្រឈមមុខនឹងការប្តឹងផ្តល់តាមផ្លូវច្បាប់ជាបន្តបន្ទាប់ បន្ទាប់ពីការធ្វើតេស្តមន្ទីរពិសោធន៍បានរកឃើញសារធាតុគីមីបង្កជំងឺមហារីកនៅក្នុងផលិតផលលាងសម្អាតមុខរបស់ខ្លួន។ ព័ត៌មានដ៏គួឲ្យភ្ញាក់ផ្អើលនេះ បានក្លាយជាសញ្ញាអាសន្នដាស់តឿនដល់អ្នកប្រើប្រាស់រាប់លាននាក់ ជាពិសេសយុវវ័យដែលនិយមប្រើប្រាស់ផលិតផលនេះដើម្បីព្យាបាលមុន។

យោងតាមរបាយការណ៍ស៊ើបអង្កេតផ្លូវច្បាប់ បណ្តឹងសមូហភាពនេះបានផ្ទុះឡើងបន្ទាប់ពីមន្ទីរពិសោធន៍ឯករាជ្យ Valisure នៅសហរដ្ឋអាមេរិក បានធ្វើតេស្តស្វែងរកគុណភាព និងបានរកឃើញសារធាតុបង់សែន (Benzene) ក្នុងកម្រិតខ្ពស់ហួសការកំណត់ នៅក្នុងផលិតផលព្យាបាលមុនដែលមានផ្ទុកសារធាតុសកម្ម Benzoyl Peroxide (BPO)។ សារធាតុបង់សែន ត្រូវបានចាត់ថ្នាក់ជាផ្លូវការដោយស្ថាប័នសុខាភិបាលអន្តរជាតិថា ជាសារធាតុពុលដ៏កាចសាហាវដែលអាចបង្កឱ្យកើតជំងឺមហារីកគ្រាប់ឈាម (Leukemia) ចំពោះមនុស្ស។ ផលិតផលដៅចំមុខសញ្ញាដែលកំពុងរងបណ្តឹងនោះគឺ CeraVe Acne Foaming Cream Cleanser (ដែលមានផ្ទុកសារធាតុ Benzoyl Peroxide 4%)។

យោងតាមលទ្ធផលនៃការពិសោធន៍វិទ្យាសាស្ត្រ មូលហេតុដែលបង្កឱ្យមានគ្រោះថ្នាក់នេះ គឺកើតឡើងនៅពេលដែលផលិតផលលាងមុខនេះ ត្រូវបានរក្សាទុកក្នុងបរិស្ថានដែលមានសីតុណ្ហភាពក្តៅ (ដូចជាការទុកចោលក្នុងបន្ទប់ទឹកដែលមានចំហាយទឹកក្តៅ ឬការភ្លេចទុកនៅក្នុងរថយន្តក្រោមពន្លឺថ្ងៃ)។ នៅក្នុងលក្ខខណ្ឌបែបនេះ សារធាតុសកម្ម Benzoyl Peroxide នឹងចាប់ផ្ដើមរលាយបំបែកខ្លួនទៅជាសារធាតុពុល Benzene ក្នុងកម្រិតដ៏គ្រោះថ្នាក់ភ្លាមៗ។ ក្រុមអ្នកប្រើប្រាស់ដែលជាដើមបណ្តឹងបានចោទប្រកាន់ក្រុមហ៊ុន L’Oréal ពីបទខ្វះតម្លាភាព មិនបានព្រមានប្រាប់អតិថិជនពីហានិភ័យ និងការផ្សព្វផ្សាយពាណិជ្ជកម្មភូតភរថាផលិតផលរបស់ខ្លួនមានសុវត្ថិភាពខ្ពស់។

ជាការឆ្លើយតបជុំវិញការប្តឹងផ្តល់ដ៏ក្តៅគគុកនេះ ក្រុមហ៊ុន L’Oréal និងម៉ាក CeraVe បានចេញមុខការពារខ្លួនដោយទាត់ចោលការចោទប្រកាន់ទាំងឡាយ។ ក្រុមហ៊ុនបានអះអាងថា រាល់ផលិតផលទាំងអស់ត្រូវបានផលិតឡើងស្របតាមបទដ្ឋានស្តង់ដារសុវត្ថិភាពយ៉ាងតឹងរ៉ឹងបំផុតរបស់អាជ្ញាធរ ហើយការធ្វើតេស្តរបស់មន្ទីរពិសោធន៍ Valisure គឺធ្វើឡើងក្នុងស្ថានភាពសីតុណ្ហភាពជ្រុលហួសហេតុ ដែលខុសពីទម្លាប់នៃការប្រើប្រាស់ និងការរក្សាទុកផលិតផលពិតជាក់ស្តែងនៅក្នុងជីវភាពប្រចាំថ្ងៃរបស់មនុស្សទូទៅ។ ទោះជាយ៉ាងណា ករណីផ្លូវច្បាប់មួយនេះបាននិងកំពុងបង្កើតជាការព្រួយបារម្ភយ៉ាងខ្លាំងដល់អ្នកប្រើប្រាស់នៅក្នុងប្រទេសកម្ពុជាផងដែរ ដែលទាមទារឱ្យមានការប្រុងប្រយ័ត្នខ្ពស់ក្នុងការជ្រើសរើស និងរក្សាទុកផលិតផលថែរក្សាសម្រស់ឱ្យបានត្រឹមត្រូវបំផុត៕