កូរ៉េខាងត្បូងស្នើលោក Donald Trump ជួយសម្របសម្រួលសន្តិភាព និងចរចាការទូតជាមួយកូរ៉េខាងជើង

ទីក្រុង Evian-les-Bains៖ នៅក្នុងជំនួបពិភាក្សាដ៏ខ្លីមួយអំឡុងពេលថតរូបរួមគ្នាក្នុងកិច្ចប្រជុំកំពូល G7 នាប្រទេសបារាំង កាលពីថ្ងៃទី១៦ ខែមិថុនា ឆ្នាំ២០២៦ ប្រធានាធិបតីកូរ៉េខាងត្បូង លោក Lee Jae Myung បានបោះដៃស្នើសុំជំនួយផ្ទាល់ពីប្រធានាធិបតីអាមេរិក លោក Donald Trump ឱ្យជួយបំពេញតួនាទីជាអ្នកសម្របសម្រួលការទូត ដើម្បីដោះស្រាយជម្លោះដោយសន្តិវិធី និងកាត់បន្ថយស្ថានការណ៍តានតឹងជាមួយកូរ៉េខាងជើង។

ចាប់តាំងពីឡើងកាន់តំណែងក្នុងឆ្នាំ២០២៥ មក លោកប្រធានាធិបតី Lee បានងាកមកប្រើប្រាស់នយោបាយទន់ភ្លន់ក្នុងការស្តារទំនាក់ទំនងជាមួយទីក្រុងព្យុងយ៉ាងឡើងវិញ។ លោកបានស្នើឱ្យលោក Trump ប្រើប្រាស់ឥទ្ធិពល និងវិធីសាស្ត្រការទូតដោះស្រាយបញ្ហាឧបទ្វីបកូរ៉េ ដូចដែលលោកធ្លាប់បានខិតខំប្រឹងប្រែងបញ្ចប់សង្គ្រាមនៅតំបន់មជ្ឈិមបូព៌ា និងតំបន់ដទៃទៀតដែរ។ គួររំឭកថា លោក Trump មានប្រវត្តិធ្លាប់ជួបពិភាក្សាផ្ទាល់ជាមួយមេដឹកនាំកូរ៉េខាងជើង លោក Kim Jong Un ចំនួន ៣លើករួចមកហើយក្នុងអាណត្តិទី១ របស់លោក (នៅសិង្ហបុរី ហាណូយ និងតំបន់គ្មានយោធា DMZ) ហើយលោកក៏បានបង្ហាញការចាប់អារម្មណ៍ចង់ជួបលោក Kim ម្តងទៀតនាពេលខាងមុខផងដែរ។

ជាការឆ្លើយតប លោក Donald Trump បានសាកសួរអំពីស្ថានភាពទំនាក់ទំនងបច្ចុប្បន្នរវាងកូរ៉េទាំងពីរ និងបានសម្តែងការយល់ព្រមទទួលជួយចរចាការទូតតាមសំណើរបស់កូរ៉េខាងត្បូង។

ទោះជាយ៉ាងណាក៏ដោយ អ្នកវិភាគបានមើលឃើញថា ឱកាសនៃការចរចាការទូតនេះនៅតែមានភាពស្រពិចស្រពិលខ្លាំង ដោយសារបច្ចុប្បន្នកូរ៉េខាងជើងបានបដិសេធការចរចា ចាត់ទុកកូរ៉េខាងត្បូងជាសត្រូវ បន្តផលិតអាវុធនុយក្លេអ៊ែរ និងកំពុងពង្រឹងសម្ព័ន្ធភាពយោធាយ៉ាងជិតស្និទ្ធជាមួយរុស្ស៊ី និងចិន។ ស្របពេលជាមួយគ្នានេះ នៅក្នុងសេចក្តីថ្លែងការណ៍រួមក្រោយកិច្ចប្រជុំ មេដឹកនាំនៃក្រុមប្រទេស G7 ក៏បានបង្ហាញការព្រួយបារម្ភយ៉ាងខ្លាំងចំពោះកម្មវិធីអាវុធនុយក្លេអ៊ែររបស់កូរ៉េខាងជើង និងបានបញ្ជាក់ជាថ្មីពីការប្តេជ្ញាចិត្តលុបបំបាត់អាវុធទាំងនេះឱ្យអស់ពីឧបទ្វីបកូរ៉េ ស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិផងដែរ៕