តារាសម្តែងនិងចម្រៀង គៀត សុវណ្ណាឡាង បានឃ្លាតឆ្ងាយពីវិស័យភាពយន្តអស់រយៈពេលជាយូរមកហើយ ខណៈតារាស្រីរូបនេះបានកាក់កបនឹងមុខរបរលក់កាហ្វេថង់។ ថ្មីៗនេះទស្សនិកជនបានចាប់អារម្មណ៍ជាពិសេសបន្ទាប់ពីឃើញ សុវណ្ណាឡាង វិលមកអាជីពវិញនិងបង្ហាញខ្លួនតាមរយៈភាពយន្តមួយជាមួយនឹងតារាវ័យក្មេង ម៉ានីកា។
ដ្បិតថាមិនសូវលេចមុខច្រើនដូចមុននៅក្នុងកម្មវិធីសិល្បៈតែគៀត សុវណ្ណាឡាង នៅតែជាទីចាប់អារម្មណ៍របស់មហាជនដដែលពីព្រោះតារាចម្រៀងនិងសម្តែងរូបនេះមានឈ្មោះបោះសំឡេងលើអាជីព ជាពិសេសប្រសិនជាបានលេចមុខលើគម្រោងណាមួយរូបនាងតែងតែជាតួអង្គឯកឬតួអង្គសំខាន់ជានិច្ច។ 
ជាក់ស្តែងបន្ទាប់ពីខកខានសម្តែងក្នុងខ្សែភាពយន្តយ៉ាងយូរពេលនេះ សុវណ្ណាឡាង បានបង្ហាញខ្លួនក្នុងគម្រោងថ្មីមានចំណងជើងថា « ម្តាយមរណមាតា»។ ខ្សែភាពយន្តមួយនេះគឺឆ្លុះបញ្ចាំងពីភាពផិតក្បត់ ធ្វើឱ្យគ្រួសារមួយរស់នៅក្នុងទុក្ខវេទនា ពីខ្សែជីវិតរបស់ កុល កេសី ដែលដកស្រង់ចេញពីអក្សរសិល្ប៍ «មរណៈមាតា»។ មានអ្នកគាំទ្រមួយចំនួនបានបង្ហាញការរំភើបចិត្តរបស់ពួកគេដែលឃើញវត្តមានរបស់ គៀត សុវណ្ណាឡាង ខណៈរូបនាងបានបាត់មុខពីការសម្តែងជាយូរហើយ។
ក្នុងការសម្តែងកន្លងមក គៀត សុវណ្ណាឡាង ទទួលបានមតិវិជ្ជមានច្រើនចំពោះការសម្តែងរបស់នាង ខណៈតារាសម្តែងវ័យក្មេង ម៉ានីកា វិញត្រូវបានមហាជនចាត់ទុកថាសិល្បការិនីវ័យក្មេងដ៏មានទេពកោសល្យហើយការសម្តែងរបស់យុវតីរូបនេះតែងតែទទួលបានការសរសើរមិនដាច់ពីមាត់៕
