Nchive ធ្វើឱ្យអ្នកគាំទ្ររំភើបក្រោយនៅតែរក្សាប៊ិចដែលមានរូបប្រាសាទអង្គរវត្ត

ក្រុមចម្រៀង Nchive បានធ្វើឱ្យអ្នកគាំទ្រចាប់អារម្មណ៍ភ្លាមៗបន្ទាប់ពីឃើញសមាជិកក្នុងក្រុមនៅតែរក្សាប៊ិចដែលអ្នកគាំទ្របានផ្តល់ជាអំណោយជាពិសេសគឺប៊ិចមានរូបប្រាសាទអង្គរវត្តរបស់អ្នកគាំទ្រកម្ពុជា។

អ្នកគាំទ្រវិស័យ Kpop ជ្រាបមកហើយថាក្រុមចម្រៀង Nchive មានទំនាក់ទំនងយ៉ាងជិតស្និទ្ធជាមួយនឹងអ្នកគាំទ្រកម្ពុជាបន្ទាប់ពីក្រុមនេះធ្លាប់មកប្រទេសកម្ពុជាចំនួនពីរដង។ ទោះបីជា Nchive វិលទៅប្រទេសកំណើតវិញប៉ុន្តែសមាជិកនីមួយៗតែងតែផ្សារភ្ជាប់ជាមួយនឹងអ្នកគាំទ្រតាមរយៈបណ្តាញសង្គមដូចជាការ Live ជាដើម។ លើសពីនេះទៅទៀតពាក្យខ្មែរមួយចំនួនក្រុមនេះនៅតែចងចាំពុំទាន់ភ្លេចឡើយ។

នាពេលថ្មីៗនេះ អ្នកលេងបណ្តាញសង្គមទិកតុកមានការចាប់អារម្មណ៍ជាពិសេសបន្ទាប់ពីសមាជិកពីររូបគឺ HA.L និង N បាន Live នៅលើបណ្តាញសង្គម Instagram បង្ហាញប៊ិចជាច្រើនដែលទទួលបានពីអ្នកគាំទ្រ។ មួយក្នុងចំណោមនោះគឺប៊ិចដែលមានរូបប្រាសាទអង្គរវត្តដែលសមាជិកក្រុមចម្រៀង Nchive នៅតែដាក់តាមជាប់ខ្លួនជានិច្ច។ អ្នកគាំទ្រកម្ពុជាច្រើនរូបបានបង្ហាញការសប្បាយចិត្តនិងរំភើបចំពោះទឹកចិត្តរបស់ក្រុមចម្រៀង Kpop នេះដែលនៅតែនឹកនិងស្រលាញ់ប្រទេសកម្ពុជា។

គួរឱ្យដឹងថា តាមការប្រកាសចុងក្រោយរបស់ Nchive ពួកគេនឹងធ្វើដំណើរប្រគំតន្រ្តីទេសចរណ៍ពិភពលោកហើយនៅក្នុងនោះទេប្រទេសនៅក្នុងតំបន់អាស៊ី ក៏មានប្រទេសកម្ពុជាផងដែរ ដូច្នេះអ្នកគាំទ្រនឹងបានជួបក្រុមនេះម្តងទៀត។ ទោះយ៉ាងណាសម្រាប់កាលបរិច្ឆេទប្រគំតន្រ្តីជាក់លាក់ Nchive ពុំទាន់បញ្ជាក់នោះទេ។

ក្នុងដំណើរដែល Nchive មកប្រទេសកម្ពុជាចំនួនពីរដងមកហើយគេពុំទាន់ឃើញក្រុមនេះបានទស្សនាខេត្តសៀមរាបនៅឡើយទេ ខណៈអ្នកគាំទ្រជាច្រើនចង់ឱ្យក្រុមចម្រៀងនេះមានឱកាសទៅកម្សាន្តនៅទីនោះដើម្បីបានឃើញសម្បត្តិបេតិកភណ្ឌពិភពលោកដ៏អស្ចារ្យរបស់ប្រទេសកម្ពុជា៕