រដ្ឋាភិបាលសិង្ហបុរីបានចាប់ផ្តើមអនុវត្តគម្រោង «ប័ណ្ណទូទាត់ចំណាយ CDC» ដោយចែកប្រាក់ជូនពលរដ្ឋចំនួន ៥០០ ដុល្លារសិង្ហបុរីក្នុងមួយគ្រួសារ (ប្រហែល ៣៨៨ ដុល្លារអាមេរិក) ចាប់ពីថ្ងៃទី១១ ខែមិថុនា ឆ្នាំ២០២៦ តទៅ។ ការចែកនេះធ្វើឡើងលឿនជាងការគ្រោងទុក ដែលដំបូងឡើយ គ្រោងនឹងធ្វើឡើងនៅខែមករា ឆ្នាំ២០២៧។ មូលហេតុនៃការផ្ដល់ជូនមុនការកំណត់នេះ គឺដើម្បីជួយសម្រាលបន្ទុកចំណាយប្រចាំថ្ងៃរបស់ពលរដ្ឋ ស្របពេលដែលតម្លៃទំនិញ និងប្រេងឥន្ធនៈបានហក់ឡើងខ្ពស់ ដោយសារឥទ្ធិពលនៃសង្គ្រា.មនៅតំបន់មជ្ឈិមបូព៌ា។.jpg)
ការចែកប័ណ្ណទូទាត់ចំណាយ (CDC Vouchers) នេះ គឺជាផ្នែកមួយនៃកញ្ចប់ថវិការដ្ឋឆ្នាំ២០២៦ ដែលរដ្ឋាភិបាលត្រូវចំណាយប្រាក់សរុបជាង ៧០០ លានដុល្លារសិង្ហបុរី ដើម្បីគាំទ្រដល់គ្រួសារប្រជាពលរដ្ឋជាង ១ លានគ្រួសារ។ ប័ណ្ណឧបត្ថម្ភនេះ មានសុពលភាពប្រើប្រាស់រយៈពេលវែង រហូតដល់ថ្ងៃទី៣១ ខែធ្នូ ឆ្នាំ២០២៧។
ចំពោះលក្ខខណ្ឌនៃការប្រើប្រាស់ទឹកប្រាក់ក្នុងប័ណ្ណនេះ ត្រូវបានបែងចែកជាពីរចំណែកស្មើគ្នា៖
-៥០% ទីមួយ៖ ពលរដ្ឋអាចយកទៅទិញទំនិញ ឬចាយវាយនៅតាមហាងលក់អាហារតាមចិញ្ចើមផ្លូវ (Hawker Centres) និងហាងនៅតាមសហគមន៍ទីប្រជុំជន ដែលបានចូលរួមក្នុងគម្រោងជាមួយរដ្ឋាភិបាល សរុបជាង ២៤,០០០ កន្លែង។
-៥០% ទីពីរ៖ សម្រាប់ប្រើប្រាស់ទិញទំនិញ និងតម្រូវការចាំបាច់នានា នៅតាមបណ្តាផ្សារទំនើប (Supermarkets) ដែលកំណត់។
.jpg)
លោក Gan Kim Yong ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរី បានមានប្រសាសន៍ថា ប្រទេសសិង្ហបុរីបាននិងកំពុងរងផលប៉ះពាល់ពីវិបត្តិសង្គ្រាមនៅមជ្ឈិមបូព៌ា ដែលតម្រូវឱ្យរដ្ឋាភិបាលត្រូវមានការប្រុងប្រយ័ត្នខ្ពស់ចំពោះបម្រែបម្រួលនៃស្ថានការណ៍ពិភពលោក។ លោកបានសង្កត់ធ្ងន់ថា ពលរដ្ឋកំពុងប្រឈមនឹងការចំណាយខ្ពស់លើទំនិញ និងប្រេងឥន្ធនៈ ហើយរដ្ឋាភិបាលនឹងត្រៀមលក្ខណៈចាត់វិធានការជួយឧបត្ថម្ភបន្ថែមទៀត ប្រសិនបើស្ថានការណ៍ចាំបាច់។
គួររំឭកផងដែរថា ការអនុវត្តគម្រោងប័ណ្ណ CDC កាលពីពេលកន្លងទៅ ទទួលបានជោគជ័យ និងផ្តល់ផលប្រយោជន៍យ៉ាងខ្លាំង ដោយពលរដ្ឋបានប្រើប្រាស់ប័ណ្ណនេះរហូតដល់ ៨០.១% នៅតាមហាងអាហារ ហាងសហគមន៍ និងផ្សារទំនើប។ គេរំពឹងថា ការទម្លាក់កញ្ចប់ថវិកាលើកនេះ នឹងជួយសម្រាលទុក្ខលំបាករបស់ប្រជាពលរដ្ឋបានចំគោលដៅ ក្នុងស្ថានភាពសេដ្ឋកិច្ចសកលដែលកំពុងប្រឈមនឹងភាពមិនប្រាកដប្រជានេះ៕
