ថ្មីៗនេះនៅលើបណ្តាញសង្គមមានការជជែកវែកញែកយ៉ាងច្រើនទាក់ទងនឹងមាតិកានៅលើបណ្តាញសង្គមបន្ទាប់ពីគ្រូពេទ្យម្នាក់សម្រេចចិត្តលុបវីដេអូខ្លួនចោល។ ជុំវិញរឿងនេះ អ្នកដឹកនាំវីដេអូចម្រៀងក្នុងផលិតកម្មរស្មីហង្សមាសលោក Ecovak Song បានលើកឡើងទាក់ទងនឹងអ្នកបង្កើតមាតិកាម្នាក់ដែលតែងតែប្រើពាក្យអសុរោះ មិនសមរម្យ ខណៈលោកជំរុញកុំឱ្យមានវីដេអូបែបនេះនៅលើបណ្តាញសង្គមតទៅទៀតនិងស្នើឱ្យក្រសួងមានវិធានការ។
នៅរសៀលថ្ងៃទី៣ ខែមិថុនា លោក Ecovak Song បានបង្ហោះវីដេអូមួយដោយបានដាក់ចំណងជើងថា «គួរកុំមានអី មាតិកាពាក្យអសុរោះបែបនេះ សង្ឃឹមថាប្អូននិងកែប្រែអ្វីដែលបងរិះគន់ស្ថាបនា អរគុណ»។ នៅក្នុងវីដេអូអ្នកដឹកនាំរឿងរូបនេះបានបង្ហាញពីអ្នកធ្វើវីដេអូម្នាក់បានប្រើពាក្យអសុរោះមិនសមរម្យហើយលោកមិនដឹងថាអ្នកធ្វើវីដេអូនេះល្បីដោយសារតែការជេរបញ្ចោរឬយ៉ាងណានោះទេ ហើយម្ចាស់ផលិតផលដែលហៅប្រម៉ូតនោះលក់ដាច់ដោយសារតែការជេរឬយ៉ាងណាដែរ។
លោក Ecovak Song លើកឡើងទៀតថាម្ចាស់ផលិតផលដែលល្អ លក់ដាច់ គួររកអ្នកធ្វើមាតិកាណាដែលល្អៗពុំគួរយកអ្នកប្រម៉ូតដែលប្រើភាសាចំអេសចំអាសនោះទេដោយសារតែបច្ចុប្បន្នក្មេងៗអាយុជាង១០ឆ្នាំគឺមានទូរសព្ទប្រើហើយដូច្នេះការប្រើពាក្យសម្តីមិនសមរម្យគឺពិតជាអាក្រក់ស្តាប់ខ្លាំងណាស់។ លោកបន្ថែមទៀតថា អ្នកធ្វើមាតិកាដែលប្រើពាក្យមិនសមរម្យទាំងនេះនៅពេលមានអ្នកទស្សនាច្រើននឹងធ្វើឱ្យរូបគេមានមោទនភាពដោយបន្តធ្វើមាតិកាប្រើពាក្យមិនសមរម្យទាំងនេះទៀត។
ការចេញមកនិយាយទៅកាន់អ្នកបង្កើតមាតិកាម្នាក់នេះលោក Ecovak Song អះអាងថាមិនមានបំណងអាក្រក់ណាមួយឡើយប៉ុន្តែលោកចង់ស្ថាបនា ចង់ឱ្យកែប្រែ កុំឱ្យប្រើពាក្យអសុរោះចំអេសចំអាសទោះបីជាការនិយាយនោះមិនមែនជាការឈ្លោះគ្នាជាមួយនរណា និយាយដាក់ខ្លួនឯងក៏ដោយ។ 
លើសពីនេះទៅទៀតអ្នកដឹកនាំរឿងរូបនេះបានសំណូមពរទៅកាន់ក្រសួងពាក់ព័ន្ធចាត់វិធានការកុំឱ្យមានមាតិកាបែបនេះតទៅទៀតដើម្បីកុំឱ្យមានភាសាមិនសមរម្យប្រម៉ូតផលិតផល ហើយម្ចាស់ផលិតផលទៀតសោតគួរជ្រើសរើសអ្នកធ្វើមាតិកាណាមានសុជីវធម៌ មានការអប់រំបែបល្អៗ៕
