ថៃចាប់ផ្ដើមបង្កើនសកម្មភាពយោធា ក្រោយកម្ពុជាប្រើប្រាស់វិធានការចាប់បង្ខំឲ្យដោះស្រាយបញ្ហាដែនសមុទ្រ

ល្បិចទាល់ច្រកមានតែប៉ុណ្ណឹង! ឲ្យតែមិនចង់ប្រឈមមុខនឹងការដោះស្រាយបែបពហុភាគី ថៃដឹងតែរកលេសបង្ករឿង បញ្ឆេះភាពតានតឹងតាមព្រំដែនហើយ។ ជាក់ស្ដែងស្ថានភាពថ្មីៗនេះ ភាគីថៃបានបង្កើនសកម្មភាពយោធាយ៉ាងគំហុក និងបានប្រើប្រាស់ប្រព័ន្ធផ្សព្វផ្សាយដើម្បីចោទប្រកាន់មកលើកម្ពុជា បន្ទាប់ពីរាជរដ្ឋាភិបាលកម្ពុជា បានសម្រេចចិត្តដើរជើងចុកតាមផ្លូវច្បាប់អន្តរជាតិ ដោយប្រើប្រាស់យន្តការផ្សះផ្សាដោយបង្ខំ ក្រោមច្បាប់សមុទ្រ UNCLOS ដើម្បីដោះស្រាយវិវាទដែនសមុទ្រ។

យោងតាមរបាយការណ៍ព័ត៌មានពីភាគីកម្ពុជា បានឱ្យដឹងថា កងកម្លាំងប្រដាប់អាវុធថៃបាននិងកំពុងបន្តធ្វើសកម្មភាពឈូសឆាយដី រាយលួសបន្លា និងដាក់ពង្រាយរថពាសដែកនៅតាមចំណុចក្តៅៗមួយចំនួននៅតាមព្រំដែនគោក ដូចជានៅតំបន់ប្រាសាទព្រះវិហារ បុស្សស្បូវ-ជាំតែ និងច្រកទ្វារអន្តរជាតិថ្មដា ខេត្តពោធិ៍សាត់។ លើសពីនេះ កងទ័ពភូមិន្ទថៃបានបញ្ជាក់ពីការកើតឡើងនូវការតតាំង និងប្រឈមមុខដាក់គ្នាដោយអាវុធ (Standoff) រវាងទាហានថៃ និងទាហានកម្ពុជា នៅច្រកបុក (Chong Bok) ស្រុកណាំយឿន ខេត្តអ៊ុបំប៊ុនរាជធានី ថែមទៀតផង។

ក្រៅពីការចល័តទ័ពនៅលើដីជាក់ស្តែង យោធាថៃក៏បានបើកការវាយប្រហារតាមរយៈសង្រ្គាមព័ត៌មានផងដែរ។ មេបញ្ជាការយោធាថៃបានប្រើប្រាស់ប្រព័ន្ធផ្សព្វផ្សាយ និងរូបភាពវីដេអូ ដើម្បីចោទប្រកាន់កងទ័ពកម្ពុជាថា បានព្យាយាមចូលមករារាំង និងបង្អាក់ប្រតិបត្តិការជើងគោករបស់ទាហានថៃ នៅក្នុងទឹកដីដែលថៃអះអាងថាជាអធិបតេយ្យភាពរបស់ខ្លួន។ ជាមួយគ្នានេះ អ្នកនាំពាក្យកងទ័ពជើងគោកថៃ លោកឧត្តមសេនីយ៍ទោ Winthai Suvaree បានចេញមុខការពារសកម្មភាពទាហានថៃ និងបានអំពាវនាវឱ្យប្រជាពលរដ្ឋថៃប្រុងប្រយ័ត្នចំពោះឃ្លីបវីដេអូដែលបានចែកចាយនៅលើបណ្តាញសង្គម ដោយចោទប្រកាន់ថាវាជាការញុះញង់ពីខាងកម្ពុជា។

អ្នកវិភាគបានមើលឃើញថា សកម្មភាពយោធារបស់ថៃនាពេលចុងក្រោយនេះ គឺជាការប៉ុនប៉ងកែប្រែស្ថានការណ៍ជាក់ស្តែងនៅលើដី ដើម្បីបង្កើតជាសម្ពាធនយោបាយសង្កត់កម្ពុជា ឱ្យលះបង់ចោលយន្តការច្បាប់អន្តរជាតិ ហើយវិលត្រឡប់ទៅរកការចរចាទ្វេភាគីដែលថៃមានប្រៀបជាងវិញ ដូចដែលលោករដ្ឋមន្ត្រីការបរទេសថៃ Sihasak Phuangketkeow បានទទូចសុំកាលពីព្រឹកមិញនេះ។

ឆ្លើយតបទៅនឹងការបង្កហេតុនេះ ក្រសួងការបរទេសកម្ពុជាបានចេញសេចក្តីថ្លែងការណ៍តវ៉ាយ៉ាងខ្លាំងក្លាបំផុត ដោយបដិសេធរាល់ការប៉ុនប៉ងរបស់ថៃក្នុងការបង្កើត «ការកាន់កាប់លើដីជាក់ស្តែង» និងការវាយកម្ទេចហេដ្ឋារចនាសម្ព័ន្ធស៊ីវិល។ កម្ពុជាបានព្រមានភាគីថៃចំៗថា កម្ពុជានឹងមិនទទួលស្គាល់ដាច់ខាត នូវរាល់ការកែប្រែខ្សែបន្ទាត់ព្រំដែនទាំងឡាយណា ដែលកើតចេញពីការប្រើប្រាស់កម្លាំងយោធា ឬការគំរាមកំហែង ហើយទទូចឱ្យថៃគោរពតាមសន្ធិសញ្ញាបារាំង-សៀម និងច្បាប់អន្តរជាតិ ដើម្បីចៀសវាងការផ្ទុះអាវុធទ្រង់ទ្រាយធំ៕