ចិនបានបញ្ជូននាវាផ្ទុកយន្តហោះ «Liaoning» និងកងនាវាអមដំណើរជាច្រើនគ្រឿងទៅធ្វើសមយុទ្ធយោធានៅមហាសមុទ្រប៉ាស៊ីហ្វិក ភាគខាងកើតប្រទេសហ្វីលីពីន ចាប់ពីថ្ងៃទី២៦ ដល់ថ្ងៃទី២៨ ខែឧសភា ឆ្នាំ២០២៦ ដោយមានការហោះឡើង-ចុះរបស់យន្តហោះ និងឧទ្ធម្ភាគចក្រ រហូតដល់ជាង១៧០ដង ដើម្បីពង្រឹងសមត្ថភាពប្រ.យុទ្ធរបស់កងទ័ព ។ ការធ្វើសមយុទ្ធយោធាទ្រង់ទ្រាយនេះ ត្រូវបានជប៉ុន និងតៃវ៉ាន់តាមដានយ៉ាងដិតដល់ ស្របពេលស្ថានការណ៍តានតឹងកើតឡើងក្នុងតំបន់ ។.jpg)
តាមការប្រកាសរបស់ក្រសួងការពារជាតិជប៉ុនកាលពីថ្ងៃទី១ ខែមិថុនា កងកម្លាំងការពារដែនសមុទ្រជប៉ុនបានឃើញនាវាផ្ទុកយន្តហោះចិន «Liaoning» និងកងនាវាអមដំណើរជាច្រើនគ្រឿងរួមគ្នាធ្វើសមយុទ្ធយោធាយ៉ាងសកម្មនៅខាងកើតកោះ Luzon ប្រទេសហ្វីលីពីន ដោយយន្តហោះ និងឧទ្ធម្ភាគចក្រលើនាវា បានហោះឡើងចុះរហូតដល់ជាង១៧០ដង ។ លើសពីនេះ កងនាវាចិនបានបម្លាស់ទីមកកៀកនឹងភាគអាគ្នេយ៍កោះមិយ៉ាកូជិម៉ា ខេត្តអូគិណាវ៉ា ប្រទេសជប៉ុនទៀតផង ដែលមានគម្លាតពីគ្នាប្រមាណ៥៩០គីឡូម៉ែត្រ ។.jpg)
ក្រសួងការពារជាតិជប៉ុនប្រកាសទៀតថា កាលពីថ្ងៃទី២៩ ខែឧសភា កន្លងមក នាវាផ្ទុកយន្តហោះរបស់ចិននេះបានបន្តបម្លាស់ទីនៅតាមបណ្តោយឆ្នេរសមុទ្រប្រទេសហ្វីលីពីន ប៉ុន្តែមិនបញ្ជាក់ច្បាស់លាស់អំពីនាវាបម្លាស់ទីទៅកាន់គោលដៅណាទេ ។
ចំណែកក្រសួងការពារជាតិរបស់តៃវ៉ាន់ ក៏បានតាមដានការធ្វើសមយុទ្ធយោធា និងការបម្លាស់ទីរបស់នាវាផ្ទុកយន្តហោះចិនយ៉ាងយកចិត្តទុកដាក់ដូចគ្នាដែរ និងបញ្ជាក់ថា កាលពីខែមេសា នាវាផ្ទុកយន្តហោះដដែលនេះបានធ្វើដំណើរឆ្លងកាត់ច្រកសមុទ្រតៃវ៉ាន់ជាលើកដំបូង បើគិតតាំងពីខែធ្នូ ឆ្នាំ២០២៥ ។ 
គួរបញ្ជាក់ថា ការធ្វើសមយុទ្ធយោធាជាញឹកញាប់របស់ចិននារយៈពេលចុងក្រោយនេះ ត្រូវបានគេមើលឃើញថា គឺជាការឆ្លើយតបទៅនឹងការរឹតចំណងសន្តិសុខកាន់តែស្អិតរមួតរវាងសហរដ្ឋអាមេរិក ជប៉ុន និងហ្វីលីពីន ជាពិសេស បន្ទាប់ពីការបញ្ចប់សមយុទ្ធរួមគ្នាទ្រង់ទ្រាយធំ «Balikatan 2026» កាលពីពេលថ្មីៗកន្លងទៅ ៕
