ប្រាសាទស្តុកកក់ធំ ទីតម្កល់សិលាចារឹក​វែងជាងគេ ដែលបាត់បង់ទៅឱ្យសៀម

ប្រាសាទស្ដុកកក់ធំ គឺជាប្រាសាទខ្មែរបុរាណដែលមាសិលាចារឹកដែលវែងជាងគេ និងបានផ្តល់ទិន្នន័យជាច្រើន ជាងគេ ដល់ប្រវត្តិវិទូក្នុងការសិក្សាចងក្រងប្រវត្តិសាស្ត្រខ្មែរនៅសម័យមហានគរ។

សិលាចារឹកនេះ មាន៣៤០បន្ទាត់ ចារនៅក្នុងឆ្នាំ ១០៥២គស. ជាពីរភាសា គឺភាសាសំស្ក្រឹត និងភាសាខ្មែរ ដែលរៀបរាប់អំពីព្រះនាមរបស់ព្រះមហាក្សត្រខ្មែរ ដែលបានសោយរាជ្យជាបន្តបន្ទាប់គ្នា អស់រយៈកាលជាង ២៥០ឆ្នាំ ពោលគឺចាប់ពីព្រះបាទជ័យវរ្ម័នទី២ រហូតដល់រាជ្យព្រះបាទឧទ័យាទិត្យវរ្ម័នទី២។

បច្ចុប្បន្ន សិលាចារឹកនេះ ត្រូវបានថៃយកទៅដាក់តាំងនៅសារមន្ទីរជាតិក្រុងបាងកក។

ប្រាសាទដ៏ស្រស់ស្អាតនេះ ត្រូវបានបាត់បង់ និងធ្លាក់ទៅក្នុងការគ្រប់គ្រងរបស់សៀមនៅ អំឡុងឆ្នាំ១៤៣១ បន្ទាប់ពីការដួលរលំនៃមហានគរ។

គួរបញ្ជាក់ថា ប្រាសាទស្ដុកកក់ធំ ស្ថិតនៅក្នុងស្រុកគោកសិង្ហ ខេត្តស្រះកែវ ប្រទេសសៀមដែលមានចម្ងាយប្រមាណ ២ គីឡូម៉ែត្រពីព្រំដែនខ្មែរ-សៀមជាប់ជាមួយខេត្តបន្ទាយមានជ័យ៕