នៅលើបណ្តាញសង្គមមានរឿងជាច្រើនបានកើតឡើង រឿងខ្លះក៏ជារឿងល្អរឿងខ្លះក៏ជារឿងអាក្រក់ដែលចំណុចនេះវានឹងជះឥទ្ធិពលច្រើនឬតិចទៅកាន់អ្នកដែលទស្សនា។ ដោយសារតែសីលធម៌សង្គមធ្លាក់ចុះជាលំដាប់មានរឿងថ្មីៗកើតឡើងជារៀងរាល់ថ្ងៃ ឌីជេ ក្តិប ចង់ណែនាំតម្រង់ទិសកុំឱ្យប្រព្រឹត្តអំពើឆ្គាំងឆ្គង ប៉ុន្តែត្រូវអក់ខានវិញដោយសារតែកំហុសអតីតកាលដ៏ធ្ងន់របស់ខ្លួន។
ថ្មីៗនេះ ឌីជេ ក្តិប បានបង្ហោះរូបភាពមួយសន្លឹក អមដោយខ្លឹមសារថា «សីលធម៌ធ្លាក់ចុះ តើគួរបន្ទោស កំហុសអ្នកណា ពេលមនុស្សថ្លៃថ្នូរ ធ្វើរឿងបាតផ្សារ ឃើញហើយអនិច្ចារ
ឱរ៉ា!ផ្សារខ្លោច»។ លោកបន្តទៀតថា «ដោយសារតែខ្លួនធ្លាប់ធ្វើខុសធ្ងន់ ទើបមិនហ៊ានណែនាំអ្នកណាច្រើនទេខ្លាចគេដៀលក្បាលថារហាមទេកុំចេះលូកមាត់ ។
ឌីជេ ក្តិប បន្ថែមដោយផ្តាំថា «កំហុសកាលពីក្មេងអាចធ្វើឱ្យយើង សើចពេលចាស់ព្រោះមិនដឹងខ្យល់អីទើបធ្វើខុស។ ប៉ុន្តែបើកំហុសពេលដែលខ្លួនចាស់ចេះដឹងនិងយល់សព្វគ្រប់ហើយ នៅតែបំពាន គឺវានឹងធ្វើឱ្យអ្នកថោកអស់១ជីវិត តកូន តចៅ និង តជំនាន់» ។
សំណេររបស់ ឌីជេ ក្តិប ក្នុងន័យដាស់តឿនស្មារតីកុំឱ្យកំហុសអតីតកាលបំផ្លាញអនាគត បានជំរុញឱ្យអ្នកលេងបណ្តាញសង្គមជាច្រើនបង្ហាញការយល់ស្របទៅនឹងការលើកឡើងរបស់លោក។ មនុស្សមួយចំនួនក៏បានបញ្ចេញមតិក្រោយការបង្ហោះរបស់ ឌីជេ ក្តិប ដែរថាដឹងខ្លួនធ្វើខុសហើយចេះកែខ្លួនគឺជារឿងល្អ ប៉ុន្តែបើដឹងថាខ្លួនធ្វើខុសហើយនៅតែប្រព្រឹត្តដដែលៗមិនចេះកែខ្លួន នោះទើបជាកំហុសដ៏ធំដែលនាំឱ្យមានវិប្បដិសារីនៅថ្ងៃណាមួយ។
ជាក់ស្តែងកាលពីអតីតកាលដោយសារតែពាក្យចង់សាក ចង់ដឹង ឌីជេ ក្តិប បានផុងខ្លួននឹងគ្រឿងញៀន ទោះបីជាលោកបានកែខ្លួនប៉ុន្តែកំហុសដ៏ធំនេះនៅតែមានជាប់ខ្លួន ទោះបីជាលោកចង់ណែនាំអ្នកដទៃក៏ពិបាកដូចជាសំណេររបស់លោកខាងលើនេះជាដើម៕
