ជុំវិញជ.ម្លោះនៅលើអនឡាញ លីម តិចម៉េង ស្រាប់តែពោលពាក្យនេះឡើងមក

រយៈពេលប៉ុន្មានថ្ងៃចុងក្រោយថ្មីៗនេះសហគមន៍អនឡាញពោរពេញដោយភាពវឹកវរជុំវិញជម្លោះអ្នកលក់អនឡាញហើយរឿងនេះកាន់តែរីករាលដាលធំទៅៗដែលមានមនុស្សរាប់ម៉ឺននាក់ចូលរួមទស្សនាការ Live តំណាលគ្នា ការចែករំលែកបន្ត (Share ) និងបញ្ចេញមតិ(Comment ) ព្រោងព្រាត។ ជុំវិញភាពរឿងរ៉ាវដ៏កក្រើកនាពាក់កណ្តាលឆ្នាំ២០២៦ នេះ តារាចម្រៀង លីម តិចម៉េង ដែលយកចិត្តទុកដាក់ចំពោះប្រទេសជាតិបានចេញមកបង្ហោះសំណេរមួយនៅលើបណ្តាញសង្គមក្នុងន័យដាស់តឿនស្មារតីសាធារណជន។

ម្ចាស់ពាន Cambodian Idol រដូវកាលទី៤ បានបង្ហោះសំណេរនៅលើបណ្តាញសង្គមនាយប់ថ្ងៃទី១៩ ឧសភា ថា «សង្ឃឹមថាពុកម៉ែ បងប្អូន មិនបានទុកអោយរឿង ប្រទេសជាតិ រឿងបងប្អូនយើងដែលនៅតាមតំបន់ប្រឈមទាំងអស់ ត្រូវឯកា ! ស្រុកទេសយើងនៅមិនទាន់បានសុខស្រួលបួល នៅឡើយនោះទេ ! 24/07/25 – 19/05/26»។

សំណេររបស់ លីម តិចម៉េង បានជំរុញឱ្យអ្នកលេងបណ្តាញសង្គមជាច្រើនបញ្ចេញមតិថាពួកគេមិនភ្លេចនោះទេ ទាំងការឈឺចាប់និងផលលំបាករបស់បងប្អូនភៀសសឹក និងកន្លែងដែលថៃឈ្លានពានយកទៅទាំងខុសច្បាប់។ អ្នកខ្លះក៏បង្ហាញពីភាពរអ៊ូរទាំងដោយសារតែអូសហ្វេកប៊ុកឃើញមានការឈ្លោះប្រកែកគ្នាខ្លាំងជាងរឿងប្រទេសជាតិ ខណៈមនុស្សមួយចំនួនតាមដានគេមានជម្លោះនឹងគ្នាច្រើនជាងតាមដានរឿងផ្សេងទៀត។

គួរឱ្យដឹងថាតារាចម្រៀង លីម តិចម៉េង ត្រូវបានមហាជនមើលឃើញថាលោកជាអ្នកសិល្បៈមួយរូបដែលជាញឹកញយបានបង្ហាញការឈឺឆ្អាលចំពោះប្រទេសជាតិ និងទទួលបានការស្រលាញ់ពីអ្នកគាំទ្រ។

ក្នុងពេលមានជម្លោះក្តៅគគុកនៅតាមបន្ទាត់ព្រំដែន តិចម៉េង និងមិត្តភក្តិផ្សេងទៀតបានរួមរួបសាមគ្គីគ្នាជួយជាស្បៀងនិងថវិកាជួយសម្រាលទុក្ខទាហានជួរមុខនិងបងប្អូននៅតាមបន្ទាត់ព្រំដែន។ ទោះបីជាស្ថានការណ៍បច្ចុប្បន្នពុំក្តៅគគុកដូចមុន តារាចម្រៀងរូបនេះបានបង្ហោះសារដាស់តឿន ការពហិការទំនិញថៃរួមទាំងការឈឺចាប់ដែលថៃធ្វើដាក់មកលើប្រទេសកម្ពុជា៕