ស៊ីន យូប៊ីន រងមតិ.ប្រតិកម្មចម្រុះក្រោយប្រកាសដំណើរការផេកឡើងវិញ

តារាសម្តែង ស៊ីន យូប៊ីន បានប្រកាសដំណើរការបណ្តាញសង្គមហ្វេកប៊ុកឡើងវិញហើយបន្ទាប់ពីទទួលបានការជ្រោមជ្រែងពីអ្នកជំនាញ។ ទោះយ៉ាងណា ការប្រកាសនេះ យូប៊ីន ត្រូវរងនូវមតិប្រតិកម្មចម្រុះពីសាធារណជនដោយអ្នកគាំទ្រមួយចំនួនក៏បានអបអរសាទរ ចំណែកឯមតិខ្លះទៀតក៏បានរិះគន់ដោយសារតែបង្ហោះជាភាសាអង់គ្លេស។

ប្រិយមិត្តអ្នកតាមដានវិស័យសិល្បៈជ្រាបមកហើយថាហ្វេកប៊ុកផេករបស់តារាសម្តែង ស៊ីន យូប៊ីន បានផ្អាកដំណើរការជាយូរហើយ ហើយរឿងនេះក៏បានធ្វើឱ្យនាងរងនូវរឿងអាស្រូវធំក្នុងអាជីពសិល្បៈរបស់ខ្លួនក្នុងពេលមានជម្លោះព្រំដែន។ ផ្អាកពីបណ្តាញសង្គមហ្វេកប៊ុកដោយផ្តោតលើការបង្ហោះនៅលើអ៊ីនស្រ្តាក្រាម និងទិកតុក ធ្វើឱ្យសកម្មភាពរបស់ ស៊ីន យូប៊ីន ពុំសូវជាមានសកម្មភាពខ្លាំងក្លាដូចមុននោះទេពីព្រោះប្រជាជនខ្មែរផ្តោតខ្លាំងនៅលើហ្វេកប៊ុក។
ក្នុងពេលដែលផេកផ្លូវការដែលមានអ្នកតាមរាប់ម៉ឺននាក់ តារាសម្តែង ស៊ីន យូប៊ីន ធ្លាប់បានប្រកាសនាពេលកន្លងមកថាប្រសិនជាមិនអាចដំណើរការផេករបស់ខ្លួនឡើងវិញបាននោះទេនាងនឹងបង្កើតថ្មីឡើយទោះបីជាគ្មានបណ្តាញសង្គមហ្វេកប៊ុកក៏ដោយ ក៏មិនធ្វើឱ្យប៉ះពាល់ការងារនាងដែរ។

យ៉ាងណាមិញ បន្ទាប់ពីជុសជុលអស់រយៈពេលជាច្រើនខែ នាល្ងាចថ្ងៃទី១៤ ខែឧសភា ឆ្នាំ២០២៦ តារាសម្តែង ស៊ីន យូប៊ីន បានប្រកាសដំណើរការផេករបស់ខ្លួនវិញហើយ។ តារាសម្តែងរូបនេះបានជូនដំណឹងជាភាសាអង់គ្លេសដោយបញ្ជាក់ថានាងអាចចូលមើលផេករបស់នាងបានហើយបន្ទាប់ពីក្រុមហ៊ុនហ្វេកប៊ុក ប្លុកផេកតាំងពីខែមិថុនា ឆ្នាំ២០២៥។ យូប៊ីន បានសម្តែងការដឹងគុណចំពោះស្ថាប័នពាក់ព័ន្ធទាំងអស់ដែលបានជួយនាងពេញមួយដំណើរការនេះ។ យូប៊ីន ក៏មិនភ្លេចដឹងគុណអ្នកគាំទ្រដែលនៅតែជឿជាក់លើនាង ហើយនាងនឹងចែករំលែកជាមួយអ្នកគាំទ្រនៅលើបណ្តាញសង្គមហ្វេកប៊ុកចាប់ពីពេលនេះតទៅ។

ការប្រកាសរបស់ ស៊ីន យូប៊ីន ក្នុងការដំណើរការផេកនេះបានជំរុញឱ្យមានមតិប្រតិកម្មចម្រុះពីអ្នកលេងអ៊ីនធឺណិត។ អ្នកគាំទ្របានសម្តែងការអបអរសាទរចំពោះដំណឹងល្អនេះដែលនាងអាចយកផេកមកវិញបាន។ យ៉ាងណាមិញក៏មានមតិមួយចំនួននៅតែបន្តរិះគន់តារាស្រីរូបនេះដដែល។

អ្នករិះគន់បានលើកឡើងថា ពេលសង្គ្រាមស្ងប់បន្តិចបានហ្វេកប៊ុកប្រើបានវិញប្រហែលជាជិតមានកម្មវិធីអីត្រូវការឱ្យប្រជាជនខ្មែរគាំទ្រ។ អ្នកផ្សេងទៀតបានរិះគន់នាងដោយសារតែការប្រើប្រាស់ភាសាអង់គ្លេស ដោយពួកគេលើកឡើងថាគួរសរសេរខ្មែរពីលើនិងចាំដាក់ភាសាអង់គ្លេសនៅពីខាងក្រោម៕