ថ្មីៗនេះមានដំណឹងចរាចរនៅលើបណ្តាញសង្គមថាស្ថានីយទូរទស្សន៍ PNN នឹងត្រូវបិទទ្វារចាប់ពីថ្ងៃទី១ ខែឧសភា ឆ្នាំ២០២៦ នេះតទៅប៉ុន្តែសេចក្តីប្រកាសផ្លូវការពុំទាន់បានប្រកាសនៅឡើយទេ។ ស្របពេលជាមួយគ្នានេះគេបានឃើញពិធីការិនី ពេជ្រ ច័ន្ទធីតា និង ពិធីករ ប៉ែន ចំរុង បានបង្ហោះលាក្រុមការងារនៅ PNN ទាំងក្តីអាល័យ។.png)
កញ្ញា ពេជ្រ ច័ន្ទធីតា បានបង្ហោះវីដេអូមួយកាលពីយប់ថ្ងៃទី ២៨ ខែមេសា ឆ្នាំ២០២៦ ដោយភ្ជាប់មកជាមួយនឹងខ្លឹមសារថា «លាទាំងសោកស្តាយ! ដំបូលដែលបានផ្តល់នូវភាពកក់ក្តៅ កេរ្តិ៍ឈ្មោះ ភាពល្បាញល្បី តាំងពីនៅខ្ចី រហូតមកដល់ពេលនេះ ជិត៧ឆ្នាំ ខ្ញុំបានដុះខាត់ជំនាញជាពិធីការនី មានឱកាសកាន់កម្មវិធីកម្សាន្តជាច្រើន បងប្អូនចាប់ផ្តើមស្គាល់កាន់តែច្បាស់ ក៏ដោយសារផ្ទះដ៏ធំមួយនេះ»។
នៅក្នុងវីដេអូនេះ ពេជ្រ ច័ន្ទធីតា បានបង្ហាញថាខ្លួនស្អប់ពាក្យថា «បែក» ជាទីបំផុតមិនថាតែរឿងស្នេហាឬការងារនោះទេ ដោយពិធីការិនីរូបនេះបានបញ្ជាក់ថាការថតថ្ងៃនោះគឺជាថ្ងៃចុងក្រោយរបស់នាងនិងក្រុមការងារ ព្រមទាំងបញ្ជាក់ទៀតថា PNN គឺជាគ្រួសារទី២របស់នាង។ ពេជ្រ ច័ន្ទធីតា ដែលដុះពន្លកចេញពីគ្រូបង្រៀននិងជាអតីតបេក្ខនារីកម្មវិធីប្រលងចម្រៀង Cambodian Idol បានធ្វើឱ្យទស្សនិកជនស្គាល់ថានាងជាពិធីការិនីមួយរូបដែលកាន់កម្មវិធីកម្សាន្តពេញនិយមមួយចំនួនក្នុងស្ថានីយទូរទស្សន៍មួយនេះ។
ងាកមកកាន់លោក ប៉ែន ចំរ៉ុង វិញក៏មិនខុសគ្នាប៉ុន្មាននោះទេលោកបានបង្ហាញការសោកស្តាយនិងលាទាំងក្តីអាល័យជាមួយនឹងក្រុមការងារ។ ពិធីកររូបនេះបានសរសេរនៅលើបណ្តាញសង្គមរបស់ខ្លួនថា «ខ្ញុំសូមមគោរពអរគុណថ្នាក់ដឹកនាំគ្រប់ជាន់ថ្នាក់និងក្រុមការងារទាំងអស់របស់ PNN ដែលតែងតែផ្តល់ក្តីស្រលាញ់អាណិតគិតគូរផ្តល់ឱកាសការងារដល់ខ្ញុំ និងចំណីអារម្មណ៍ដល់អ្នកទស្សនិកជន កន្លងមក។ សង្ឃឹមថានឹងមានឱកាសវិលជួបគ្នាទៀតណា សូមលាទាំងក្តីអាលោះអាល័យបំផុត »។
លោក ប៉ែន ចំរ៉ុង ក៏បានបង្ហាញដែរថាថ្ងៃថតនោះគឺជាថ្ងៃចុងក្រោយនៃការថតកម្មវិធីបន្ទាប់ពីបានបំរើការងារនៅទីនេះអស់រយៈពេល១០ឆ្នាំ ដែលទទួលបានការទុកចិត្តនិងឱ្យតម្លៃពីថ្នាក់ដឹកនាំ។ ពិធីកររូបនេះបានឱបលាក្រុមការងារស្ទើរតែគ្រប់ផ្នែកទាំងអស់ដោយសេចក្តីអាល័យជាមួយនឹងក្តីសង្ឃឹមថាថ្ងៃណាមួយនឹងបានជួបក្រុមការងារម្តងទៀត៕
