ជនជាតិចិនច្រើននាក់នាំគ្នាតវ៉ាបិទផ្លូវមុខធនាគារជាតិ ដើម្បីទាមទារដកប្រាក់ពីធនាគារ “ហួយវ័ន”

កកស្ទះចរាចរណ៍អស់រាប់ម៉ោង! ជនជាតិចិនជាច្រេីននាក់ផ្ទុះការតវ៉ាបិទផ្លូវនៅមុខធនាគារជាតិ ដោយទាមទារឲ្យជួយដោះស្រាយពាក់ព័ន្ធនឹងធនាគារ Huione & H Pay ដេីម្បីដោះស្រាយយកលុយពួកគាត់មកវិញ។ ហេតុការណ៍នេះបានបង្កការភ្ញាក់ផ្អេីលជាខ្លាំង កាលពីរសៀល ថ្ងៃទី២៤ ខែមេសា ឆ្នាំ២០២៦ ស្ថិតនៅតាមបណ្ដោយផ្លូវហាណូយ សង្កាត់គោកឃ្លាង ខណ្ឌសែនសុខ រាជធានីភ្នំពេញ។

យោងតាមការសាកសួរពីប្រភពដែលបានដឹងអំពីមូលហេតុនៃការតវ៉ានេះបានឲ្យដឹងថា ជនជាតិចិនទាំងនេះគឺជាធតិថិជនរបស់ធនាគារ Huione & H Pay ដែលត្រូវបានធនាគារជាតិនៃកម្ពុជាដកអាជ្ញាបណ្ណធ្វើប្រតិបត្ដិការ ជុំវិញសកម្មភាព ចរាចរ ទិញ លក់ ឬទូទាត់ទ្រព្យសកម្មគ្រីបតូ ដែលមិនត្រឹមត្រូវ។ ការប្រមូលផ្ដុំគ្នាតវ៉ារបស់ជនជាតិចិនទាំងនេះ ធ្វើឡើងដើម្បីស្នើសុំអន្តរាគមន៍ពីធនាគារជាតិដកប្រាក់ត្រឡប់វិញ

ក្រោយកេីតហេតុ កម្លាំងសមត្ថកិច្ចជំនាញខណ្ឌ បានចុះទៅដល់ទីតាំងខាងលេី និងបានឲ្យជនជាតិចិនទាំងនោះ ធ្វេីការបេីកផ្លូវឡេីងវិញផងដែរ។

គួររំលឹកឡើងវិញផងដែរថា ធានាគារ ហួយវ័ន ផេ (HUIONE PAY PLC. ) ត្រូវបានធនាគារជាតិនៃកម្ពុជា ដកហូតអាជ្ញាបណ្ណលែងឲ្យបន្តប្រតិបត្តិការនៅកម្ពុជា តាំងពីថ្ងៃទី២៥ ខែកញ្ញា ឆ្នាំ២០២៤ ហើយបានបញ្ជាក់ថា ក្រុមហ៊ុននេះបានបំពេញនីតិវិធីជម្រះបញ្ជី និងបញ្ចប់កាតព្វកិច្ចស្របច្បាប់រួចរាល់។ ក្នុងន័យនេះរាល់កាតព្វកិច្ចទូទាត់ជូនម្ចាស់បំណុល(ដែលក្នុងនោះរួមមានអតិថិជនផងដែរ)របស់គ្រឹះស្ថាននេះ ត្រូវបានបំពេញចប់សព្វគ្រប់រួចរាល់ស្របតាមនីតិវិធីច្បាប់។

តែទោះជាយ៉ាងណាក៏ដោយ ធនាគារជាតិបានក្រើនរំឭកឱ្យសាធារណជន និងគ្រប់គ្រឹះស្ថានធនាគារ និងហិរញ្ញវត្ថុ មេត្តាមានស្មារតីប្រុងប្រយ័ត្នខ្ពស់ចំពោះការធ្វើប្រតិបត្តិការពាក់ព័ន្ធនឹងទ្រព្យសកម្មគ្រីបតូទាំងនេះ ដ្បិតថា មកទល់ពេលបច្ចុប្បន្ន មិនទាន់មានគ្រឹះស្ថានធនាគារ និងហិរញ្ញវត្ថុណាមួយ ដែលទទួលបានការអនុញ្ញាតពីធនាគារជាតិនៃកម្ពុជា ក្នុងការផ្ដល់សេវាពាក់ព័ន្ធ នឹងទ្រព្យសកម្មគ្រីបតូនោះនៅឡើយទេ៕