អ៊ីរ៉ង់ បញ្ជាក់ថាខ្លួនគ្មានផែនការចរចាជាមួយសហរដ្ឋអាមេរិកបន្ថែមទៀតឡើយ

សង្រ្គា.មទម្លាក់គ្រាប់បែ.ក និងការបំផ្លោងមីស៊ីលដ៏ខ្លាំងក្លាទំនងជាមិនអាចគេចផុតពីកើតមានម្ដងទៀតនោះទេ ដ្បិតក្តីសង្ឃឹមថ្មីៗសម្រាប់យន្តការការទូតរវាងអ៊ីរ៉ង់ និងសហរដ្ឋអាមេរិកត្រូវបានទាត់ចោលសារជាថ្មី ដោយទីក្រុងតេហេរ៉ង់ បានបង្ហាញថាខ្លួនមិនមានផែនការភ្លាមៗសម្រាប់ការចរចាបន្ថែមទៀតជាមួយទីក្រុងវ៉ាស៊ីនតោនឡើយ។ នេះបើយោងតាមពាក្យសម្ដីរបស់រដ្ឋមន្រ្តីការបរទេសអ៊ីរ៉ង់។

យោងតាមរបាយការណ៍ពីប្រព័ន្ធផ្សព្វផ្សាយរដ្ឋអ៊ីរ៉ង់ដែលដកស្រង់ដោយ Reuters ការរំពឹងទុកសម្រាប់ការចរចាជុំទីពីរហាក់ដូចជាមានកម្រិតទាបខ្លាំង ពីព្រោះទីក្រុងតេអេរ៉ង់មើលឃើញការទាមទាររបស់សហរដ្ឋអាមេរិកថា មានកម្រិត “ហួសប្រមាណ និងមិនសមហេតុផល”។ មន្ត្រីអ៊ីរ៉ង់ក៏បានរិះគន់អ្វីដែលពួកគេបានពិពណ៌នាថាជាការផ្លាស់ប្តូរជំហររបស់សហរដ្ឋអាមេរិក និងសារផ្ទុយគ្នា។

ឥរិយាបថនេះ ប្រៀបដូចជាការទះសហរដ្ឋអាមេរិកមួយកំភ្លៀង ព្រោះកាលពីថ្មីៗនេះលោកប្រធានាធិបតី ដូណាល់ត្រាំ ទើបតែបានប្រកាសថា មន្ត្រីអាមេរិកកំពុងរៀបចំសម្រាប់កិច្ចចរចាជុំថ្មីមួយទៀតនៅទីក្រុងអ៊ីស្លាម៉ាបាដ ក្នុងប្រទេសប៉ាគីស្ថាន ដែលមានគោលបំណងទប់ស្កាត់ជម្លោះ ប៉ុន្តែមន្រ្តីអ៊ីរ៉ង់បែរជាត្រូវបានគេរាយការណ៍ថា នឹងមិនចូលរួមកិច្ចប្រជុំនេះជាមួយអាមេរិកឡើយ។

ក្រោយទទួលរងការបំបាក់មុខយ៉ាងដូច្នេះ លោក ត្រាំ បានបង្ហោះសារគំរាមកំហែងដ៏គួរឲ្យព្រឺព្រួច ជាមួយនឹងការព្រ.មានចំៗថាអាមេរិក នឹងបំផ្លា.ញរោងចក្រថាមពល និងស្ពានទាំងអស់របស់អ៊ីរ៉ង់ ប្រសិនបើពួកគេបដិសេធសំណើររបស់សហរដ្ឋអាមេរិកបែបនេះ។

ឧបសគ្គការទូតទាំងនេះ កំពុងបន្តរឹតបន្តឹងផ្លូវសមុទ្រ និងដាក់សម្ពាធយ៉ាងខ្លាំងលើកប៉ាល់ជាច្រើនដែលកំពុង និងបម្រុងធ្វើដំណើរឆ្លងងកាត់ច្រកសមុទ្រហ័រមូស ដោយអ៊ីរ៉ង់អះអាងថា សម្ពាធនេះនឹងបន្តរំខានរហូតធ្វើឱ្យខូចទំនុកចិត្តដល់ការសន្ទនានានា។ ទន្ទឹមនឹងនេះ សហរដ្ឋអាមេរិកបានជំរុញឱ្យអ៊ីរ៉ង់បើកផ្លូវដឹកជញ្ជូនឡើងវិញ ដើម្បីបំពេញតម្រូវការសន្តិសុខឲ្យកាន់តែទូលំទូលាយ។

ទោះបីជានៅមានការខ្វែងគំនិតគ្នាយ៉ាងណាក៏ដោយ ប៉ុន្តែប្រធានាធិបតីអ៊ីរ៉ង់លោក Masoud Pezeshkian ក៏បាននិយាយផងដែរថា ការទូតនៅតែមានសារៈសំខាន់ ខណៈពេលដែលសង្កត់ធ្ងន់លើការមិនទុកចិត្តយ៉ាងខ្លាំងចំពោះទីក្រុងវ៉ាស៊ីនតោន។ អ្នកវិភាគនិយាយថា វោហាសាស្រ្តនោះមានន័យថា ការចរចាគឺជាតម្រូវការចាំបាច់ ប៉ុន្តែសម្រាប់ពេលនេះ ភាគីទាំងពីរហាក់ដូចជាកំពុងជាប់គាំងក្នុងភាពមិនប្រាកដប្រជាមួយ ខណៈទីផ្សារប្រេងសកលកំពុងតាមដានយ៉ាងដិតដល់៕