អ្នកគាំទ្រភ្ញាក់ផ្អើលក្រោយឃើញ G-Dragon ចុច Like វីដេអូរបស់ N.John

មួយក្តារនេះ N.John បានធ្វើឱ្យតារា K-Pop ជាច្រើនចាប់អារម្មណ៍លោកយ៉ាងខ្លាំងដោយមានសមាជិកក្រុមល្បីៗជាច្រើនបានរាំនិងចាប់អារម្មណ៍បទ «Pop Out»។ អ្វីដែលធ្វើឱ្យអ្នកគាំទ្របើកភ្នែកធំៗនោះគឺ តារាចម្រៀង G-Dragon មេក្រុម BIGBANG និងមានឈ្មោះថាជា King of K-Pop បានចុច Like វីដេអូរបស់ N.John ជាច្រើនវីដេអូ។

នៅយប់ថ្ងៃទី៨ ខែមេសា អ្នកគាំទ្រកម្ពុជាជាពិសេសគឺ VIP តែម្តងបានចាប់អារម្មណ៍សកម្មភាពរបស់ G-Dragon ដោយឃើញគណនី Instagram ពិតប្រាកដរបស់តារាចម្រៀងល្បីឈ្មោះរូបនេះបានចុច Like វីដេអូរបស់ N.John រាំបទ «Pop Out»។ នៅក្នុងវិស័យ K-pop តារាល្បីៗត្រូវប្រុងប្រយ័ត្ននៅពេលប្រើប្រាស់ប្រព័ន្ធផ្សព្វផ្សាយសង្គម ព្រោះប៊ូតុង follow ឬ like ណាមួយអាចត្រូវបានពិភាក្សា និងស្មានទុកជាមុន។

នេះអាចបញ្ជាក់ថា G-Dragon ពិតជាគិតពិចារណាបានច្បាស់មុននឹងលោកចុច Like ឬអាចមានន័យថាលោកពេញចិត្តយ៉ាងខ្លាំងសម្រាប់បទចម្រៀងរបស់ «Pop Out» ទើបបានជា Like ជាច្រើនវីដេអូបែបនេះ។សកម្មភាពរបស់ G-Dragon នេះដែរបានជំរុញឱ្យមានអ្នកគាំទ្រជាច្រើនពិតជាចង់ឃើញតារាចម្រៀងល្បីឈ្មោះរូបនេះអាចរាំបទ «Pop Out» របស់ N.John ដូចគ្នា។

គួរឱ្យដឹងថាតារា kpop ដែលបានរាំនិងចាប់អារម្មណ៍បទ «Pop Out» របស់ N.John មានដូច ជា Ahyeon សមាជិក BABYMONSTER , Kino សមាជិក Pentagon , Leo និង Sangwon សមាជិក Alpha Drive One (ALD1), Yuchan និង Juyoung សមាជិក Nchive , Niki សមាជិក Enhypenនិងសមាជិកពីររូបនៃក្រុម TREASURE បានស្តាប់និងចាក់បទនេះនៅក្នុង Live។

«Pop out» ជាបទនៅក្នុងអាល់ប៊ុម LA LA LAND ដែលបានចេញផ្សាយជាផ្លូវការនៅថ្ងៃទី២០ ខែវិច្ឆិកា ឆ្នាំ២០២៥។ សន្ទុះការគាំទ្រ ជាពិសេសនៅពេលឃើញតារា Kpop ដ៏ល្បីៗរាំនិងចាប់អារម្មណ៍បទចម្រៀងនេះកាន់តែធ្វើឱ្យទស្សនិកជនចាប់អារម្មណ៍ N.John ថែមមួយកម្រិតទៀត៕