មហាជនមិនអស់ចិត្តចំពោះការបំភ្លឺរបស់សមត្ថកិច្ច ជុំវិញករណីរថយន្តបុ.កក្មេងនៅខណ្ឌឬស្សីកែវ

មហាជនជាច្រើនបានសម្ដែងបង្ហាញការខកចិត្ត និងមិនអស់ចិត្តជាខ្លាំង ក្រោយសមត្ថកិច្ចបានចេញសេចក្ដីបំភ្លឺថា អ្នកបើកបររថយន្តដែលបង្កគ្រោះថ្នាក់ចរាចរណ៍កាលពីយប់ថ្ងៃទី១៨ ខែមីនា ឆ្នាំ២០២៦ បណ្តាលឲ្យក្មេងប្រុស០១នាក់រងរបួសធ្ងន់នៅខណ្ឌឫស្សីកែវ គឺជាស្រ្តីដែលទៅជាមួយគ្នា និងមិនមែនជាកូនប្រុសរបស់អភិបាលស្រុកកងមាសដែលស្ថិតក្នុងស្ថានភាពស្រវឹងនោះទេ។ ការណ៍នេះបានជំរុញឲ្យមនុស្សជាច្រើនទាមទាររកភ័ស្តុតាងដើម្បីមកបញ្ជាក់បន្ថែមថាអ្នកណាជាអ្នកបើកបរឲ្យប្រាកដ។

យោងតាមការបង្ហោះរបស់ផេក ស្នងការដ្ឋាននគរបាលរាជធានីភ្នំពេញ កាលពីល្ងាចថ្ងៃសុក្រ ទី២០ ខែមីនា បានឲ្យដឹងពីការបំភ្លឺរបស់ភាគីរថយន្តបង្ក ដែលបានឆ្លើយចំពោះមុខសមត្ថកិច្ចយ៉ាងដូច្នេះថា អ្នកបើកបររថយន្តបង្កគឺជាស្រ្តីដែលរួមដំណើរជាមួយគ្នា ចេញពីហាងមួយកន្លែងក្នុងខណ្ឌសែនសុខ។ មិនតែប៉ុណ្ណោះ ស្នងការដ្ឋាននគរបាលរាជធានីភ្នំពេញ ក៏បានបង្ហាញរូបភាពពីកាម៉េរ៉ា ដែលបញ្ជាក់ថា កូនប្រុសអភិបាលស្រុកកងមាស មិនមែនជាអ្នកបើកឡានផងដែរ។

ជាមួយគ្នានេះដែរ លោកឧត្តមសេនីយ៍ឯក ជួន ណារិន្ទ អគ្គស្នងការរង ស្នងការនគរបាលរាជធានីភ្នំពេញ បានធ្វើការបញ្ជាក់ថា នៅពេលចេញពីកន្លែងផឹកស៊ីមួយនៅខណ្ឌសែនសុខ គឺកូនអភិបាលស្រុក ត្រូវគេគ្រាដាក់ឡាន ហើយស្រ្តីដែលទៅជាមួយគ្នា ជាអ្នកចូលបើកឡាន រួចក៏បានបង្កគ្រោះថ្នាក់បុកក្មេងប្រុសបណ្តាលឲ្យរបួសធ្ងន់ នៅខណ្ឌឬស្សីកែវ កាលពីយប់ថ្ងៃទី១៨ ខែមីនា ឆ្នាំ២០២៦។

គួរជម្រាបថា ទោះបីសមត្ថកិច្ចនគរបាលរាជធានីភ្នំពេញបានបំភ្លឺដោយដកស្រង់ចម្លើយរបស់ស្រ្តីដែលទៅជាមួយឈ្មោះ សាមីន វុត្ថារឹទ្ធ ថាខ្លួនជាអ្នកបើកបរបង្ករគ្រោះថ្នាក់ក៏ដោយ ប៉ុន្តែមហាជនហាក់មិនអស់ចិត្ត និងមិនជឿលលើការបំភ្លឺនេះឡើយ ហើយយទាមទារអោយសមត្ថកិច្ច ឆែកកាម៉េរ៉ាសុវត្ថិភាពនៅទីកន្លែងដែលរថយន្តបង្ករឈប់ តើពេលចុះពីដៃចង្កូតខាងឆ្វេងក្រោយកើតហេតុនៅពេលនោះ ជាមនុស្សប្រុស ឬមនុស្សស្រីជាអ្នកបើកឲ្យប្រាកដ ?

បន្ថែមលើនេះ មហាជនក៏មិនអាចទទួលយកនូវរូបភាពដែលស្នងការដ្ឋាននគរបាលរាជធានីភ្នំពេញបានបង្ហាញដើម្បីធ្វើជាសំអាងថាកូនប្រុសរបស់អភិបាលស្រុកកងមាស ត្រឹមតែជាអ្នករួមដំណើរផងដែរ ព្រោះគេបានកត់សម្គាល់ពីចំណុចដែលមិនស៊ីគ្នាជាច្រើន ពិសេសត្រង់ពណ៌ខោរបស់លោកនៅក្នុងរូបនោះ មិនដូចគ្នាជាមួយខោនៅពេលកើតហេតុភ្លាមៗ។

តែទោះជាយ៉ាងណាក៏ដោយ សមត្ថកិច្ចនគរបាលរាជធានី បានបញ្ជាក់អះអាងរួចហេីយថា សមត្ថកិច្ចនឹងខិតខំស្រាវជ្រាវបន្ថែមទៀតអោយបានសុក្រឹតត្រឹមត្រូវដេីម្បីរកការពិតរកយុត្តិធម៌ជូនជនរងគ្រោះ ។ ជាមួយគ្នានេះដែរ មហាជនទាំងអស់បានបង្ហាញក្ដីសង្ឃឹមថា សមត្ថកិច្ចនគរបាលចរាចរណ៍រាជធានីភ្នំពេញ នឹងស៊ើបអង្កេតលើសំណុំរឿងឲ្យបានលម្អិត និងលាតត្រដាងការពិតដោយបើកចំហរ ដោយមិនមានអ្វីលាក់បាំងនៅពីក្រោយខ្នងឡើយ៕