សុតធីតា និង ផាត់ធីយ៉ា ត្រៀមប៉ះគ្នាក្នុងវិស័យបវរកញ្ញា

ទីបំផុតការទទូចរបស់អ្នកគាំទ្របានសម្រេចដោយជោគជ័យហើយបន្ទាប់ពី ប៉ូគីមថេង សុតធីតា បង្ហើបថានាងនឹងចូលរួមប្រកួតប្រជែងម្តងទៀតក្នុងវិស័យបវរកញ្ញាតាមរយៈកម្មវិធី Miss Cosmo Cambodia 2026។ មិនត្រឹមតែប៉ុណ្ណោះក៏មានដំណឹងលេចធ្លាយមកថា ភូ ផាត់ធីយ៉ា នឹងចូលរួមប្រកួតដូចគ្នា។ នេះមានន័យថាអ្នកទាំងពីរនឹងត្រូវប្រកួតប្រជែងលើឆាកតែមួយ។

ប៉ូគីមថេង សុតធីតា គឺជាបវរកញ្ញាម្នាក់ដែលត្រូវបានអ្នកមួយចំនួនថាកម្សត់ជាងគេជាងឯងពីព្រោះការតំណាងប្រទេសរបស់នាងស្ថិតក្នុងសម័យកាលកូវីដ។ ធីតា មានប្រវត្តិជាប់លំដាប់រងទី៣ Miss Universe Cambodia 2019 និងចូលរួមប្រកួត Miss Asia Pacific International 2019 តំណាងឱ្យប្រទេសកម្ពុជា។ ក្រោយមកក្នុងឆ្នាំ២០២១ ប៉ូគីមថេង សុតធីតា បានក្លាយជាម្ចាស់មកុដ Miss Grand Cambodia 2021 និងឈានជើងចូលចំណាត់ថ្នាក់ TOP10 នៅលើឆាកអន្តរជាតិ។

អស់រយៈពេលជាច្រើនឆ្នាំ សុតធីតា បានបន្តសកម្មភាពសិល្បៈរបស់ខ្លួន ប៉ុន្តែពុំបានបោះជំហានចូលប្រឡូកក្នុងវិស័យបវរកញ្ញានោះទេខណៈ Titel របស់នាងសម្រេចចិត្តលុបចោលទាំងគ្មានស្តាយស្រណោះដោយសារតែជម្លោះព្រំដែន។ ទោះយ៉ាងណា ពេលនេះហ្វេនៗមានការសប្បាយចិត្តយ៉ាងខ្លាំងបន្ទាប់ពី សុតធីតា សម្រេចចិត្តវិលមកប្រកួតម្តងទៀតក្នុងវិស័យបវរកញ្ញានៅក្នុងកម្មវិធីកំពុងពេញនិយមមួយរបស់វៀតណាមគឺ Miss Cosmo Cambodia 2026។

ជាមួយនឹងដំណឹងរីករាយដែល សុតធីតា ចូលរួមប្រកួតនោះតាមរយៈផេកអ្នកគាំទ្រមួយបានបង្ហាញថា ភូ ផាត់ធីយ៉ា ក៏នឹងចូលរួមប្រកួត Miss Cosmo Cambodia 2026 ។ ភូ ផាត់ធីយ៉ា ជាមិត្តភក្តិជិតស្និទ្ធនឹង ប៊ី សុធារី ហើយនាងជាធ្លាប់ចូលរួមប្រកួតក្នុងកម្មវិធី Miss Grand Cambodia 2021 ដោយជាប់ក្នុងវគ្គ១០នាក់ចុងក្រោយ និង ក្លាយជាលំដាប់រងទី៤ ក្នុងកម្មវិធី Miss Grand Cambodia 2024។

ការប៉ះគ្នារបស់បេក្ខភាពលេចធ្លោចំនួន ២រូបនេះកាន់តែធ្វើហ្វេនៗវិស័យបវរកញ្ញាមានភាពរំជើបរំជួលទោះបីជាការប្រកួតមិនទាន់ដល់ក្តី៕