អង្គការតម្លាភាពអន្តរជាតិបង្ហាញថាកម្ពុជាជាប្រទេសមានអំពើពុករលួយខ្លាំងជាងគេក្នុងអាស៊ាននៅ២០២៥

នៅថ្ងៃទី១០ ខែកុម្ភៈ ឆ្នាំ២០២៦ របាយការណ៍របស់អង្គការតម្លាភាពអន្តរជាតិ (CPI )បានបង្ហាញថា នៅឆ្នាំ២០២៥ កម្ពុជា ស្ថិតនៅចំណាត់ថ្នាក់ទី១៦៣ ក្នុងចំណោមប្រទេសចំនួន១៨២ ដែលមានអំពើពុករលួយ។

កម្ពុជា ទទួលបានពិន្ទុត្រឹមតែ ២០ លើ ១០០ ប៉ុណ្ណោះ ដោយក្នុងចំណោមប្រទេសអាស៊ានទាំង ១០ កម្ពុជាបានធ្លាក់មកស្ថិតនៅលេខរៀងចុងក្រោយគេបង្អស់ ពោលគឺទាបជាងទាំងប្រទេសឡាវ និងមីយ៉ាន់ម៉ា ដែលកំពុងស្ថិតក្នុងស្ថានភាពជម្លោះទៅទៀត។

ជុំវិញបញ្ហានេះ លោក សយ ច័ន្ទវិចិត្រ អ្នកនាំពាក្យអង្គភាពប្រឆាំងអំពើពុករលួយ បានច្រានចោល និងចាត់ទុករបាយការណ៍នេះថា មិនបានឆ្លុះបញ្ចាំងពីការពិតជាក់ស្តែង ដែលកើតមាននៅកម្ពុជា នាពេលបច្ចុប្បន្នឡើយ។

បន្ថែមពីនេះលោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ បានលើកឡើងថា ចំណាត់ថ្នាក់ ដែលគេចុះបញ្ជីនោះ វាមានរបៀបវារៈរបស់គេមួយ។ រីឯកម្ពុជាខ្លួនឯង ក៏ត្រូវមានរបៀបវារៈកំណែទម្រង់ឱ្យជាក់ស្ដែង ឱ្យប្រាកដនិយម និងឱ្យលើសពីក្រដាស។

សូមរំលឹកថា កាលពីឆ្នាំ២០២៤កន្លងទៅ កម្ពុជាឈរនៅលេខរៀងទី១៥៨ ក្នុងចំណោម ១៨០ប្រទេសដែលមានអំពើពុករលួយខ្លាំងជាងគេ។