លោក ឯម រៀម ចេញបកស្រាយក្រោយរងការរិះគ.ន់ ខណៈ បុរាណាចារ្យ លើកឡើងបែបនេះ

អ្នកច្នៃម៉ូត ឯម រៀម បានធ្វើឱ្យសាធាណជនបញ្ចេញមតិវែកញែកជាច្រើនជុំវិញមកុដរបស់លោកបានពាក់ចូលរួមកម្មវិធី «ខ្លឹមព្រះនគរ» ជាមួយនឹងឈុត «រាជនីកន្ទេល»។ ដោយសារតែសន្ទុះការរិះគន់ឥតឈប់ឈរលោកឯម រៀម បានចេញបកស្រាយពីអត្ថន័យដោយភ្ជាប់មកជាមួយនឹងរូបរបស់ ភឹម ស្រីណូ។ ជុំវិញភាពចម្រូងចម្រាសនេះផេក បុរាណាចារ្យ ដែលតែងតែចែករំលែកពីវប្បធម៌ក៏បានលូកមាត់ផងដែរ។

លោក ឯម រៀម បានសរសេរបង្ហោះនៅលើបណ្តាញសង្គមនៅល្ងាចថ្ងៃទី១២ ថា«តាមពិតទៅមកុដទាំងពីរនេះតំណាង ព្រះនាងឱមាទេវី និង ព្រះសិវៈ បានផលិតរួចរាល់តាំងពីឆ្នាំ២០២៤ តែមិនមានឱកាសបានថតបង្ហាញ គឺបានថតជាមួយ បវកញ្ញា ភឹម ស្រីណូ គឺមកុដព្រះនាងឱមាទេវី ។ បើតាមបែបព្រហ្មញ្ញសាសនា ពងមាន់ គឺតំណាងឱ្យ យោនី នៃព្រះនាងឱមាទេវី រីឯទៀន ដែលដោតបន្តពីលើពងមាន់ គឺតំណាងឱ្យ លិង្គ នៃព្រះសិវៈ ទាំងពីរនេះបញ្ចូលគ្នាបង្កើតបានជា គ្រឿងសិល្បៈ ដែលជនជាតិខ្មែរជឿជាក់ថាជាទេវបង្កើតលោក និងបង្កើតអ្វីៗទាំងអស់ពុំចេះចប់»។

អ្នកច្នៃម៉ូតរូបនេះ បន្តទៀតថា «សព្វថ្ងៃមានជំនឿតៗគ្នាថា អ្នកដែលអត់គូឱ្យទៅបួងសួងសូមពី ព្រះសិវៈ និងព្រះនាងឱមាទេវី និងគូគាប់…ឬអ្នកដែលមានគូហើយសូមបួងសួង ឱ្យស្រឡាញ់គ្នា និងសុខសប្បាយជារាងរហូត…»។

ការច្នៃប្រឌិតរបស់លោក ឯម រៀម ត្រូវបានមនុស្សភាគច្រើនមិនពេញចិត្តនោះទេដោយហេតុថាមកុដរបស់លោកគឺមានសភាពច្បាស់ៗពេក។ ងាកមកកាន់ផេក បុរាណាចារ្យវិញក៏បាននិយាយប៉ុន្មានម៉ាត់ទាក់ទងនឹងការច្នៃប្រឌិតរបស់លោក ឯម រៀម ផងដែរ។

នៅយប់ថ្ងៃទី១៣ បុរាណាចារ្យ បានសរសេរថា «ការច្នៃប្រឌិតមានលក្ខណៈជាធម្មជាតិពេក ខុសពីទំនងនៃសិល្បៈប្រពៃណីខ្មែរដែលនិយមភាពជាសិល្បៈច្នៃប្រឌិតច្រើនជាង។ យើងអាចសង្គេតមើល បណ្តាសិវៈលិង្គនានា ក្នុងរចនាបថខ្មែរបាន។ មកុដជានិមិត្តរូបនៃក្សត្រនៃទេវៈ គួរតែប្រើប្រាស់ សិវៈលិង្គ (….) ដើម្បីបង្ហាញពីភាពខ្ពង់ខ្ពស់ ក្នុងវប្បធម៌»៕