ស្ងាត់ៗតារាចម្រៀង វណ្ណថាន ភ្ជាប់ពាក្យជាមួយនឹងនារីដ៏ស្រស់ស្អាតម្នាក់

មិនមានទំនាក់ទំនងស្នេហាបើកចំហនៅលើបណ្តាញសង្គមឱ្យមហាជនបានដឹងស្រាប់តែថ្ងៃទី២៩ ខែធ្នូ នេះមានអ្នកគាំទ្របានចែករំលែកតារាចម្រៀង វណ្ណថាន បានភ្ជាប់ពាក្យជាមួយនឹងនារីដ៏ស្រស់ស្អាតម្នាក់។

តាមរយៈរូបភាពពីរសន្លឹកដែលបង្ហោះដោយអ្នកគាំទ្រ វណ្ណដា គេបានឃើញតារាចម្រៀង វណ្ណថាន និង នារីស្រស់ស្អាតម្នាក់ក្នុងឈុតបែបប្រពៃណីយ៉ាងស្រស់ស្អាតនិងសាមញ្ញដែលអ្នកទាំងពីរហាក់ដូចជាភ្ជាប់ពាក្យជាមួយគ្នា។ រូបមួយសន្លឹកទៀតគឺគេបានឃើញ វណ្ណដា រ៉េត ស៊ូហ្សាណា កៅ សុភា និងក្រុមការងារមួយចំនួនបានចូលរួមកម្មវិធីរបស់ វណ្ណថាន។ យ៉ាងណាមិញ កូនក្រមុំរបស់តារាចម្រៀងរូបនេះអ្នកគាំទ្រពុំទាន់ច្បាស់ថាជាអ្នកស្រុកណានោះទេ។

ក្រោយពីរូបភាពពីរសន្លឹកនេះមានការចែករំលែកនៅលើបណ្តាញសង្គមអ្នកគាំទ្រមួយចំនួនបានសម្តែងការភ្ញាក់ផ្អើលពីព្រោះ វណ្ណថាន ម្ចាស់បទ កំលោះស្រុកខ្មែរ ពុំបានបង្ហាញទំនាក់ទំនងនៅលើបណ្តាញសង្គមឡើយប៉ុន្តែស្រាប់តែរៀបចំកម្មវិធីតាមបែបប្រពៃណីតែម្តង។ ក្រោយរូបភាពមង្គលរបស់តារាចម្រៀង វណ្ណថាន និងគូស្នេហ៍ ផុសនៅលើបណ្តាញសង្គមអ្នកមួយចំនួនស្រាប់តែមានការកត់សម្គាល់វីដេអូរបស់ ម៉ូថេ ដែលបានបង្ហោះកាលពីតុលា នៅឯប្រាសាទអង្គរវត្ត។

វីដេអូខ្លីនោះគេបានឃើញ វណ្ណថាន និងនារីម្នាក់មានភាពស្និទ្ធស្នាលគ្នា ខណៈពេលនេះអ្នកទាំងពីរក៏បានឆ្លងកាត់ចាស់ទុំរៀបចំកម្មវិធីតាមប្រពៃណីទំលាប់ទម្លាប់ដូនតាខ្មែរ។ ជាមួយនឹងការភ្ញាក់ផ្អើលអ្នកគាំទ្រមួយចំនួនក៏បានសម្តែងការអបអរចំពោះតារាចម្រៀង វណ្ណថាន ដូចគ្នា៕