ជាតិក៏ជួយ គ្រួសារក៏ត្រូវផ្គត់ផ្គង់ ដៃម្ខាងធ្វើការដៃម្ខាងទៀតជួយជាតិគឺជារឿងដែលចាំបាច់នៅក្នុងកាលៈទេសៈនេះដើម្បីជួយទ្រទ្រង់សេដ្ឋកិច្ចជាតិ។ ក្នុងពេលដែលយោធាថៃឈ្លានពានទឹកដីកម្ពុជាអ្នកសិល្បៈសឹងតែទាំងអស់បានផ្អាកសកម្មភាពកម្សាន្តរបស់ខ្លួន ខណៈដែលសង្គ្រាមមានការអូសបន្លាយពេលនេះអ្នកដឹកនាំរឿង សិល្បករសិល្បការិនី មានបំណងបំពេញការងារ និងសុំឱ្យជួយគាំទ្រវិស័យភាពយន្តឡើងវិញពីព្រោះអាចយកលុយពីការងារមកជួយដល់កងទ័ពនិងជនភៀសសឹកបន្តទៀត។
លោក គូ ដារ៉ាចាន់ អ្នកដឹកនាំរឿងប្រចាំសាស្រ្តាហ្វៀមបានបង្ហាញថាមុនពេលមានសង្គ្រាមភាពយន្ត «កូនស្រីចងក» មានសន្ទុះគាំទ្រប៉ុន្តែនៅពេលមានការឈ្លានពានធ្វើឱ្យពិបាកក្នុងការផ្សព្វផ្សាយ។ លោកបានសរសេរនៅលើបណ្តាញសង្គមកាលពីយប់ថ្ងៃទី១៨ ធ្នូ ថា «រឿងកំពុងមានការគាំទ្រ ស្រាប់តែចោរសៀមឈ្លានពានធ្វើឱ្យយើងរារែកក្នុងការផ្សព្វផ្សាយ។ វិស័យភាពយន្តក្នុងសម័យសង្គ្រាមពិតជាត្រដាបត្រដួសណាស់ បងប្អូនដែលមិនទាន់បានទស្សនា សូមកុំភ្លេចចូលរួមគាំទ្រព្រោះជាសប្តាហ៍ចុងក្រោយ ហើយក៏ជាឱកាសចុងក្រោយនៃការតស៊ូ។ បងប្អូនអាចឆ្លៀតពេល១ម៉ោងកន្លះដើម្បីលំហែ និងសម្រាកអារម្មណ៍ពីភាពតានតឹង ហើយយើងងាកមកជួយជាតិវិញធម្មតាណា សូមរួមគ្នាគាំទ្រដើម្បីវិស័យដ៏កម្សត់មួយនេះផង»។
ពិធីករ វី យ៉ារ៉ូ បានលើកឡើងនៅលើបណ្តាញសង្គមកាលពីពេលថ្មីៗនេះ(១៧ ធ្នូ) ដែរថា « Funny content ប្រូម៉ូតផលិតផលគេ ដែលខ្ញុំបានថតទុក ដល់ពេលត្រូវផុស អាចផុសបានទេបងប្អូន? បើអត់បានផុស គេមិនអាចបាញ់paymentឱ្យដូចគ្នា ហើយការងារកម្សាន្តគេផ្អាកច្រើនណាស់បងប្អូនអើយដូចជា concert ជាដើម។ យល់ថាមិនមែនតែខ្ញុំទេដែលជួបរឿងនេះ ប៉ុន្តែលឿនពេក ផ្អាកការងារច្រើនពេក មិនបានត្រៀមទុកមុន ហើយទំនួលខុសត្រូវនៅតែមានច្រើនដដែល ដូចជាចំណាយលើជីវិតខ្លួនឯង បង់ធនាគារ ជួយគ្រួសារ ហើយជាតិកាន់តែចង់ជួយខ្លាំងតែម្តង ដោយស្មោះស»។
ពិធីកររូបនេះបានឱ្យដឹងទៀតថាលោកបានផ្អាកការងារច្រើនណាស់ហើយចំណូលក៏តាមហ្នឹងពីព្រោះលោកមិនមែនបើកប្រាក់ខែទេគឺគិតតាមថ្ងៃ។ វីយ៉ារ៉ូ ថាដោយសារចោរសៀមប៉ះពាល់ការងារ ខាតបង់ចំណូលច្រើន ខណៈលោកស្នើសុំការយោគយល់និងកុំឱ្យចោរសៀមមានឥទ្ធិពលលើយើងពេក។.png)
មិនត្រឹមតែ យ៉ារ៉ូ ប៉ុណ្ណោះទេដែលមានបំណងចង់បំពេញសកម្មភាពការងារឡើងវិញសិល្បករ សិល្បការិនី Influencers ដូចជាពិធីការិនី ពេជ្រ ច័ន្ទធីតា ,តារាសម្តែង ហេង បូនីកា, ឆាឆា , សាយទី , ជេ ស៊ីកា , និង Goofy ជាដើមបានបង្ហាញការគាំទ្រនូវសំណេររបស់ យ៉ារ៉ូ ដោយស្នើឱ្យសាធារណជនយោគយល់ត្រង់ចំណុចនេះ៕
