អស់រយៈពេល៨ឆ្នាំមកហើយដែលតារាចម្រៀងសុគន្ធ និសា បានភ្ជាប់និស្ស័យជាមួយនឹងលោក ចៅ សម្បត្តិ ហៅ សាំបា ដែលជាអាណិកជនខ្មែរ អាម៉េរិក។ ទោះបីជាមិនសូវបង្ហាញភាពផ្អែមល្ហែមបង្ហោះនៅលើបណ្តាញសង្គមញឹកញាប់ដូចគូស្នេហ៍មួយចំនួន ប៉ុន្តែជីវិតអាពាហ៍ពិពាហ៍តារាចម្រៀងរូបនេះនៅតែរឹងមាំខណៈមកទល់ពេលនេះមានរយៈពេល៨ឆ្នាំហើយ។
ខួបអាពាហ៍ពិពាហ៍ឈានដល់លេខ៨នេះតារាចម្រៀង សុគន្ធ និសា បានចែករំលែកវីដេអូបទចម្រៀង «ជីវិតតែមួយ» ដែលជាចំណងដៃកាលពីខួបអាពាហ៍ពិពាហ៍៧ឆ្នាំ។ មិនត្រឹមតែបង្ហាញពីភក្តីស្នេហ៍ចំពោះស្វាមីដែលរួមរស់ជាមួយគ្នាជិត១ទសវត្សន៍នេះ អ្នកនាង សុគន្ធ និសា បានបង្ហាញឱ្យដឹងថាបទចម្រៀងនេះគឺពោរពេញដោយក្តីស្រលាញ់មិនថាជានិស្ស័យឬកម្មពារក៏មិនស្តាយក្រោយ។
អ្នកនាង សុគន្ធ និសា បានចែករំលែកកាលពីថ្ងៃទី១ ខែធ្នូ ថា «បទចម្រៀងសរសេរចេញពីបេះដូង ពាក្យមួយម៉ាត់ៗពោរពេញដោយក្តីស្រឡាញ់ នៅពេលដែលស្តាប់ម្តងៗក៏ទទួលបានអារម្មណ៍មួយដែលពោរពេញដោយក្តីស្រឡាញ់ដ៏ស្ងប់ស្ងាត់ពេញបេះដូង (មិនថានិស្ស័យឬកម្មពារក៏មិនស្តាយក្រោយ)»។
.png)
នៅក្នុងអត្ថន័យបទនេះគឺបានបង្ហាញថាអ្នកទាំងពីរពីមនុស្សម្នាក់ដែលមិនធ្លាប់ស្គាល់គ្នាបានប្រែក្លាយជាមនុស្សពីរនាក់រស់នៅខ្វះគ្នាមិនបាន ហើយអ្នកទាំងពីរបានសន្យាថានឹងកាន់ដៃគ្នាពុះពារឧបសគ្គជាមួយគ្នាជាជីវិតតែមួយ មិនស្តាយក្រោយដែលជ្រើសនោះទេ។
គួរឱ្យដឹងថាតារាចម្រៀង សុគន្ធ និសា និងស្វាមី ពុំទាន់មានដំណក់ឈាមរួមគ្នាឡើយប៉ុន្តែជីវិតអាពាហ៍ពិពាហ៍របស់អ្នកទាំងពីរពោរពេញដោយក្តីសុខតាមបែបស្ងប់ស្ងាត់រក្សាជីវិតឯកជនពុំសូវបង្ហាញនៅលើបណ្តាញសង្គមឡើយ។
បច្ចុប្បន្ននេះតារាចម្រៀង សុគន្ធ និសា នៅតែបន្តអាជីពសិល្បៈរបស់ខ្លួនប្រកបដោយភាពរលូននិងក្លាយជាតារាចម្រៀងឯករាជ្យមិនស្ថិតក្រោមផលិតកម្មទៀតឡើយ។ ក្រោយពេលវិវត្តន៍ខ្លួនមកជាតារាចម្រៀងឯករាជ្យ សុគន្ធ និសា បានសហការជាមួយនឹងតារាចម្រៀងស្រករក្រោយខ្លួនដូចជា នីកូ ពេជ្រ សូលីកា ជាដើម។ ក្រៅពីអាជីពសិល្បៈតារាចម្រៀង សុគន្ធ និសា ក៏មានមុខជំនួញផ្ទាល់ខ្លួនផងដែរ៕
