កម្ពុជា-ថៃ ឯកភាពបញ្ជូនក្រុមវាស់វែងចម្រុះ ដើម្បីទៅដោះស្រាយបញ្ហានៅភូមិជោគជ័យនិងភូមិព្រៃចាន់

រដ្ឋលេខាធិការកិច្ចការព្រំដែន បានបញ្ជាក់ថា ពាក់ព័ន្ធនឹងការងារវាស់វែងនិងបោះបង្គោលបណ្ដោះអាសន្ននៅកំណាត់ខ្សែព្រំដែនចន្លោះបង្គោលព្រំដែនលេខ៤២-៤៧ ភាគីកម្ពុជានិងថៃបានឯកភាពគ្នាបញ្ជូនក្រុមវាស់វែងចម្រុះចុះអនុវត្ដការងារលើដីជាក់ស្ដែង ដើម្បីឈានទៅរកការដោះស្រាយលើបញ្ហានៅភូមិជោគជ័យនិងភូមិព្រៃចាន់ ស្ថិតក្នុងភូមិសាស្ដ្រស្រុកអូរជ្រៅ ខេត្ដបន្ទាយមានជ័យ។

យោងតាមសេចក្ដីប្រកាសព័ត៌មាន របស់រដ្ឋលេខាធិការកិច្ចការព្រំដែន នៅថ្ងៃទី២១ ខែវិច្ឆិកា ឆ្នាំ២០២៥ បានឲ្យដឹងថា ពេលនេះភាគីទាំងពីរបានឯកភាពបញ្ជូនក្រុមការងារចុះរៀបចំផែនការ និងអនុវត្ដការងារលើដីជាក់ស្ដែងចាប់ពីថ្ងៃទី១៨ ខែវិច្ឆិកា ឆ្នាំ២០២៥ ដើម្បីវាស់វែងនិងបោះបង្គោលបណ្ដោះអាសន្ន ដែលនេះគឺជាការបន្ដអនុវត្ដការងារជាជំហានៗដើម្បីឈានទៅដល់ការខណ្ឌសីមាលើដីជាក់ស្ដែង ស្របតាមខ្លឹមសារនៃអនុស្សរណៈនៃការយោគយល់គ្នាឆ្នាំ២០០០(MOU 2000), ស្របតាមបែបបទការងារ(TOR) ឆ្នាំ២០០៣ និងស្របតាមស្មារតីនៃកំណត់ហេតុកិច្ចប្រជុំJBCនាពេលកន្លងមក។

រដ្ឋលេខាធិការកិច្ចការព្រំដែនបានឱ្យដឹងបន្ថែមថា ពាក់ព័ន្ធការងារវាស់វែងនិងខណ្ឌសីមាព្រំដែនគោកកម្ពុជា-ថៃ ក្រុមវាស់វែងចម្រុះនៃភាគីទាំងពីរបានចាប់ផ្ដើមចុះអនុវត្ដការងារលើដីជាក់ស្ដែងចាប់តាំងពីឆ្នាំ២០០៦មកម្ល៉េះ ដើម្បីវាស់វែងនិងស្វែងរុករកទីតាំងពិតប្រាកដនៃបង្គោលព្រំដែន(បេតុង)ចំនួន៧៤បង្គោល ដែលបានបោះដោយគណៈកម្មការបោះបង្គោលព្រំដែនរវាងឥណ្ឌូចិន-សៀម នៅចន្លោះឆ្នាំ១៩១៩-១៩២០។

ដោយឡែក ចំពោះកិច្ចការដែលក្រុមវាស់វែងចម្រុះបានអនុវត្ដកន្លងមក ជាពិសេសកំណាត់ខ្សែព្រំដែនចន្លោះបង្គោលលេខ៤២-៤៧ ភាគីទាំងពីរបានត្រឹមតែចុះអនុវត្ដការងារស្វែងរុករកទីតាំងពិតប្រាកដនៃបង្គោលព្រំដែនប៉ុណ្ណោះ និងមិនទាន់បានអនុវត្ដការងារខណ្ឌសីមាលើដីជាក់ស្ដែងនៅឡើយ។

ឆ្លៀតក្នុងឱកាសនេះផងដែរ រដ្ឋលេខាធិការដ្ឋានកិច្ចការព្រំដែន បានអំពាវនាវដល់ជនរួមជាតិ និងសាធារណជន ទាំងអស់មេត្តាជឿទុកចិត្តលើរាជរដ្ឋាភិបាលកម្ពុជា និងគណៈកម្មការចម្រុះខណ្ឌសីមាព្រំដែនគោក (JBC) កម្ពុជា ដែលជានិច្ចកាលតែងប្រកាន់ខ្ជាប់នូវមនសិការវិជ្ជាជីវៈនិងការទទួលខុសត្រូវខ្ពស់បំផុត ដោយតម្កល់ ឧត្តមប្រយោជន៍ជាតិជាធំ ជាពិសេសការការពារបូរណភាពទឹកដីនិងអធិបតេយ្យជាតិ ដោយប្រកាន់ខ្ជាប់នូវ ការគោរពច្បាប់អន្តរជាតិ គោរពគោលការណ៍ព្រំដែនមិនកែប្រែ និងខ្សែព្រំដែនអន្តរជាតិ កម្ពុជា-ថៃ ដែល បន្សល់ទុកដោយគណៈកម្មការព្រំដែនរវាងឥណ្ឌូចិន-សៀម៕