អស់ទ្រាំនឹងអ្នកមួយចំនួនយកលេសស្នេហាជាតិជាន់ពន្លិចខ្មែរគ្នាឯង រ៉េត សារីតា ព្រលយពាក្យសម្តីទៅកាន់អ្នកទាំងនោះទោះបីជាចំថ្ងៃសីលក៏ដោយ។ បវរកញ្ញារូបនេះថាអ្នកដែលប្រមាថមកលើនាង នាងមិនខឹងនោះទេប៉ុន្តែអាណិតវិញហើយបើមានខ្លួនស្រូបយកឱ្យអស់ចុះយុគ៩នេះ។
នៅព្រឹកថ្ងៃទី១៣ ខែវិច្ឆិកា ឆ្នាំ២០២៥ កញ្ញា រ៉េត សារីតា បវរកញ្ញាចក្រវាលកម្ពុជាឆ្នាំ២០២០ស្រាប់តែចេញមកបង្ហោះសំណេរយ៉ាងដូច្នេះថា «ថ្ងៃនេះសូមបញ្ចេញមតិមួយទាន់ទំនេរ។ ប្រទេសជាតិកំពុងតែជួបទុក្ខលំបាក កាលៈទេសៈផុយស្រួយ តែសម្បូរណាស់អ្នកតែស្ករ អ្នកឆ្លៀតឱកាសយកលេសយកឈ្មោះជាអ្នកស្នេហាជាតិ មកជាន់ពន្លិចខ្មែរគ្នាឯង។ ចាកប្រធានខ្លាំងណាស់ ឯណាទៅ critical thinking? »។
បវរកញ្ញារូបនេះបន្តទៀតថា «បើទំនេរណាស់ មកនេះមក ចុះទៅបេសកកម្មផ្ទាល់ជាមួយខ្ញុំ។ ខ្ញុំមិនចេះហូបជោរទេ។ ដរាបណាខ្ញុំនៅមានឈាមជ័រជាកូនខ្មែរ សីលធម៌ខ្ញុំនៅប្រកាន់ខ្ជាប់ជានិច្ច ទៅកាន់អស់លោកអ្នកដែលប្រមាថមកលើខ្ញុំ។ ខ្ញុំមិនខឹងទេ តែខ្ញុំពិតជាអាណិតទៅវិញ។ ចូលចិត្តណាស់រឿងថែមល្បោយ។ ហើយបើមានខ្លួនស្រូបយកឱ្យអស់ចុះ យុគ៩នេះ។ ខ្ញុំទុកចិត្តទាំងស្រុងលើថ្នាក់ដឹកនាំ រាជរដ្ឋាភិបាលកម្ពុជា សម្រាប់កាលៈទេសៈដ៏ពិបាកមួយនេះ។ 
មុននឹងបញ្ចប់សំណេរ រ៉េត សារីតា បានបួងសួងដល់ទេវតា វត្ថុស័ក្តិសិទ្ធ ជួយការពារថែរក្សាដល់ប្រជាជនខ្មែរ ប្រទេសដ៏ស្លូតត្រង់ឱ្យរួចផុតទុក្ខពីប្រទេសជិតខាងដែលគ្មានសណ្តាប់ធ្នាប់ គ្មានអ្នកដឹកនាំច្បាស់លាស់មួយនេះ។ សារីតា ថា «សូមកម្ពុជា មានពិភពលោកធ្វើជាសាក្សី និងទទួលបាននៅសុខសន្តិភាពពេញលេញ១០០% មកវិញ ឆាប់ៗខាងមុខនេះ»។
មុននឹងបង្ហោះសំណេរខាងលើនេះ គេបានឃើញ រ៉េត សារីតា ចែករំលែកខ្លឹមសាររបស់រាជរដ្ឋាភិបាលជុំវិញហេតុការណ៍យោធាបាញ់ប្រហារមកលើប្រជាជនស្លូតត្រង់។ យ៉ាងណាការចែករំលែករបស់ សារីតា ស្រាប់តែគេឃើញមានមតិរិះគន់ចំពោះនាង។ គេចាំបានថាកាលចុងខែតុលា រ៉េត សារីតា បានធ្វើឱ្យអ្នកលេងបណ្តាញសង្គមជាច្រើនបញ្ចេញមតិរិះគន់ចាស់ដៃមកកាន់នាងបន្ទាប់ពីមានការបង្ហោះថាកុំឱ្យយកទុក្ខសោកអ្នកដទៃមកលេងសើចឱ្យរក្សាភាពថ្លៃថ្នូរជាកូនខ្មែរក្នុងពេលព្រះមហាក្សត្រីថៃ Sirikit សោយទិវង្គត៕
