អ្នកបង្កើតមាតិកា ឆេចហ្សី បានចេញវីដេអូមួយដោយនិយាយថាផ្លូវថ្មើរជើងចតុមុខឬ Walk Street លែងសុវត្ថិភាពទៀតហើយបន្ទាប់ពីនាងត្រូវបានគេលួចទូរសព្ទ។ កញ្ញាបានបង្ហាញការសោកស្តាយនិងព្រួយបារម្ភចំពោះកន្លែងទេសចរណ៍ព្រោះកាលណាមិនសុវត្ថិភាពគេលែងចង់ទៅទៀតហើយ។
តាមរយៈវីដេអូដែលបង្ហោះនៅយប់ថ្ងៃទី១០ ខែវិច្ឆិកា អ្នកបង្កើតមាតិកា ឆេចហ្សី បាននិយាយថាវាពិតជាគួរឱ្យសោកស្តាយដែល Walk Street ជាកន្លែងទេសចរណ៍មួយផ្តល់ចំណូដល់អ្នកលក់ មកជាកន្លែងមួយដែលអសុវត្ថិភាពធ្វើឱ្យមនុស្សលែងចង់ទៅធ្វើឱ្យបាត់បង់ចំណូលធំមួយ។ កញ្ញាបានបន្តថាមួយរយៈក្រោយនេះ នៅ Walk Street មានករណីលួចកាបូប លួចទូរសព្ទ មានការកើនឡើងហើយនាងក៏ជាជនរងគ្រោះម្នាក់ក្នុងចំណោមនោះដូចគ្នា។
ឆេចហ្សី បានរៀបរាប់ថាកាលពីថ្ងៃសៅរ៍ នាងបានទៅលេង Walk Street ដោយបានពរក្មួយហើយដាក់ទូរសព្ទនៅក្នុងកាបូបត្រឹមតែ៤-៥នាទីប៉ុណ្ណោះរកទូរសព្ទលែងឃើញ។ ភ្លាមៗបានយកទូរសព្ទផ្សេងខលទៅប៉ុន្តែត្រូវបានបិទ ដែលនេះអាចបញ្ជាក់ថាមិនមែនជាការធ្វេសប្រហែលធ្វើជ្រុះ តែគេបានលួចយកទៅបាត់ហើយ។ ក្រោយមកនាងក៏បានដាក់ពាក្យបណ្តឹងនៅមុខវត្តដែលនៅ Walk Street ប៉ុន្តែនៅមិនទាន់ទទួលបានដំណឹងអ្វីទេនៅពេលនេះខណៈអ្នកនៅជុំវិញខ្លួនថារបស់តែបាត់ហើយគឺបាត់ហើយ។
អ្វីដែលធ្វើឱ្យនាងកាន់តែមិនស្រួលចិត្តនោះគឺនាងឃើញ អ៊ំពូមីងដែលមនុស្សអាយុច្រើនមកពីខេត្តមកលេងនៅ Walk Street ហើយបាត់របស់គឺពួកគាត់ភ័យស្លន់ស្លោរ ខណៈទម្រាំបានរបស់មួយៗមានការសន្សំយូរ។ ឆេចហ្សី ថានាងជាជនរងគ្រោះប៉ុន្តែនៅមានជនរងគ្រោះដែលពិបាកជាងនាងទៀត។ 
ជាចុងក្រោយអ្នកបង្កើតមាតិការូបនេះបានផ្តាំផ្ញើទៅកាន់អ្នកទៅកម្សាន្តឱ្យថែរក្សាទ្រព្យសម្បត្តិខ្លួននៅពេលដើរកម្សាន្តនៅ Walk Street ហើយកុំទៅកន្លែងណាចង្អៀតៗ ខណៈដែលនាងក៏លែងមានទំនុកចិត្តក្នុងការទៅលេង Walk Street ទៀតហើយ៕
