ថ្មីៗនេះអ្នកលេងបណ្តាញសង្គមមួយចំនួនដឹងមកហើយថា ឡូរីន បានបង្ហោះរូបភាពជាច្រើនសន្លឹកដែលនាំឱ្យមានការជជែកវែកញែកទៅលើការស្លៀកពាក់របស់នាងរហូតមានមតិថានាងស្លៀកពាក់មិនសមជាសង្សារកំពូលតារា។ មានទាំងការសរសើរនិងរិះគន់ ឡូរីន ក៏បានឆ្លើយតបនិងបង្ហោះជាសាធារណៈទៅកាន់គណនីមួយដោយនិយាយថាមើលរឿងនោះច្រើនពេកបម្រុងតែ SP ពាក់អាវកក្អមក៏ SP ដែរ។
កាលពីយប់ថ្ងៃទី៩ ឡូរីន បានបង្ហោះរូបភាព Screenshot មួយឆ្លើយតបទៅកាន់គណនីបណ្តាញសង្គមបញ្ចេញមតិរិះគន់នាង។ គណនីដែល ឡូរីន ពុំបានបង្ហាញឈ្មោះនោះមានការខម្មិនដាក់នាងថា «អ្នកណាក៏ស្រឡាញ់ខ្លួនឯងហើយនិងស្រឡាញ់ស៊ិចស៊ី តែរបៀបស៊ិចស៊ីមិនមែនយើងស្លៀកលេចសុដន់ឬមួយលេចគូទបានគេហៅថាស៊ិចស៊ីទេគឺរាងយើង ស្គម គ្មានក្បាលពោះយើងអាចស្លៀកខោរឹប ឬមួយពាក់អាវរឹបឱ្យឃើញរាងយើងអានោះក៏គេហៅថាស៊ិចស៊ីដែរ មិនមែនដល់ថ្នាក់នេះ។ រូបថតណាឃើញប្អូនចូលចិត្តលេចដោះសុដន់ គូទ យូរៗទៅមើលស្រដៀងដូចគេថតរឿងជប៉ុនទាំងដែលខ្លួនឯងមានសង្សារគឺ តារាលំដាប់ប្រទេសខ្មែរលើកតម្កើង វប្បធម៌ខ្មែរ ច្រៀងបទចម្រៀងមានអត្ថន័យ ខ្លួនឯងវិញ ស្លៀកលេចលើៗក្រោមដូចជាមិនគោរពសង្សារខ្លួនឯង។ មួយទៀតដូចជាមិនសូវឱ្យតម្លៃនារីខ្មែរសោះស្លៀកពាក់ របៀបនេះភាគច្រើនគឺស្រីយួនគេចូលចិត្តណាស់។ នាមយើងជាខ្មែរគួរតែស្លៀកបាត់បាំងគេខ្មាស់ ជាតិខ្មែរស្អាត ល្អដោយសារស្រីហេតុអ្វីស្រីរូបនេះយកកេរ្តិ៍ខ្មាស់របស់ស្ត្រីខ្មែរមកបង្ហាញនៅលើបណ្តាញសង្គមរហូត»។
ការបញ្ចេញមតិនេះ ឡូរីន បានឆ្លើយតបវិញថា «មើលរឿងហ្នឹងច្រើនពេកដឹង?ពាក់អាវកក្អមក៏ដោយ តាsp sp អៃ E»។ បន្ទាប់ពីបង្ហោះប្រតិកម្មរបស់ខ្លួនមិនបានប៉ុន្មាន ឡូរីន បានសម្រេចចិត្តលុបវិញផងដែរ។
គួរបញ្ជាក់ផងដែរ ឡូរីន សង្សារ វណ្ណដា ត្រូវបានសរសើរថាពូកែខាងធ្វើម្ហូបប៉ុន្តែជារឿយៗតែងតែត្រូវមហាជនរិះគន់រឿងការស្លៀកពាក់របស់នាង។ មានពេលខ្លះនាងទប់អារម្មណ៍មិនជាប់ក៏បានបង្ហាញប្រតិកម្មប៉ុន្តែក្រោយមកបានលុបវិញជាក់ស្តែងដូចករណីថ្មីៗនេះជាដើម៕
