អបអរសាទរអ្នកខេត្តកំពត! ភ្នំព្រះគុហារហ្លួងនឹងប្រែក្លាយទៅជាកន្លែងកំសាន្តប្រចាំថ្ងៃរបស់ប្រជាពលរដ្ឋនាពេលខាងមុខ

ភ្នំពេញ៖ បើតាមបណ្ដាញទំនាក់ទំនងសង្គមផ្លូវការរបស់ ឧបនាយកដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី ១០ ខែវិច្ឆិកា ឆ្នាំ ២០២៥ បានឲ្យដឹងថា ក្រុមការងាររដ្ឋាភិបាល បានចុះមូលដ្ឋាន ស្រុកបន្ទាយមាស បាននិងកំពុងគិតគូរក្នុងការប្រែក្លាយតំបន់ទេសភាពភ្នំគុហារហ្លួង ឲ្យទៅជាកន្លែងកំសាន្តប្រចាំថ្ងៃរបស់ប្រជាពលរដ្ឋនៅស្រុកបន្ទាយមាស ក៏ដូចជាប្រជាជនទូទាំងប្រទេសផងដែរ។

លោកឧបនាយកដ្ឋមន្ត្រី បានសង្កត់ធ្ងន់ថា ការប្រែក្លាយ គឺធ្វើតាមរយៈការរៀបចំផ្លូវចូល ចំណតឡាន បន្ទប់ទឹកស្អាត តូបលក់អាហារសមរម្យ ដែលនឹងធ្វើឱ្យតំបន់រមណីយដ្ឋានបំបាំងកាយនេះកាន់តែភាពទាក់ទាញបន្ថែមទៀត។

សូមជម្រាបថា តំបន់បេតិកភណ្ឌធម្មជាតិភ្នំព្រះគុហារហ្លួង ស្ថិតនៅឃុំទូកមាសខាងលិច ស្រុកបន្ទាយមាស ខេត្តកំពត ភ្នំនេះមានរូងភ្នំដ៏ធំដែលជាជម្រកនៃហ្វូងសត្វប្រចៀវរាប់លានក្បាល ដែលផ្តល់ជីធម្មជាតិសម្រាប់សហគមន៍មូលដ្ឋាន និងជារមណីយដ្ឋានទេសចរណ៍ធម្មជាតិដែលមិនទាន់មានការអភិវឌ្ឍន៍ពេញលេញនៅឡើយ។

ត្បិតនៅទីកន្លែងស្ថិតនៅរាងបំបាំងកាយបន្តិច តែតំបន់នេះតែងតែទាក់ទាញភ្ញៀវទេសចរណ៍ឲ្យទៅទស្សនាមិនដែលខាន ដោយសារមានសម្រស់ធម្មជាតិព្រៃព្រឹក្សាដ៏ខៀវស្រងាត់ ខ្យល់អាកាសបរិសុទ្ធល្អ ជាមួយបរិយាកាសស្ងប់ស្ងាត់ឮតែសំឡេងចាបយំ ដែលសាកសមបំផុតសម្រាប់អ្នកចង់គេចចេញពីជីវិតទីក្រុងដ៏មមាញឹក៕