ក្រសួងរៀបចំដែនដី នគរូបនីយកម្ម និងសំណង់ បានចេញសេចក្តីសម្រេចឱ្យម្ចាស់សំណង់សាលាជ័យថាវី ធ្វើការរុះរើសំណង់របស់ខ្លួន ក្រោយក្រសួងបានធ្វើការពិនិត្យ ឃើញថាបានរំលោភផ្លូវសាធារណៈ។
សំណង់សាលារៀនជ័យថាវី បានសាងសង់បិទផ្លូវលេខ១៤៩ ដែលជាផ្លូវសាធារណៈ បង្កឱ្យមានភាពអាណាធិបតេយ្យ និងបាត់បង់សណ្តាប់ធ្នាប់ ដោយការដាក់កង់ ម៉ូតូពាសពេញផ្លូវ។
បើតាមការបញ្ជាក់របស់ ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា៖”សំណង់ដែលបិទផ្លូវបែបនេះ មិនត្រឹមតែធ្វើឱ្យខូចសោភ័ណភាព សណ្តាប់ធ្នាប់ប៉ុណ្ណោះនោះទេ តែវាធ្វើឱ្យប៉ះពាល់ដល់លំហូរចរាចរក្នុងតំបន់ ព្រមទាំងសុវត្ថិភាព និងការសង្រ្គោះនានានៅពេលមានអគ្គិភ័យកកើតឡើងជាយថាហេតុ”។
គួរបញ្ជាក់ថា សាលាជ័យ ថាវី ជាសាលាបង្រៀនគួរ ត្រៀមប្រលងឌីប្លូម បាក់ឌុប និងប្រលងយកអាហារូបករណ៍ទៅក្រៅប្រទេសដ៏ល្បី ជាយូរមកហើយ ដែលបានបង្កើតឡើង នៅឆ្នាំ១៩៩៣ ដោយលោកគ្រូ ជ័យ ថាវី៕
