រដ្ឋមន្រ្តីក្រសួងកសិកម្ម ស្នើឱ្យឈ្មួញជួយទិញស្រូវពីកសិករក្នុងតម្លៃសមរម្យ

ថ្មីៗនេះ បញ្ហាតម្លៃស្រូវលក់បានតម្លៃថោក បានក្លាយជាបញ្ហាចោទនៅលើបណ្ដាញសង្គម ខណៈកសិកររអ៊ូបាត់បង់ចំណូល និងខាតដើម។
ពាក់ព័ន្ធនឹងបញ្ហានេះ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា បានស្នើឱ្យឈ្មួញជួយទិញស្រូវពីកសិករក្នុងតម្លៃសមរម្យ។

តាមរយៈសំណេនៅលើគេហទំព័រផ្លូវការរបស់ឯកឧត្តម ឌិត ទីណា បានលើកឡើងថា៖”ខ្ញុំបានឃើញ ហើយក៏សូមអរគុណបងប្អូនលើបណ្ដាញសង្គមដែលជួយចែករំលែកអំពីបញ្ហាតម្លៃស្រូវរបស់ប្រជាកសិករយើង។ យើងត្រូវប្រែក្លាយការអាណិតអាសូរនេះទៅជាសកម្មភាពជាក់ស្ដែង ដើម្បីយើងចូលរួមជួយដោះស្រាយបញ្ហាតម្លៃស្រូវជូនប្រជាកសិករយើង”។
រដ្ឋមន្រ្តីក្រសួងកសិកម្មរូបនេះ ក៏បានអំពាវនាវឱ្យម្ចាស់ដេប៉ូជីថ្នាំជួយពន្យារការទូទាត់សងជំពាក់ និងម្ចាស់ដីជួយកាត់បន្ថយថ្លៃឈ្នួលដី។
ក្រៅពីនេះ ឯកឧត្តម ក៏ស្នើឱ្យជួយទិញអង្ករ និងគាំទ្រដល់រោងម៉ាស៊ីនដៃគូដែលបានទិញស្រូវពីកសិករនិងសហគមន៍ផងដែរ៕