តារាចម្រៀងនិងសម្តែង ឆឹម សក្កដា បានដឹកនាំសិល្បករសិល្បការិនីជាច្រើនរូបក្នុងការកម្មវិធីសប្បុរធម៌ដើម្បីជួយដល់កងទ័ពនៅឯប្រទេសកូរ៉េខាងត្បូង។ ទោះយ៉ាងណា ការខិតខំប្រឹងប្រែងរបស់លោកនិងសិល្បករដទៃទៀតបែរជាមានអ្នកសង្ស័យថាលោកកិបកេងលុយជំនួយមនុស្សធម៌។ យ៉ាងណា ឆឹម សក្កដា បានឆ្លើយតបដោយចិត្តត្រជាក់កុំឱ្យមានការព្រួយបារម្ភលើបញ្ហានេះអីខណៈថាការបង្ហោះបែបនេះប៉ះពាល់ដល់ទឹកចិត្តរបស់ពួកលោកដែលខំប្រឹង។
កាលពីពេលថ្មីៗណេះ គណនីហ្វេកប៊ុកមួយបានបង្ហោះសំណេរយ៉ាងក្តៅគគុកថា «ម៉េចហើយតារាមកកូរ៉េ តន្រ្តីសប្បុរសធម៌ប្រមូលលុយរួចស្ងាត់ឈឹងចឹងបានប៉ុន្មានអីប្រកាសឱ្យមហាជនដឹងផង ឃើញដើរចាយយូរដែរ តិចទាហានហូបត្រីខដដែលចុះ»។ 
ឃើញសំណេរបែបនេះតារាសម្តែង ឆឹម សក្កដា បានចេញមកឆ្លើយតបថា «កុំព្រួយអីអូន ខាងបងអត់បានកាន់លុយតន្រ្ដីសប្បុរសធម៌ហ្នឹងទេ បើអូនចង់ដឹងអូនសួរខាង Center ផ្ទាល់បាន ហើយខាង Center គេហ្នឹងផុសប្រាប់បន្ទាប់ពីគេសរុបរួច! តែបើអូនផុសថាពួកបងដើរចាយចឹងដូចមិនត្រូវទេ ព្រោះអត់កាន់លុយតន្រ្តីមូលនិធិទេ ហើយត្រឹមកន្លែងគេងនិងហូបខ្លួនឯង ពួកបងក៏មិនមែនអត់មានលុយប៉ុណ្ណឹងដែរ អូនផុសបែបនេះ វាប៉ះពាល់ដល់ទឹកចិត្តលះបង់របស់ពួកបងណាស់!»។
ក្នុងកម្មវិធីសប្បុរសធម៌ដើម្បីកងទ័ពកម្ពុជាលោក ឆឹម សក្កដា បានបង្ហាញនៅក្នុងវីដេអូមួយថាទឹកប្រាក់ដែលទទួលបានគឺមានចំនួនជាង២៣លានវ៉ុន ប៉ុន្តែលោកពុំមែនជាអ្នកកាន់លុយសប្បុរសធម៌នេះទេដោយឱ្យ Center ជាចាត់ចែងហើយខាង Center នឹងចុះទៅជួយកម្ពុជាឆាប់ៗ ដោយលោកនិងសិល្បករផ្សេងទៀតមកកម្ពុជាវិញដោយខ្លួនទទេនោះទេ។
ក្រោយពីបង្ហាញទឹកប្រាក់ដែលទទួលបានជាង២៣លានវ៉ុនពីបងប្អូនរស់នៅប្រទេសកូរ៉េ លោក ឆឹម សក្កដា ក៏បានបញ្ជាក់នៅព្រឹកថ្ងៃទី១៣ ថានឹងមានការបន្ថែមទឹកប្រាក់ឱ្យគ្រប់ចំនួន២៥លានវ៉ុន ដែលស្មើនឹងជាង១,៧០០០ដុល្លារអាម៉េរិក៕
