តារាចម្រៀង លីម តិចម៉េង ហាក់ដូចជាធុញថប់ផ្លូវចិត្តព្រោះតែទទួលបានសំណួរញឹកញាប់ទាក់ទងនឹងរឿងឯកជនមិនទាន់មានគូស្នេហ៍។ ម្ចាស់ពានរូបនេះបានបញ្ជាក់ថាតាំងពីលោកកើតមកមកទល់នឹងពេលនេះលោកពុំធ្លាប់មានគូស្នេហ៍ជាមនុស្សប្រុសនោះទេ រួមទាំងអនាគតផងដែរ។
ថ្មីៗនេះនៅលើបណ្តាញសង្គមទិកតុកគេបានឃើញគណនីមួយបង្ហាញការស្រលាញ់យ៉ាងងប់ងល់មកកាន់តារាចម្រៀង លីម តិចម៉េង សូម្បីតែ ហ៊ាទី ក៏បានចាប់អារម្មណ៍លើរឿងនេះផងដែរ។ ទាក់ទងនឹងជីវិតឯកជននេះ តិចម៉េង ក៏ធ្លាប់បាននិយាយនៅក្នុងការ Live ដែរថាលោកពុំមែនជាអ្នកស្រលាញ់ភេទដូចគ្នានោះទេគឺលោកស្រលាញ់មនុស្សស្រី។ យ៉ាងណាមិញ ការសួរដដែលៗរបស់អ្នកគាំទ្របានជំរុញឱ្យ លីម តិចម៉េង ចេញមកបង្ហោះសំណេរបញ្ជាក់តែម្តង។
ក្នុងសំណេររបស់ម្ចាស់ពាន Cambodian Idol រដូវកាលទី៥ បានបញ្ជាក់ថាសំណួរដែលលោកទទួលបានគឺ តើលោកជាភេទទី៣មែន? និងសំណួរមួយទៀតគឺ ពេលណាលោកយកប្រពន្ធឬយកសង្សារ ហើយសំណួរនេះគឺសួរលោក៣ឆ្នាំមកហើយ។ តិចម៉េង បានចេញមកបកស្រាយនៅថ្ងៃទី២៥ សីហា នេះដោយបញ្ជាក់ថាជាការបញ្ជាក់លើកចុងក្រោយព្រោះគ្មានពេល ឆ្លើយតបពន្យល់Private គ្រប់ៗគ្នាទេ ។
លីម តិចម៉េង ថាតាំងពីកើតមករហូតដល់វ័យ២៨ឆ្នាំនេះ លោកមិនដែលមានសង្សារជាមនុស្សប្រុសទេ ហើយគឺមួយជីវិតតែម្តង ពីព្រោះលោកជាមនុស្សប្រុស១០០%។ តារាចម្រៀងរូបនេះថានេះមិនមែនជាការរើសអើងភេទទី៣ទេ គ្រាន់តែជាការពិតរបស់ខ្លួន។
ទាក់ទិននឹងរឿងគូស្រករ លីម តិចម៉េង ថាលោកចង់ប្រពន្ធពេលណាជារឿងឯកជនរបស់ខ្លួន ស្រេចតែលោកហើយទុកពេល ទុកសិទ្ធិឱ្យលោកផង។ តិចម៉េង បន្ថែមថានេះជាចម្លើយរបស់លោកហើយ ហើយឈប់សំណួរអត់បានការទាំងនេះទៀត បើទំនេរអាចធ្វើអ្វីផ្សេងដែលមានប្រយោជ៍ទៅ។ តារាចម្រៀង លីម តិចម៉េង បានសង្កត់ធ្ងន់ចុងក្រោយថា«បើមិនឆ្លើយតបគេថាយើងនេះឬកពារបង្កើតឱ្យមានពាក្យចចាមអារ៉ាមឥតល្ហែ»៕
