ជុំវិញរឿងអ្នកលក់អនឡាញម្នាក់អះអាងថាជាកូនស្តេចនាគហើយត្រូវកម្លាំងនគរបាលចាប់ខ្លួនបង្កឱ្យបណ្តាញសង្គមមានការចាប់អារម្មណ៍យ៉ាងខ្លាំង។ យ៉ាងណាមិញ តារាចម្រៀង ជី ដេវីត បានដាស់ស្មារតីជនរួមជាតិកុំខ្វល់នឹងមនុស្សសតិមិនគ្រប់ម្នាក់ ចំណែកឯ លីម តិចម៉េង ថាគួរខ្វាយខ្វល់រឿងជាតិជាង «ស្តេចនាគ»។
តារាចម្រៀង ជី ដេវីត បានសរសេរនៅលើគណនីហ្វេកប៊ុកផ្ទាល់ខ្លួនថា «យើងកើតសេចក្តីប្រមាថពូជពង្សដោយមិនដឹងខ្លួន ត្រឹមមនុស្សសតិមិនគ្រប់ម្នាក់ក៏អាចពង្វក់បង្វែងស្មារតីធ្វើឱ្យយើងគ្រប់គ្នាចម្អកដល់អតីតកាលនៃការកកើត។ កុំទៅឆ្ងាយពេកត្រឡប់មកវិញមានរឿងច្រើនទៀតដែលយើងត្រូវធ្វើ និង ត្រៀមចិត្ត»។ តារាចម្រៀងដែលតែងតែខ្វាយខ្វល់ចំពោះជម្លោះព្រំដែនកម្ពុជាថៃរូបនេះបានបង្ហាញថាលោកដេកឱបកំហឹងរាល់រាត្រី នៅពេលបានឃើញកុមារៗរងគ្រោះបែកផ្ទះសម្បែងរស់នៅជំរុំភៀសខ្លួន បន់ឱ្យឪពុកមានសុខសុវត្ថិភាព ខណៈដែលទាហាន១៨នាក់ដែលថៃចាប់ទៅនៅមិនទាន់មានការដោះលែង។
ងាកមកកាន់តារាចម្រៀង លីម តិចម៉េង ម្ចាស់ពាន Cambodian Idol រដូវកាលទី៤ វិញមិនខុសគ្នាប៉ុន្មាននោះទេដែលចង់ឱ្យពលរដ្ឋខ្វាយខ្វល់រឿងផ្សេងជាងរឿងកូនស្តេចនាគ។ តិចម៉េង បានបង្ហោះថា «អាចគិត អាចតាមដាន អាចខ្វល់ខ្វាយពីរឿងដែលត្រូវខ្វល់ក្រៅពីរឿង
« ស្តេចនាគ » បាននៅ? ១ ថ្ងៃពេញហើយគួរតែបានហើយមែនអត់?»។
នៅព្រឹកថ្ងៃទី១៥ សីហា នេះ លីម តិចម៉េង ក៏មានអាក់អន់ស្រពន់ចិត្តដែលលោកនិយាយពីរឿងប្រទេសជាតិមិនសូវមានអ្នកខ្វល់ខ្វាយ តែរឿងលេងសើចបែរជាមានការគាំទ្រខ្លាំងទៅវិញ។
តិចម៉េង បានរៀបរាប់យ៉ាងដូច្នេះថា «តាមពិត Page នេះច្រើនតែ អ្នក Follower ទេ ! ជាងកន្លះលាននាក់ តែតាមពិតអ្នកគាំទ្រពិតប្រាកដប្រហែល ១០% ទៅ ២០% ទេ។ រឿងលេងសើចគេនាំគ្នាគាំទ្រខ្ញុំណាស់ តែបើនិយាយរឿងជាតិ មិនមានច្រើនទេដែលគាំទ្រ មានមួយចំនួនធំទៀតមិនទាំង share ពីរឿងប្រទេសជាតិទៅទៀតព្រោះខ្លាច ព្រោះមិនខ្វល់ នេះជាការពិតដែលមិនអាចប្រកែកបាន ហើយខ្ញុំនឹងចងចាំ»៕
