ច្បាស់ការហើយ! សុីម៉ាក់រកឃើញភស្តុតាងថ្មី ដែលបញ្ជាក់ថាថៃពិតជាបានប្រើប្រាស់ផ្សែងពុលលើកម្ពុជា

(ភ្នំពេញ)៖ អង្គភាពសុីម៉ាក់ បានស្រាវជ្រាវរកឃើញគ្រាប់កាំភ្លើងធំ155មីលីម៉ែត្រ ដែលមានផ្ទុកសារធាតុផ្សែងគីមីពុល White Phosphorus របស់យោធាថៃបានប្រើក្នុងរយៈពេល5ថ្ងៃ កន្លងមកនេះជាមួយកម្ពុជា ។ នេះបើយោងតាមលោក ហេង រតនា អគ្គនាយកអង្គភាពសុីម៉ាក់។

លោក ហេង រតនា បានបង្ហោះនៅលើទំព័រហ្វេសប៊ុក របស់លោក នៅថ្ងៃទី14 ខែសីហា ថា៖ កម្លាំងជំនាញសុីម៉ាក់បានប្រទះឃេីញគ្រាប់ផ្សែងដែលជាប្រភេទគ្រាប់ផ្លោង១៥៥មមមានផ្ទុកសារធាតុឆេះ និង ផ្សែងពុលប្រភេទ White Phosphorus (WP) ដែលទាហានថៃបានបា.ញ់ក្នុងសង្គ្រាមនេះ។

លោកបានបញ្ជាក់ថា គ្រាប់ផ្លោង១៥៥មមនេះ មានលេខ THS856105-011 155MM M825 បានប្រទះឃេីញនៅតំបន់វាលស្រែរបស់ប្រជាពលរដ្ឋ ស្ថិតនៅភូមិសាស្ត្រស្រុកបន្ទាយអំពិល ខេត្តឧត្តររមានជ័យ។

ឆ្លៀតក្នុងឱកាសនេះ លោក ហេង រតនា បានអំពាវនាវដល់បងប្អូនប្រជាពលរដ្ឋទាំងអស់ ជាពិសេសពលរដ្ឋដែលមានលំនៅដ្ឋាននៅតំបន់ប្រឈម សូមមេត្តាមានការប្រុងប្រយត្ន័ខ្ពស់ជាមួយគ្រាប់មិនទាន់ផ្ទុះសំណល់សង្គ្រាមដែលមានផ្សែងពុលនេះ ករណីជួបប្រទះសូមប្រញាប់រាយការណ៍មកកម្លាំងជំនាញCMAC ដេីម្បីចាត់វិធានការសុវត្ថិភាពជូន។

គួររំលឹកថា ក្នុងការប្រយុទ្ធគ្នារយៈពេល5ថ្ងៃ និង6យប់ កងទ័ពអាកាសថៃបានប្រើប្រាស់នូវអាវុធធនធ្ងន់ជាច្រើន ដែលខុសពីច្បាប់អន្តរជាតិ និងបំពានច្បាប់មនុស្សធម៌យ៉ាងធ្ងន់ធ្ងរ។ កាលពីថ្ងៃទី 12 ខែសីហា កន្លងទៅ អង្គភាពសុីម៉ាក់បានស្វែងរកឃើញនូវកូនគ្រាប់បែ.កចង្កោ.មជាច្រើនដែលមិនទាន់ផ្ទុះ មាននៅតាមដើមឈើ វាលស្រែ លើដំបូលផ្ទះ លើដី ឬក្នុងដី និងក្នុងទឹកជាដើម ដែលគ្រាប់ទាំងនោះមានហានិភ័យខ្ពស់ណាស់ អាចបង្កគ្រោះថ្នាក់ដល់ប្រជាពលរដ្ឋបានគ្រប់ពេលវេលា៕