បន្ទាប់តារាកំប្លែងជើងចាស់ នាយក្រឹម រងនូវការរិះគន់ចំពោះពាក្យសម្តីដែលហាក់នៅមានការរើសអើងភេទទី៣ ពេលនេះពិធីករ តាប៊ុយ កំពុងធ្វើឱ្យមានមតិវែកញែកក្រោយនិយាយទាំងសើចទៅកាន់ភេទទី៣ម្នាក់នូវពាក្យសម្តីថា «តំណាងចែកចាយ»។
កាលពីពេលថ្មីៗនេះមានវីដេអូមួយបានធ្វើឱ្យមានការជជែកវែកញែកជាច្រើនបន្ទាប់ពីបុរសម្នាក់បង្ហាញសាច់ដុំក្រោយពីឈរមើលក្រុមរាំដែលកំពុងរាំបទ Kpop នៅលើផ្លូវថ្មើរជើងចតុមុខ។ បុរសបង្ហាញសាច់ដុំហើយសកម្មភាពដែលហាក់ដូចជាមានការប្រៀបធៀបខ្លួនឯងជាមួយក្រុម LGBTQ បានធ្វើឱ្យអ្នកលេងបណ្តាញសង្គមមានការប្រតិកម្មយ៉ាងខ្លាំង។ ក្រោយពីរឿងនេះមានភាពល្បីល្បាញពិធីករ តាប៊ុយ បានទៅសម្ភាសន៍បុរសបង្ហាញសាច់ដុំនោះដោយមានទាំង LGBTQ ម្នាក់នៅក្នុងការសម្ភាសន៍ផងដែរ។
យ៉ាងណាមិញ តាប៊ុយ បានធ្វើឱ្យសាធារណជនមិនពេញចិត្តជាថ្មីនូវសម្តីលេងសើចរបស់លោកបន្ទាប់ពីនិយាយទាំងសើចទៅកាន់ LGBTQ ជាមួយនឹងសម្តីថា «មានអ្វីចង់និយាយទៅកាន់តំណាងចែកចាយរបស់យើង….»។ ពាក្យសម្តីនិយាយទៅកាន់ក្រុមស្រលាញ់ភេទដូចគ្នាជាមួយនឹងការសើចរបស់ តាប៊ុយ បានធ្វើឱ្យទស្សនិកជនប្រតិកម្មយ៉ាងខ្លាំងព្រោះគិតថារឿងនេះមិនគួរមកធ្វើជារឿងលេងសើចនោះទេ ខណៈរឿងថ្មីនេះបានធ្វើឱ្យអ្នកលេងបណ្តាញសង្គមជីកកកាយរឿងចាស់របស់ តាប៊ុយ ដែលនិយាយលេងសើចទៅកាន់ សុភ័ក្រ្ត កុសុម៉ា។.png)
អ្នកប្រើប្រាស់បណ្តាញសង្គមហ្វេកប៊ុក បានបញ្ចេញមតិថា «លើកមុនលេងប៉ះបង Kosama ម្តងហើយសូមទោសហើយរួចខ្លួន ឡូវចេញមកភ្លាវទៀតសរុបមកមនុស្សនេះអន់សីលធម៌ដដែល, តាប៊ុយនៅតែលេងមិនចេះគិត, និយាយបែបសើចចំអក តាប៊ុយ, ភ្លាវៗ, Why តំណាងចែកចាយ….»។
បន្ទាប់ពីទស្សនិកជនសម្តែងការមិនពេញចិត្តចំពោះពាក្យសម្តីលេងសើចរបស់ តាប៊ុយ នូវពាក្យ តំណាងចែកចាយ វីដេអូរបស់ពិធីកររូបនេះនៅក្នុងក្លិបកម្សាន្តមួយកន្លែងត្រូវបានចែកចាយនៅលើបណ្តាញសង្គមផងដែរហើយមានមនុស្សជាច្រើនឌឺដងទៅកាន់ តាប៊ុយ វិញនិងលើកឡើងថា តាប៊ុយ ជាតំណាងចែកចាយធំ៕
