ថ្មីៗនេះម្ចាស់ផលិតផលគ្រឿងសម្អាងមួយចំនួនដែលផលិតនិងវេចខ្ចប់នៅប្រទេសថៃបានសម្រេចចិត្តឈប់បន្តផលិតនៅទីនោះទៀតនិងមានការលក់បង្ហើយស្តុកមុននឹងធ្វើនៅរោងចក្រថ្មី។ ទោះយ៉ាងណា លោក សែម រតនា បានបញ្ចេញវីដេអូមួយដោយបញ្ជាក់ថាដៃគូរោងចក្ររបស់លោកដែលធ្លាប់រកស៊ីជាមួយនៅថៃបានបង្ហើបថាមានម្ចាស់ប្រ៊េននៅខ្មែរគឺបានលេងល្បិចឈប់ដាក់លេខកូដនៅប្រទេសថៃប៉ុន្តែគឺយកចេញពីរោងចក្រថៃដដែល។
កាលពីយប់ថ្ងៃទី៦ សីហា លោក សែម រតនា បានបង្ហោះវីដេអូមួយដោយបានដាក់ចំណងជើងថា «បើផលិតផលរបស់បងផលិតនៅសៀម មុនសង្រ្គាម បងប្រាប់គេត្រង់ទៅ មិនខ្វះខ្មែរយើងជួយទិញ Clear ស្តុកបងឱ្យអស់ទេ តែកុំបោកប្រាស់គាត់ ថាផលិតនៅប្រទេសផ្សេង បើគេចាប់បាន តាមយោបល់ខ្ញុំ បងអាចអត់មានឱកាសជាលើកទី២ទេ»។ ក្នុងវីដេអូនេះលោក សែម រតនា បាននិយាយអំពីដៃគូរោងចក្រនៅប្រទេសថៃដែលធ្លាប់រកស៊ីជាមួយក្រុមហ៊ុនរបស់លោកបានមួយរយៈពេលដែរ។
លោក សែម រតនា បាននិយាយរៀបរាប់ទៅកាន់ដៃគូរកស៊ីរបស់ខ្លួនអំពីការផ្លាស់ប្តូររោងចក្រថ្មី ហើយរូបមន្តផ្សេងៗ លោកនឹងយកមកវិញទាំងអស់។ លោកបានបន្តទៀតថា ដៃគូរោងចក្រនៅឯថៃបានឆ្លើយតបវិញថា មិនចាំបាច់ប្តូររោងចក្រពីគាត់ក៏បានដែរពីព្រោះក៏មានខាងខ្មែរដែលជាដៃគូរបស់គាត់ គឺមិនចាំបាច់ដាក់បាកូដថៃ ដកអក្សររបស់ប្រទេសថៃចេញគឺខាងរោងចក្រធ្វើបាន។.png)
លោក សែម រតនា បានបន្ថែមថានេះគឺជាបញ្ហាហើយលោកក៏មិនដឹងថាដៃគូដែលខាងរោងចក្រថៃនិយាយគឺជាអ្នកណានោះដែរ ហើយក៏មិនដឹងថាអ្វីដែលខាងរោងចក្រថៃនិយាយគ្រាន់តែជាការលើកទឹកចិត្តលោកឱ្យធ្វើការជាមួយគាត់ ឬវាជាការពិតយ៉ាងណាទេ។ លោក សែម រតនា ថាឧទាហរណ៍បើសិននេះជារឿងពិតតើអ្នកធ្វើបែបនេះមានគិតដល់វីរកងទ័ព និងជនរងគ្រោះដែរឬទេ មានមនសិការជាតិជាខ្មែរដែរឬអត់។
គួរបញ្ជាក់ផងដែរថា ថ្មីៗនេះក៏មានពាក្យចចាមអារ៉ាមថាការដឹកជញ្ជូនទំនិញតាមផ្លូវអាកាសពីបាងកក-ភ្នំពេញ មានការកើនឡើងផងដែរ៕
