កម្រនឹងនិយាយអ្វីច្រើននៅលើបណ្តាញសង្គមក្រៅពីការងារនិងបង្ហាញក្តីសុខក្នុងរង្វង់គ្រួសារពិធីការិនី ចាន់ កែវនិមល ស្រាប់តែបានសរសើរទៅកាន់ សុភ័ក្រ្ត កុសុម៉ា ជាមនុស្សមានបេះដូងកម្រស្មោះត្រង់។ ងាកទៅកាន់ពិធីករ ដេវិដ វិញថា កុសុម៉ា ជាអ្នកដែលធ្វើឱ្យបានឈានដល់ ចំណុចសព្វថ្ងៃនេះ ខណៈ រ៉េននី ដារ៉ា វិញថាពិធីការិនីរូបនេះគឺជាបុគ្គលគំរូរបស់លោក។
អ្នកនាង ចាន់ កែវនិមល បានសរសេរនៅលើបណ្តាញសង្គមថា កុសុម៉ា ជាមនុស្សស្រី ម្នាក់នេះមានបេះដូងដ៏កម្រមួយ ស្មោះត្រង់ គោរព ផ្តល់តម្លៃ ដល់អ្នកគ្រប់ គ្នាជុំវិញខ្លួន ជាមនុស្សដែលកត់ចំណាំតែរឿងល្អៗឬក៏អាចនិយាយបានថាជាមនុស្សដែលវិជ្ជមានជានិច្ច។
ងាកមកកាន់ពិធីករ ដេវិដ វិញបានបង្ហាញថា សុភ័ក្រ្ត កុសុម៉ា ជាមនុស្សស្រីដែលមាន គុណបំផុតសម្រាប់ឆាកជីវិតលោក ជាមនុស្សស្រីពូកែ ហើយលោកនិយាយថាលោក មានថ្ងៃនេះក៏ដោយសារតែ កុសុម៉ា ហើយលោកដឹងគុណពិធីការិនីរូបនេះមួយជីវិត។
ចំណែកឯតារាប្រុស រ៉េននី ដារ៉ា វិញបានបញ្ជាក់ថាបីយប់ហើយលោកគេងយំដោយសារតែផតខាស់របស់ កុសុម៉ា ឱ្យតែអូសឃើញលោកយំរហូតព្រោះមានអារម្មណ៍ថាដូចជីវិតលោកណាស់។
រ៉េននី ដារ៉ា បានបន្តទៀតថា កុសុម៉ា ជាមនុស្សម្នាក់ នៅក្នុងសិល្បៈដែលពិតជាគំរូលោក តាំងពីដំបូងមកម្ល៉េះ។ ការតស៊ូពីភាពក្រីក្រនិង បាតដៃទទេ គឺគាត់ហ្នឹងហើយ។ ការធ្វើឱ្យជីវិតកាន់តែប្រសើរឡើង ការស្គាល់គុណឪពុកម្ដាយធ្វើឱ្យខ្លួនឯងឡើង ដោយខ្លួនឯង ធ្វើឱ្យខ្លួនឯងស្គាល់ពីតម្លៃនិងចេះឱ្យតម្លៃមនុស្សជុំវិញខ្លួនលោកស្រឡាញ់។
គួរបញ្ជាក់ផងដែរថា ថ្មីៗកន្លងមកនេះតារាចម្រៀងនិងជាពិធីការិនី សុភ័ក្រ្ត កុសុម៉ា បានចូលរួមជាភ្ញៀវកិត្តិយសក្នុងកម្មវិធីផតខាសរបស់កញ្ញា សេង ហ្គេកលី ដោយបានចែករំលែកបទពិសោធន៍ជាច្រើនក្នុងជីវិតរបស់នាង៕
