ហានី Miss Queen Cambodia 2024 បានចេញវីដេអូមួយដោយប្រកាសទៅកាន់ សាធារណជនថារូបនាងសម្រេចចិត្តមិនទៅចូលរួមប្រកួតនៅក្នុងប្រទេសថៃនាខែកញ្ញា ខាងមុខនេះនោះទេ។
នាយប់ថ្ងៃទី១៣ មិថុនា ហានី Miss Queen Cambodia 2024 បានបង្ហោះវីដេអូខ្លីមួយនៅលើបណ្តាញសង្គម អមដោយចំណងជើងថា «ក្នុងនាមនាងខ្ញុំមានឈាមជ័រកូនខ្មែរមួយរូប នាងខ្ញុំស៊ូលះបង់ដើម្បីជាតិរបស់នាងខ្ញុំ»។បវរកញ្ញាភេទទី៣ រូបនេះបាននិយាយថា ក្នុងនាមនាងជា ហានី មានឈាមជ័រជាកូនខ្មែរមួយរូប ហើយជាអ្នកឈ្នះនៅក្នុងការប្រកួត Miss Queen Cambodia 2024 ដែលត្រូវតំណាងកម្ពុជាចេញទៅលើឆាកអន្តរជាតិនៅឯប្រទេសថៃខាងមុខនេះនាងសុំប្រកាសជាសាធារណៈថានាងនឹងមិនបន្តការប្រកួតនៅប្រទេសថៃក្នុងខែ៩(កញ្ញា) ខាងមុខនេះទេ។
.png)
ការសម្រេចចិត្តមិនទៅប្រកួតនៅឯប្រទេសថៃ ហានី បានបញ្ជាក់ថាប្រទេសមួយនេះ(ថៃ) តែងតែរំលោភបំពានមកលើប្រទេសកម្ពុជាជាច្រើនលើកច្រើនសារមកហើយរហូតមកដល់រឿងចុងក្រោយនេះមានទាហានរបស់សៀមហ៊ានបំពានមកកាន់ទាហានកម្ពុជារបស់នាងដែលជារឿងឈឺចាប់បំផុតសម្រាប់ប្រជាជនខ្មែរទូទាំងប្រទេសរួមទាំងនាងផងដែលមិនអាចទទួលយកបាន។ Miss Queen Cambodia 2024 ថាការលះបង់តំណែងរបស់នាង គឺធ្វើឡើងដោយឆន្ទៈដើម្បីប្រទេសនាងដោយមិនមានការរុញរាឡើយ។
ការប្រកាសបោះបង់តំណែងមិនចូលរួមប្រកួតនៅលើឆាកអន្តរជាតិដែលជាក្តីស្រមៃធំមួយរបស់ម្ចាស់មកុដរបស់ ហានី បានសម្តែងការរំភើបចិត្តនូវការលះបង់របស់នាង។ ទោះយ៉ាងណាខាងស្ថាប័ន Miss Queen Cambodia 2024 មិនទាន់ចេញមកបញ្ជាក់ទេថា បន្ទាប់ពី ហានី សម្រេចចិត្តមិនចូលរួមប្រកួតនៅប្រទេសថៃមានអ្នកផ្សេងត្រូវទៅជំនួសឬសម្រេចចិត្តមិនបញ្ចូនបេក្ខភាពទៅប្រកួតក្នុងឆ្នាំនេះនៅឡើយទេ៕
