វ៉ាន់ នីឡា លើកឡើងបែបនេះជុំវិញរឿងតារាស្រី ម៉ា នីតា រងអំពើហិង្សាពីតារាសម្តែង សន ពិសិដ្ឋ

ជុំវិញរឿងចម្រូងចម្រាសរវាងតារាស្រី ម៉ា នីតា និងអតីតគូស្នេហ៍តារាសម្តែង សន ពិសិដ្ឋ ដែលនាងបានអះអាងថាតារាប្រុសរូបនេះបានវាយធ្វើបាបដល់នាងនិងចង់ទទួលបានភាពយុត្តិធម៌តារាចម្រៀង វ៉ាន់ នីឡា ថាអ្នកទាំងពីរគឺសុទ្ធតែនាងស្រលាញ់និងគោរពដោយសង្ឃឹមថាអ្នកទាំងពីរនឹងមានដំណោះស្រាយសមរម្យឱ្យគ្នា។

នៅយប់ថ្ងៃទី២៤ មេសា វ៉ាន់ នីឡា បានចែករំលែកវីដេអូតារាស្រី ម៉ា នីតា បានលាតត្រដាងអំពីព័ស្តុតាងសំឡេង និងរឿងរ៉ាវដែលតារាសម្តែង សន ពិសិដ្ឋ មានស្រីនិងប្រើអំពើហិង្សាមកលើនាង ដោយតារាចម្រៀងរូបនេះបានលើកឡើងថា «បងស្រីក៏ខ្ញុំរាប់អានស្រលាញ់គោរព បងសិទ្ធខ្ញុំអត់សូវស្និតស្នាលទេតែគោរពគាត់ដូចគ្នា។ ខ្ញុំសង្ឃឹមថាបងទាំងពីរនឹងមានដំណោះស្រាយសមរម្យទៅឱ្យគ្នា យ៉ាងណាក៏សូមគិតដល់ពេលដែលនៅស្រលាញ់គ្នា ពេលវេលាល្អៗជាមួយគ្នា ពេលវេលាសើចសប្បាយរួមគ្នា»។

តារាចម្រៀង វ៉ាន់ នីឡា បានបន្តថា «បើរឿងអត់ដោះស្រាយចប់ទេប្រាកដណាស់មនុស្សដែលរងនៅភាពអយុត្តិធម៌គឺគេនឹងរស់នៅឈឺចាប់រហូត ទោះចិត្តដាច់អស់សេចក្តីស្រលាញ់យ៉ាងណាតែសូមឱ្យមានធម៌មេត្តាចំពោះគ្នា»។

កាលពីថ្ងៃទី១១ មេសា ម៉ានីតា បានបង្ហោះនៅលើបណ្តាញសង្គមដែរថានាងទទួលបាន សាលដីកាពីសាលាឧទ្ធរណ៍ដោយមិនមែនបន្ថយទោស ពី២ឆ្នាំ មកនៅសល់១ឆ្នាំទេ គឺព្យួរទោសជនល្មើស សន ពិសិដ្ឋ ឱ្យរួចខ្លួនតែម្តង គឺមិនជាប់ទោស ខណៈបានបង្ហាញថា សន ពិសិដ្ឋជាជនល្មើសគេចខ្លួន៤ឆ្នាំមកហើយមិនដែលចូលខ្លួន មកតាមការកោះហៅរបស់ច្បាប់ទេ ដល់ចូលមកប្តឹងនាងវិញ បែរជាកាត់ក្តីឱ្យរួចខ្លួនទៅវិញដោយនាងអះអាងថានាងទទួលបាននូវភាពអយុត្តិធម៌៕