ការគ្រប់គ្រងរបស់ YG ខ្វះតម្លាភាពអ្នកគាំទ្រព្រួយបារម្ភពីដំណើរទេសចរណ៍ពិភពលោករបស់ BLACKPINK

ស្របពេលដែលអ្នកគាំទ្រកំពុងរង់ចាំយ៉ាងអន្ទះសារអំពីសកម្មភាពរបស់ក្រុម BLACKPINK ដែលនឹងត្រៀមវិលត្រឡប់មកវិញនិងដំណើរទេសចរណ៍ពិភពលោកនាពេលខាងមុខនេះអ្នកគាំទ្រមានការព្រួយបារម្ភថាការត្រៀមរៀបចំប្រហែលជាមិនទាន់បានចាប់ផ្តើមទេខណៈពេលវេលាមានតិចជាង៤ខែ។

វីដេអូនៅពីក្រោយឆាកនាពេលថ្មីៗនេះដែលបង្ហាញពី Jisoo និង Rosé បានធ្វើឱ្យអ្នកគាំទ្រភ្ញាក់ផ្អើល។ កាលពីថ្ងៃទី៣០ ខែមីនា Jisoo បានចែករំលែកវីដេអូ vlog ដែលបង្ហាញពីការផ្សព្វផ្សាយទោលរបស់នាងសម្រាប់ «AMORTAGE» ដែលបង្ហាញពី Rosé បានជួបគ្នានៅឯការថតទុកមុនសម្រាប់ឆាកតន្រ្តី Inkigayo នៅថ្ងៃទី ១៦ ខែកុម្ភៈ។ ពេលវេលាជួបជុំគ្នារវាងសមាជិកទាំងពីរពិតជាផ្អែមល្ហែមណាស់ ប៉ុន្តែអ្វីដែលទាក់ទាញចំណាប់អារម្មណ៍របស់អ្នកគាំទ្រគឺពាក្យរបស់ Rosé ថា «នេះជាលើកទីមួយហើយដែលពួកយើងបានជួបមុខគ្នាតាំងពីបុណ្យណូអែល”»។ នេះមានន័យថាប្រហែលពីរខែហើយដែលសមាជិកក្រុម BLACKPINK មិនបានជួបគ្នាផ្ទាល់នោះទេ ដែលជារយៈពេលដ៏យូរគួរឱ្យកត់សម្គាល់សម្រាប់ក្រុមដែលកំពុងរៀបចំដំណើរកម្សាន្តជាសកល។

មិនត្រឹមតែប៉ុណ្ណោះ Rosé ក៏បានសារភាពខណៈពេលដែល Jisoo កំពុងបង្រៀននាងពីការ រាំបទ «earthquake »ថា «វាយូរណាស់មកហើយដែលខ្ញុំមិនបានរាំ» ជាហេតុធ្វើឱ្យមានការព្រួយបារម្ភអំពីស្ថានភាពហាត់របស់ក្រុម។ ជាមួយនឹងកាលវិភាគផ្ទាល់ខ្លួនដ៏មមាញឹករបស់សមាជិក ចាប់ពីគម្រោងទោលរបស់ Jisoo សកម្មភាពម៉ូតរបស់ Jennie ដល់កាលវិភាគផ្សព្វផ្សាយអន្តរជាតិរបស់ Lisa និង Rosé អ្នកគាំទ្រជាច្រើនបារម្ភថា BLACKPINK នឹងមិនមានពេលគ្រប់គ្រាន់ដើម្បីរៀបចំពេញលេញ។

ខណៈពេលដែលអ្នកគាំទ្រមួយចំនួនជឿថាក្រុមនេះប្រហែលជាកំពុងអនុវត្តការសម្ងាត់ ប៉ុន្តែអ្នកផ្សេងទៀតកំពុងអំពាវនាវឱ្យ YG Entertainment កាន់តែមានតម្លាភាពអំពីផែនការរបស់ក្រុម។ ដោយសារតែចំនួនសំបុត្រលក់យ៉ាងច្រើន និងការរំពឹងទុកពីអ្នកគាំទ្រទូទាំងពិភពលោករាប់លាននាក់ កង្វះការរៀបចំរបស់ក្រុមអាចនាំឱ្យមានផលវិបាកធ្ងន់ធ្ងរ។

នៅខែកុម្ភៈ ឆ្នាំ 2025 BLACKPINK បានប្រកាសកាលវិភាគនៃដំណើរទេសចរណ៍ពិភពលោកឆ្នាំនេះដែលមានឈ្មោះថា «2025 WORLD TOUR» ដែលចាប់ផ្តើមពីថ្ងៃទី ៥ ខែកក្កដា។ របាយការណ៍ក៏បានបង្ហាញផងដែរថា ក្រុមនេះក៏គ្រោងនឹងចេញបទចម្រៀងថ្មីផងដែរ មុនពេលដំណើរកម្សាន្តចាប់ផ្តើម ដែលបង្កើនការទន្ទឹងរង់ចាំរបស់អ្នកគាំទ្រទូទាំងពិភពលោក៕