មេសា អ្នកចម្រៀងរ៉េបចេញចម្រៀងពីរបទដែលទទួលបានការគាំទ្រខ្លាំងនិងជាជំនួយការតារារ៉េប វណ្ណដា ចេញមកបង្ហាញអារម្មណ៍របស់ខ្លួនយ៉ាងចម្លែកបន្ទាប់ពីទ្រាំហត់ម្នាក់ឯងអស់រយៈពេលជាច្រើនខែ។ ការបង្ហោះរបស់លោកធ្វើឱ្យមានមន្ទិលសង្ស័យជាខ្លាំងមិនដឹងថាជារឿងការងារ ស្នេហា ឬក្រុមគ្រួសារឡើយ ខណៈមិនទាន់បានប៉ុន្មានស្រាប់តែលុបវិញបាត់។
នៅយប់ថ្ងៃទី១៨ មេសា បានបង្ហោះរូបភាពមួយសន្លឹកតាំងពីនៅវ័យកុមារ អមដោយអារម្មណ៍មិនសប្បាយចិត្តតប់ប្រមល់ថា «កាន់តែធំបញ្ហាកាន់តែច្រើន តែមិនដែលត្អូញត្អែរទៅប្រាប់អ្នកណាទេសុខចិត្តទ្រាំហត់ម្នាក់ឯងពិបាកម្នាក់ឯង។ ប៉ុន្តែ ថ្ងៃនេះចង់បញ្ចេញអារម្មណ៍ខ្លះដែលវានៅជាមួយខ្ញុំរាប់ខែ មកហើយ ស៊ូបានប៉ុណ្ណាប៉ុណ្ណឹង ទ្រាំបានប៉ុណ្ណាប៉ុណ្ណឹង លះបង់ច្រើនពេកភ្លេចថាខ្លួនឯងចង់បានអី តែខ្ញុំនៅតែបន្ត ធ្វើអ្វីដែលខ្ញុំស្រលាញ់និងចូលចិត្ត»។
ការបង្ហោះរបស់ មេសា ខាងលើនេះបានធ្វើឱ្យអ្នកគាំទ្រមានមន្ទិលសង្ស័យជាខ្លាំងហើយត្រូវបានគេប៉ាន់ស្មានថារូបលោកកំពុងមានបញ្ហានៅក្នុងចិត្តហាក់ដូចជាទទួលបន្ទុករឿងអ្វីមួយ។ យ៉ាងណាក៏បង្ហោះរបស់ មេសា ក៏បានបាត់ចេញពីបណ្តាញសង្គមរបស់លោកហើយដែរបន្ទាប់ពីបង្ហាញអារម្មណ៍របស់ខ្លួនបានបន្តិច។
មេសា គឺជាជំនួញការរបស់ វណ្ណដា ថែមទាំងបានវិវត្តន៍ខ្លួនមកកាន់វិស័យហ៊ីបហបដូចជាមេរបស់ខ្លួនដែរ ព្រមទាំងបានទម្លាក់បទចម្រៀងនៅលើទីផ្សារនិងទទួលបានការគាំទ្រគួរឱ្យកត់សម្គាល់ពីទស្សនិកជនបើទោះបីជាទើបចេញបទចម្រៀងបានពីរបទក្តី ខណៈបានសម្តែងនៅលើឆាកប្រគំតន្រ្តីមួយចំនួនផងដែរ។ 
មេសា បានទម្លាក់បទដំបូងមានចំណងជើងថា «ដូចមេ» សហការជាមួយ វណ្ណដា កាលពីថ្ងៃទី២២ ខែមេសា ឆ្នាំ២០២៤ ដោយ វណ្ណដា បានបង្ហើបថាបទនេះផលិតមក៤ឆ្នាំហើយទើបមេសាទម្លាក់ដែលមកទល់ពេលនេះមានការស្តាប់ជាង២៧លានដង ខណៈបទទី២ មានចំណង «អត់ពន្ធ» បានទម្លាក់កាលពីថ្ងៃទី ១៥ ខែមករា ឆ្នាំ២០២៥ ដែលមានការស្តាប់ជាង២លានដង៕
