រដ្ឋាភិបាល បញ្ឈប់គម្រោងវិនិយោគក្រុមហ៊ុនចំនួន៤ ដែលចង់វិនិយោគលើភ្នំខ្នងផ្សារ

សម្តេចធិបតី ហ៊ុន ម៉ាណែត បានសម្រេចលុបចោលគម្រោងអភិវឌ្ឍន៍នៅលើតំបន់ទេសចរណ៍ភ្នំខ្នងផ្សារ ដោយដកយកដីមកវិញ ដើម្បីថែរក្សាឱ្យបាននូវស្ថានភាពដើមនៃធម្មជាតិ។

បើតាមក្រុមការងារអន្តរក្រសួង រួមជាមួយនឹងអាជ្ញាធរខេត្តកំពង់ស្ពឺ បានធ្វើការចុះដកបង្គោលព្រំដីក្នុងតំបន់ភ្នំខ្នងផ្សារ ក្រោយពីមានកិច្ចព្រមព្រៀងបញ្ឈប់គម្រោងវិនិយោគរបស់ក្រុមហ៊ុនទាំងបួន ដោយព្រមប្រគល់ដីចំនួន ៤០ហិកតា ជូនដល់សហគមន៍តាំងបំពង់។

ក្រោយពីបានដកបង្គោលព្រំដី មានការសាទរពីសំណាកសហគមន៍ និងប្រជាពលរដ្ឋ ដែលជាអ្នកបម្រើសេវាកញ្ចប់ទេសចរណ៍ ពឹងលើសម្រស់ធម្មជាតិដ៏ស្រស់ស្អាតនៃតំបន់ទេសចរណ៍ខ្នងផ្សារ ដែលសម្តេចនាយករដ្ឋមន្ត្រី បានយកចិត្តទុកដាក់ និងដោះស្រាយនូវទុក្ខកង្វល់របស់ប្រជាសហគមន៍ ហើយសម្រេចឱ្យថែរក្សានូវលក្ខណ:ធម្មជាតិដូចដែលកំពុងមានស្រាប់ ដើម្បីទាក់ទាញទេសចរជាតិ និងអន្តរជាតិ។

គួរបញ្ជាក់ថា ខ្នងផ្សារ ប្រៀបបានជាឋានសួគ៌ធម្មជាតិប្រសព្វមុំបីភ្ជាប់ខេត្តបី កំពង់ស្ពឺ កោះកុង និងពោធិ៍សាត់ ដែលជាតំបន់ចាប់អារម្មណ៍ខ្លាំងពីសំណាក់ភ្ញៀវទេសចរនាប៉ុន្មានឆ្នាំចុងក្រោយនេះ៕