ជាទូទៅអំបិលម៉ត់ពណ៌សរធម្មតានៅក្នុងប្រទេសកម្ពុជាយើង មានតម្លៃប្រហែល ១.៥០០ រៀលប៉ុណ្ណោះក្នុងមួយគីឡូក្រាម ខណៈអំបិលពណ៌ផ្កាឈូកឬហៅថាអំបិលហិមាល័យមានតម្លៃចាប់ពី ៥-៨ដុល្លារអាមេរិកសម្រាប់ ១០០ក្រាម ឬប្រមាណពី ៥០-៨០ ដុល្លារអាមេរិកក្នុងមួយគីឡូក្រាម នេះបើយោងតាមប្រភពព័ត៌មាន Business Insider។ ដូច្នេះហើយហេតុអ្វីបានជាអំបិលពណ៌ផ្កាឈូក ឬហៅថាអំបិលហិមាល័យ មានតម្លៃថ្លៃជាង? តើអំបិលនេះមានសារៈសំខាន់ និងផ្តល់ផលប្រយោជន៍អ្វីខ្លះ?.png)
ជាការពិតណាស់ អំបិលគឺជាគ្រឿងផ្សំដ៏សំខាន់មួយនៅក្នុងផ្ទះបាយ ហើយអំបិលភាគច្រើនដែលយើងធ្លាប់ស្គាល់នោះគឺជាអំបិលសមុទ្រ។ ក្រៅពីអំបិលសមុទ្រ អំបិលហិមាល័យ ក៏ទទួលបានការពេញនិយមខ្លាំងពីអ្នកស្រឡាញ់សុខភាពទូទាំងពិភពលោកផងដែរ ដោយសារវាមានសារធាតុចិញ្ចឹម និងផ្តល់នូវអាហារូបត្ថម្ភច្រើនជាងអំបិលធម្មតា។
អំបិលនេះមានប្រភពនៅប្រទេសប៉ាគីស្ថាន ប៉ុន្តែត្រូវបានអាជីវករឥណ្ឌាយកអំបិលហិមាល័យ មកលក់នៅប្រទេសឥណ្ឌា និងប្រទេសជាច្រើនទៀត ដោយដាក់ស្លាកថា ផលិតនៅឥណ្ឌា។ អំបិលពណ៌ផ្កាឈូកមានអាយុរាប់លានឆ្នាំមកហើយ ត្រូវបានគេប្រទះឃើញនៅបរិវេណជើងភ្នំហិម៉ាល័យ ដែលកើតឡើងដោយសារការប្រែប្រួលរបស់សារធាតុរ៉ែ។ 
អំបិលពណ៌ផ្កាឈូកមានសារធាតុរ៉ែច្រើនជាងអំបិលធម្មតា ជាពិសេសវាមានសារធាតុកាល់ស្យូម, ប៉ូតាស្យូម និងសារធាតុដែក ទើបធ្វើឱ្យវាមានពណ៌ផ្កាឈូក។ អំបិលពណ៌នេះអាចជួយដល់ប្រព័ន្ធរំលាយអាហារ និងផ្តល់អត្ថប្រយោជន៍ដល់សុខភាពល្អបំផុតដូចជា៖ ជួយរក្សាកម្រិតជាតិរាវក្នុងរាងកាយ គ្រប់គ្រងកម្រិតស្ករក្នុងឈាម ពន្យារភាពចាស់ ជំនួយដល់ខួរក្បាល សាច់ដុំ និងប្រព័ន្ធប្រសាទដំណើរការបានល្អ រួមទាំងជួយប្រព័ន្ធផ្លូវដង្ហើម គ្រប់គ្រងសម្ពាធឈាម ជួយឱ្យឆ្អឹងរឹងមាំ ការពារការរមួលក្រពើ ជំរុញតម្រូវការផ្លូវភេទ និងសម្រាកលក់ស្រួល។
ក្រៅពីការយកអំបិលផ្កាឈូកមកធ្វើជាគ្រឿងផ្សំអាហារ គេក៏អាចយកអំបិលនេះទៅធ្វើជាល្អាងអំបិលហិម៉ាល័យផងដែរ ដើម្បីជួយកម្ចាត់ជាតិពុលលើបរិយាកាស និងមិនប៉ះពាល់ដល់សួត។ គួរបញ្ជាក់ដែរថា អំបិលផ្កាឈូកដែលដាក់លក់តាមទីផ្សារមាន ២ ប្រភេទគឺអំបិលគ្រាប់ និងអំបិលម៉ត់ ដោយអំបិលគ្រាប់មានតម្លៃថ្លៃជាងអំបិលម៉ត់៕
