តារាសម្តែងចិន Liu Shi Shi បានទទួលប្រាក់ឈ្នួល ១២ លានយ័ន ប្រមាណ ១.៦៤ លានដុល្លារអាម៉េរិកសម្រាប់តួនាទីរបស់នាងនៅក្នុងរឿងភាគបុរាណថ្មី «Kill My Sins»។ ដ្បិតថាបានតម្លៃខ្លួនជាង១លានដុល្លារប៉ុន្តែតួលេខនេះ គឺជាការថយចុះយ៉ាងខ្លាំងពីប្រាក់ចំណូលពីមុនរបស់នាង។
ដកស្រង់ពី China Times Znews បានរាយការណ៍ថា Liu Shi Shi ទទួលបាន ១១០ លានយន់ ប្រមាណជាង ១៥លានដុល្លារ សម្រាប់តួនាទីរបស់នាងនៅក្នុងរឿង «A Journey to Love» ឆ្នាំ ២០២៣ ដែលធ្វើឱ្យតម្លៃខ្លួនតួនាទីចុងក្រោយនៃសាច់រឿងដែលទើបចាក់បញ្ចាំងឆ្នាំ២០២៥នេះមានការថយចុះ ៨៩% ។ ការធ្លាក់ចុះនេះគឺដោយសារតែការកំណត់បទប្បញ្ញត្តិលើប្រាក់ឈ្នួលរបស់តារាសម្តែងនៅក្នុងប្រទេសចិន ដែលកំណត់ថាប្រាក់ឈ្នួលសរុបសម្រាប់តួសម្តែងទាំងអស់នៅក្នុងរឿងភាគទូរទស្សន៍មិនអាចលើសពី ៤០% នៃថវិកាផលិតកម្មទាំងមូល ហើយប្រាក់ឈ្នួលរបស់តួសម្តែងសំខាន់មិនអាចលើសពី ៧០% នៃប្រាក់ឈ្នួលសរុបរបស់តួសម្តែងបានទេ។
ទោះបីជាមានការថយចុះគួរឱ្យកត់សម្គាល់នេះក៏ដោយ ក៏ប្រាក់ចំណូលរបស់ Liu Shi Shi សម្រាប់រឿង «Kill My Sins» នៅតែនាំមុខគេក្នុងចំណោមតារារួមការងាររបស់នាង។ រឿង «Kill My Sins» ស្ថិតនៅក្នុងរាជវង្សថាង មានតួអង្គ Liu Shi Shi ជា Ye Ping An ដែលជាវេជ្ជបណ្ឌិតស្រីដែលមានទេពកោសល្យ។
គួរបញ្ជាក់ថា Liu Shi Shi មានអាយុ ៣៧ ឆ្នាំបានបង្ហាញខ្លួនក្នុងឆ្នាំ ២០០៥ ។ នាងនិង Nicky Wu បានស្រលាញ់គ្នានៅពេលថតរឿង Scarlet Heart ដែលជារឿងដ៏ពេញនិយមក្នុងឆ្នាំ២០១១។ ពួកគេបានចុះបញ្ជីអាពាហ៍ពិពាហ៍នៅឆ្នាំ២០១៥ និងបានរៀបចំ ពិធីមង្គលការតម្លៃរាប់លានដុល្លារ នៅប្រទេសឥណ្ឌូនេស៊ីក្នុងឆ្នាំ ២០១៦។ ប៉ុន្មានឆ្នាំចុងក្រោយនេះ Liu Shishi បានសកម្មក្នុងឧស្សាហកម្មកម្សាន្ត ខណៈ Nicky Wu កំណត់ការថតរឿងដើម្បីឱ្យមានពេលច្រើនជាមួយកូន៕
